Da na'qaatec taỹalec so nashi Joacim
13¡'Xoraicolec qami' ma'le, ma' quiichigui nqai'ñi' da se no'uen chaqai da se ỹa'maxañi ro'ueenataxanaxaqui'
quena' no'xoñirishiguim na qauochi' lodegaxat chaqai ná'maq ladocaic 'imec ralamaxarichi',
quena' 'ueenataxanaxañi' na liỹa qomyipi,
qam sqai shivichiñi' da lo'ueenataxanaxac!
14Ca 'ñirac: Nagui, ca' ño'xonshiguim ca chalego lecaic 'imec,
ca' sa'ue na 'imqaipi pa'aashiguim.
Vite naua nqotel,
po'ira'alo naua lahil quena qo'paq cedro,
chaqai 'miiñirelec quena toc.
15¿'Neetapigui qavilli' quiyim ca nashi
qaidaata quiyim ỹovira'ta' cana qo'paq cedro?
So qataa'i' netoonta'gue da nachaalataxac;
qam ỹo'ueetetaiquen dá'maq ỹa'maqachiguiñi chaqai ỹaqamqata,
vichiguiño' qaica ma' se ỹa'maxañi quet cá'maq lo'ueenatec.
16Chaqai ro'ootaxanlec quen na 'xoraiquipi chaqai ná'maq chi qoỹoiquentac,
ca' chaqaida 'neeta vichiguiño' ỹa'maqachiguiñi na'le ná'maq ỹo'uet.
Ca chaqaida dá'maq lo'ueenataxanaxac cá'maq iuañiua'.
Ỹim na'gaxala', se'taxajñi dajo ỹa'qaatec.
17Qam qami' qaidaata 'yiiñisapega na ỹoqa'a nauegue;
'viichi' quiyim qaỹalauat ca qaica ca lasauaxaset,
chaqai pataqairiñi chi'segueñi na qomyipi.
18Ñi qara'gaxala' qota'olec 'naac da la'qaatec quiñi Joacim, llaalec so Josías, ñí'maq nashi quiyi Judá:
Qaica ca noỹen ma' ileu.
Ỹaatqajam qaica ca noỹen chaqai quiyim 'naac:
¡'Xoraicolec yi ỹaqaỹa! ¡'Xoraiỹole ayi ỹaqaỹa!
¡'Xoraicolec yi ỹa'gaxala'! ¡'Xoraicolec yi ỹashi!
19Na loshicmaxa ma' ileu qohinta'gue ca 'ashin leuaxaic:
qaỹahoglenta, qaỹauegue'oguiyi,
qaipa'xanauec quiyi Jerusalén.
(22.20-23 Da na'qaatec taỹaugui yi Jerusalén.)
Da la'qaatec ñi qara'gaxala' qota'olec queso nashi Jeconías
24Ñi qara'gaxala' 'neetasa' da la'qaatec queso llaalec so Joacim, leenaxat Jeconías, só'maq nashi quiyi Judá: Ñallitalta' queda ñachaalataxac: quiyim 'enquetqai 'ñiisari' aca paguec ỹauochaqate itanaxanqate ichicshaqate neetagui ada ñapoquena ỹoicse, qam ñaqate'e qami', 25ca' saañiguit qami' na npa'guenaxaua'e'ipi ná'maq ỹahotaque ralauachi' quená'maq chalego da rqolonaxa'e'. Saañiguit qami' ñi nashi quiyi Babilonia, leenaxat Nabucodonosor, chaqai na nalliripi. 26Ca' senaxauec qami' ma'le chaqai añi qachii'i', senaxaigue ma'le yi 'laua se ne'xaỹoxosqori, ca' rilliviỹalec ma'le yi'maxare. 27Ca' saua'maxare tot ishit rapilta yi 'laua yí'maq chalego da lishoqo' quiyim rapilta.
Da la'qaatec so Jeremías
28¿Ca' ñi Jeconías 'ec aca nehoma poxoỹaxai tot qaỹouen,
'ec ca nehoma lahi tot qaica ca nqo'ta?
¿Chi'negue ma' qainaxarec ñi'maxare chaqai na llaalqaipi,
qainaxague da 'laua qaica ca ỹauanapega?
29¡Qami' 'laua,
ñaq na'xaỹaxañita da la'qaatec ñi qara'gaxala'!
30Ñi qara'gaxala' 'naacsa':
'Chiiñi da leenaxat ñijo ỹale cana naneraxalate na qom,
'ec ca qom qaica ca llaalec,
'ec ca ỹale se ỹomachigui dá'maq lo'ueenataxanaxac queda nachaalataxac.
Ma' quena llaalqaipi qaica ca ỹovirau'a quiyim
nqa'xanñigui ma'le añi nqa'xanaxaqui so nashi David
quiyim liỹa quet nashi quena Judá.
(23.1—25.14 Ñi qota'olec retaxaỹa so nashillipi se ipacqajñigui da la'qaatec. Qaiuana aso nahirenaxanaxaqui no'qaachigui cana higo. So pa'guenaxauaripi chicqa'gue da rapiguim.)
