Da na'qaatec taỹalec so Pasur só'maq npa'guenaxaua so Jeremías
1Ca' so Pasur, llaalec so Imer, so'maxare netaxaỹaxanqajnec chaqai 'auaxaic neloxoỹaq quiñi no'ueenaxanaxaqui quiyi Jerusalén, na' 'xaỹa so Jeremías ỹa'xat da qota'olec la'qaatec, 2ca' relaataxanlec quiyim qaỹouaxantac, ca' qaillaugui ñi ncoñiitaxanaxaqui quiñi liỹa nasom so Benjamín pa'aashiguim, na'deetaho quiñi no'ueenaxanaxaqui. 3Ca' queso liỹa nete'e, ca relaataxana'a quiyim qanaqatec so Jeremías queso ncoñiitaxanaxaqui, ca' so Jeremías 'naaco' na'le queso'maxare:
—Qami' Pasur, ñi qara'gaxala' qota'olec ỹadalaxat da qadeenaxachi', ỹanegue qami' nalolec ná'ogue da nqolonaxa. 4Ma' ñi qara'gaxala' 'naac caqami': Ỹim ñigui nqolonaxa nqaishin qami', caqami' chaqai quená'maq nauochaxaua'e'ipi. Ỹaatqajam huañichirigui ma'le na nauochaxaua'e'ipi ma' qaỹalauat qaỹahote'e na lecat na npa'guenaxaua'e'ipi. Saanec ma'le ná'ogue na qomyipi na'ñi na Judá, saanem ñi nashi quiyi Babilonia, ca ñi'maxare coñi', ca' ỹaueguegue da na'laua, loqo'm ỹalauat ỹahote'e na lecat. 5Qai'neeta saanem ma'le na npa'guenaxauaripi ná'ogue na lesallaxa najo na'a' lodegaxat, ná'ogue na lalamaxareteripi chaqai ná'maq no'uen louenec, chaqai ná'ogue na louenec na nashillipi quena Judá quiyim qai'xategue da Babilonia. 6Chaqai qami' Pasur, qare'xachi' ma'le queda Babilonia, riỹa'isac ná'ogue na qauochi'. Ca' chaqaida hua'gue, ca' rillivi' chaqai qarishiñiriñi, chaqai qai'neeta ná'ogue na nauochaxaua'e'ipi, ná'maq quena' taxahi', ca 'xachisapeguem na sqai llic.
So Jeremías niỹoona ñi qara'gaxala'
7Qami' ỹa'gaxala', qami' yayiñi',
chaqai ỹim ñañaanta quiyim yayiñi';
paguec da rquesaxanaxa'e', ca' yaqachiriñi.
Naua'que naua na'xata' chi qayi'neetac;
ná'ogue i'neetac aỹim.
8Quena' setaqa, lotqai sa'xat
da nqa'viic chaqai da nalauataxanaxac;
ca' se name quiyim qoyiquetapiguiỹa' chaqai qayi'neetac,
ma' sa'xateta'pe naua ra'qaataxahi'.
9No'm shinac: “Tot sa'deenapega ñi qara'gaxala',
chaqai tot sa'xat da leenaxat,”
ca' naua ra'qaataxahi' quena iuel 'ec ca norec ravicqataxan
queete'ueguelo naua ipi'naqa.
Sahotaque se sa'xate',
qam se seshit.
10Sa'xaỹa quen na qomyipi remootetecta', 'naac:
“¡Da lichic qaica ca ỹochiỹa'gue!”
'Nerac: “¡Ỹalahi, qolaq, salaxanaxague!”
Vire'ta na ñauochaxauaripi nauaantailec
quiyim 'ue ca so'maqajnac.
'Nerac: “Sqoue nañaanta quiyim sayinaq;
ca ma'le, ca' qodoxonec,
ca ma'le, ca' sahoqe ca qarovi' queda'maxare.”
11Qam qami' ỹa'gaxala', viisau'e na ỹahi,
'ñiisari' ca qaican ishit nalauataxai,
ná'maq yocantegueñi huaañi ma'le,
qam se ishit yaqajñi;
se ipaguelec dá'maq 'neesa'pegue,
ca' 'ue da layilqo' ma'le,
se neme quiyim hueetapigui lauel quiyim na qomyipi se lauela.
12Qami' na'gaxala' sqaica lqalanec,
qami' ná'maq huañita cá'maq ỹa'maqachiguiñi,
qami' ná'maq richaauec nqai'ñi' na qom,
qouaquiric seuanchigui nqai'ñi' cá'maq 'ñi'sa'gue, ma' vite ca nouaxanaxaset najo qomyipi,
ma' ñañaañiguilo naua rqai'laqachichi' quiyim 'ootaxañirelec aỹim.
13¡'Ueenaxañitalec ñi qara'gaxala', maqachiñii ñi qara'gaxala'!,
ma' ñi'maxare nca'laxatec ca neuocqotac queda lquesaxanaxa na hualoxonyipi.
14¡Ỹaatqajam lochi'n ca na'xa'o' na' ñi'qaañi!
¡Quecajo na'xa'a co'na' aca ỹate'e ne'qaañi nqai'en aỹim
se qano'ueenaxat ca na'qaatec qaillilec ca'maxare!
15¡Ỹaatqajam lochi'n cá'maq ỹo'ueeto' quiyim netoon na'le ca ita'a
na' ỹa'ue da la'xaỹaxac quiyim 'ue ca llaalec ỹale ne'qaañi!
16¡Saxanchi' cajo ỹale 'nejem nqohin na na'aateripi leta'allipi
quiyim ñi qota'olec lqodoc nqai'en nopoxoỹaxajñi!
¡Chaqai quiyim cajo ỹale 'qaataque quiyi nete'eta da naualaxac quena nqui'ic,
chaqai 'qaataque na lauataq quiyi na'xa'a lavinñi,
17ma' ñi qota'olec se ỹo'uet quiyim yileuaugui na lauel aso ỹate'e!
Ca' chaqaso quet asó'maq 'ec napal lahi' caỹim,
ca' ỹim sqaica ma' ñi'qaañi quet.
18¿Chi'neco' ma' ñinoxonec quena lauel aso ỹate'e?
¿Peeta'a qaidaata seuana da nqui'ic chaqai da ne'xoric,
chaqai quiyim ime da ñachaalataxac,
ca' shiqueta'ñi' da ỹayiloxo?
(21.1—22.12 So Jeremías ỹa'xat da la'qaatec ñi qara'gaxala' dá'maq 'neeta ma'le ca nouaxanaxaset chaqai quiyim qanomachichiguiñi. Ñi qara'gaxala' ỹa'ue ma'le ca nouaxanaxaset ná'ogue na ỹoreta'oguit qomyipi.)
