Jeremías 18

₁Ñi qara'gaxala' ỹalamaxachichigui aỹim, ca 'naapiguiỹa': ₂Quirepegue' yi la'a' ñi 'laua lo'o, ca' quiyi, ca' sa'ue ca ỹa'qaatec ma'le.

₃Ca' ỹim Jeremías, na' sovita quiyi la'a', ca' seuanejlec so 'laua lo'o ro'ueenataxantac, ỹo'ueetetac so nishaaxa queso lo'xonaxanaxala'. ₄Ca quena' só'maq ỹo'ueetetac se ỹa'maxañi, ca ỹovigoxota', ca lotqai liỹa ỹo'uet, vire'ta quena' ỹa'maxañi só'maq no'ueenataxac ỹahotaque.

₅Ca' ñi qara'gaxala' 'naac caỹim: ₆¿Peeta'a 'ñiitapego' se seshit shine'tegue dajo caqamiri Israel llaalqaipi dá'maq 'ne'tegue ñi 'laua lo'o quena nishaaxa? Ca' da 'neetari' ca nishaaxa quenaua napoquenal ñi 'laua lo'o, ca' chaqaida 'ñiitari' quenaua ñapoquenal. Ỹim na'gaxala' se'taxajñi dajo ỹa'qaatec. ₇Quiyim 'ue ca na'xa'a ỹim so'uet quiyim ñapoc, se'guenaxajñi chaqai ñopoxoỹaxajñi ca qomyipi loqo'm ca loiquenatec ca nashi. ₈Qam cajo qomyipi, no'm ỹaxanñi da ỹo'ueetetac se no'uen, ca' se selata ca nouaxanaxaset sa'maxatetañi. ₉Ime, ca lotqai 'ue ca liỹa na'xa'a quiyim so'uet quiyim ño'xonshiguim chaqai ñqo'naxatec ca qomyipi loqo'm ca loiquenatec ca nashi. ₁₀Qam cajo qomyipi, no'm ỹo'uet ca se no'uen chaqai se na'xaỹaxanalo naua ỹaqataxaco, ca' tot selata na ỹoqouagaxa sa'maxatetañi.

₁₁Ca' 'ñirapega na qomyipi quena 'laua Judá chaqai na neeta'ñi na Jerusalén quiyim ỹim na'gaxala' shinac dajo: Sahotaque ca la'maqa' quiyim ñpa'guento qamiri; sahotaque so'uet ca nouaxanaxashichii. Chaqa'ma' 'xañiñi da se no'uen ra'deenataxanaxaguii; ca no'ueenaxachii da 'ñiitari' chaqai da ro'ueenataxanaxaguii. ₁₂Na qomyipi ishit 'naapega qami' ma'le: ¡Qaica quet cá'maq 'neeta quiyim taqai'sac! Qomi' sapacqajanqauec dá'maq qomi' qarqo'ta, qolqatalec dá'maq se no'uen taata'gue añi qare'taxanata.