Santiago 5

₁¡Qamiri nesallaxanqaipi, ñaq na'xaỹaxañiỹa da ỹa'qaatec! Nohiñii chaqai naualaxaiñii quedá'maq naata'alo qamiri chalego lecaic re'xoriguii. ₂Da resallaxahi mashic rocala, chaqai naua qatoohi lo'yaxanqa mashic qaichigue' cana lase. ₃Ana qadamii oro chaqai plata mashic iterañi, ca' chaqaida dá'maq leteraxa ichoxot ma'le da rasauaxashichii, chaqaina ná'maq na'laxatañi ma'le na roshicmaxahi, 'neetari' ca norec. Ma' lapooñitañi na resallaxahi quenaua pa'aaterec na'xata' seuqatauguilo. ₄Añí'maq rishiuetenaxanqachii se ipaguigui nqai'ñii quena qomyipi quená'maq ro'ueenataxantac naqatetac na la na qadañicshiguii, chaqañi añí'maq ro'laxanta'pegue' caqamiri. Ca' ñi qota'a ma' la'gaxala' ná'ogue na piguim laseripi, ca ñi'maxare 'qaatapega da laualaxac na 'ueenataxanaxairipi. ₅Nagui quiyim ñaq co'viitalecna, ca' ỹaatqajam nañaañiguit ná'maq 'xoic lemaqachic chaqai na nqo'itaxanqachic. Nochaxarachichitac, 'ñiitari' aca nalauata huaca, qam nagui mashic ỹovita yi na'xa'a nalauataxaqui. ₆Na' qamiri pataxailec quiyim 'viichii ca lasauaxaset ca qom qaica ca lasauaxaset, chaqai lauachii, qam chi nemanachi'chiguita qamiri na'maxare.

₇Vichiguiño' qamiri ỹaqaỹa', ỹaatqajam coñiỹa da neualaxauenaxaguii quiyim nauaañitaque ca loviraxac so qara'gaxala' Jesús. Ma' ca no'ueenaxasec quiyim ỹahotaque ỹacoñiguit ca loyac ca laỹaxac ca lanecsec, ca ỹaatqajam 'ue da leualaxavic, nauaanta'alo caua loviraxaqui' naua ỹaaqate'. ₈Ca' coñiỹa da reualaxaviguii qamiri qai'neeta, se reualliñi, ma' da loviraxac quiyim rapil so qara'gaxala' tot qoỹoqaque. ₉Caqamiri ỹaqaỹarolqa, 'neeto' 'ue ca queeteguelec ca liỹa caqamiri, qaiyi qaica ca qaỹa'ue ca lasauaxaset. Ma' ñi qota'a ñí'maq imit ma'le na nasauaxaseteripi, tot qaỹaloq novi'. ₁₀Qamiri ỹaqaỹa', coñiỹa quiyim denaxachiichigui da le'xoric chaqai da leualaxavic so la'qaataxanqajanqaipi ñi qota'a na' qailarelec quiñi'maxare quiyim ỹa'xat da na'qaatec. ₁₁Ma' qomi' sa'deenqata quiyim ỹaatqajam chalego la'maxa queca qom, ma' ca'laxatauec ca ne'guenaxac. Qamiri mashic 'xahitapega da 'neeto' da leualaxavic so Job, chaqai mashic 'yiiñii dá'maq 'ne'teco' ñi qara'gaxala' queso'maxare co'na' ca'laxatauec da ne'guenaxac, ma' ñi'maxare ỹaatqajam huagaxaraic chaqai 'xorenataxanaxai.

₁₂Qam quená'ogue najo, qamiri ỹaqaỹa', 'neeto' quiyim 'ue ca ỹaanec da la'qaatec quiyim chicqo'ot na piguim ca nouaxanaxaset, loqo'm quena 'laua, loqo'm quecanchaqaica liỹa, quiyim 'ue ca ỹa'xat. Ta'ta'a quiyim saachii ca 'oonoqui' ca rasaataxaguii. No'm 'ñiỹac “Ajá'a”, ca' chaqaida nqai'ñii. Chaqai no'm 'ñiỹac “'E'”, ca' chaqaida nqai'ñii, qaiyi se ỹo'uet ca rasauaxashichii ñi qota'a.

₁₃No'm 'ue ca 'óna caqamiri no'm 'ue ca nauateta'piguit, ca' nqouagaxain. Chaqai no'm ỹa'maqachiguiñi, ca ro'ueenaxantac, imaqachintac ñi qota'a. ₁₄Chaqai no'm 'ue ca ralola, ca' qaroỹaxana na la'gaxalateripi ná'maq mashic icoñiguit da na'qaatec quiyim nqouagaxainlec chaqai qaỹa'men quena aceite, qaỹouen da leenaxat so qara'gaxala' Jesús. ₁₅Ca no'm ỹaatqajam 'ue da lpi'ỹaxac ma' nqouagaxain, ca' da nqouagaxainaxac ỹomatec ca ralolaxaic, ca' ñi qara'gaxala' nachaalataxanñi. Chaqai no'm 'ue ca lasauaxaset ca'maxare, ca' qaỹapalaxat. ₁₆Ca' vichiguiño' queca 'óna caqamiri ra'qaataxanem ca liỹa queca lasauaxaset, chaqai quiñi 'óna nqouagaxaintalec ca liỹa, qaiyi qaỹomaterec qamiri. Da nqouagaxainaxac ca huagaxaraic ỹale ỹaatqajam 'xoic lquesaxanaxa. ₁₇So la'qaataxanqajnec ñi qota'a, leenaxat Elías, so'maxare qom 'neete'm qomi'. Qam na' nqouagaxain, ỹashiila ñi qota'a quiyim le'en ca ỹaxat, ca' qaica ca ỹaxat queuguilo saua tres ñaxari chaqai seis shiriguiri. ₁₈Ca' ime, ca lotqai liỹa nqouagaxain, ca lotqai liỹa 'ue ca ỹaxat, ca ná'maq ñaxajlec na 'laua, ca lotqai 'ue ana la.

₁₉Qamiri ỹaqaỹarolqa, no'm 'ue ca 'óna caqamiri ỹo'maauec quedá'maq lliqueta leloxoỹaxac, qam ca liỹa rapilo nqai'en, ₂₀ca ỹaatqajam 'yiiñita quiyim quecanchaqaica rapilo nqai'en ca sauaqhuaic queca se no'uen llicyaxac, ca'maxare nca'laxatec queda lelauaxa ca sauaqhuaic, chaqai ỹo'uet quiyim 'xoic ca qaỹapalaxat nasauaxaseteripi.