Isaías 35

₁Qaiyi 'ue ca naỹaac quiyi 'laua qaica qom yí'maq 'laua rashivijlec;

ca no'xagui ma'le quena naỹaac, ca' renohi,

₂ca 'ue ana lenoỹaxai 'nejem ana peue lirio,

no'xagui ma'le queda toonaxac chaqai da naỹaac.

Ñi qota'olec chalego loyac nqai'en 'nejem ma'le yi 'laua Líbano,

chalego lo'ualaxa ma'le 'nejem yi quemarelec Carmelo chaqai yi ca'megue Sarón.

Ná'ogue iuana ma'le da lauaq ñi qara'gaxala',

da lecaic quiyim nashi ñi qota'olec coqomi'.

₃'Ñaxachii na lauaiquipi

chaqai na soochaxaiquipi,

₄'ñiỹapega na se ra'ñiigui lauel:

“¡Na'ñaxachii, totaxan ro'chii!

¡Najo hueete'e ñi qota'olec caqamiri, ñi'maxare rca'laxachiuec ma'le,

ỹomachichigui ma'le ca nouaxanaxac na npa'guenaxauahiripi!”

₅Ma'le, ca' na qai'laqaipi neuanñi

chaqai na ra'ñaagui na lqahic 'qaa;

₆ca' na se ra'ñiiguelo naua lichil nenojshiguim 'ec ca re'xone',

chaqai na qaicaua caua la'qaatqa, ca ỹaualaq.

Quiyi rashivijlec 'laua qaica qom,

ca' ne'paxantashiguim ma'le ca quesaxan huaxaỹaq.

₇Yi 'laua qaica qom, ñigui latogot ma'le,

yi 'laua rashivijlec, ne'paxantashiguim ma'le ca huaxaỹaq.

Yí'maq nagui hua'ñi ana nouaxaỹaxa,

ñaxat ma'le ana qañic chaqai ana na'uaate.

₈Chaqai yí hua'ñi ma'le ca ñicta,

ca' qoỹanegue nayic 'xoic lichic.

Ná'maq saqa' nco'chiñi da nachaalataxac, ca se ishit quegue ma'le;

chaqai ná'maq qaica ca ỹa'den, se ishit quegue ma'le ca'maxare.

₉Quiyi ma'le, ca' qaica ca sauaxaic leta'a,

chaqai na toxonaxairipi qoỹoqote'oga.

Quecajo nayic pilegue ma'le ná'maq mashic qaỹosouec,

₁₀ná'maq ñi qara'gaxala' mashic naqatec quiyim na'ac;

ro'ueenaxanta'pegue' ma' inoxono quiyi Sión queda netoonaxac,

chaqai queda nachaalataxac se neme da laỹaac.

Ỹanata da la'maxa chaqai da loyac

chaqai palac ma'le da ỹenaxac chaqai da nqui'ic.