Hebreos 13

₁Quiñi 'óna sqai ỹaxanñi quiyim i'xoren ca liỹa 'neeta'gue ca ỹaatqajam lalamaxaret lqaỹa. ₂'Neeto' lotqai 'ue ca coua'e quiyim quelolqachaqaic quecá'maq qaỹovira'a ca la'a', ma' chaqaida dá'maq chicqochigui nallaaqo' quiyim 'uo' quen na se ỹa'den quiyim ỹa'ue ca loma' la'qaañi nqai'en ca nelaatec piguim le'ec.

₃Chaqai 'neeto' couahi'e na ncoñiitecseripi, 'ñiita'gue quiyim 'ec ncoñiitaxauahi. 'Yiiñitapega ná'maq se qaỹa'maxata'gue, ma' qamiri qai'neeta 'ue na roshicmaxahi ishit ỹovirau'a ca le'xoric.

₄Chaqai quiyim ná'ogue se napacalec da leloxoỹaxac ca nouaỹaxac. Quiitalec quiyim 'maxachii'tegue dá'maq 'neeta ca nouaỹaxac. Ma' ñi qota'a ỹa'ue ma'le ca nouaxanaxaset na nedequenaxaiquipi chaqai ná'maq ỹadalaxat aca loua.

₅Chaqai 'neeto' pacqajñiỹauec aca plata; ta'ta'a quiyim netooñita'gue cá'maq 'ue caqamiri. Ma' ñi qota'a 'naaco' quen: “Se iuanapega quiyim ñoỹootec caqami', chaqai se salachi'sac.” ₆Ca' vichiguiño' se qaro'chaalec quiyim shinqac:

₇Se couahi'e ná'maq ra'gaxalaripi ná'maq shi'gue ỹa'xatema qamiri da la'qaatec ñi qota'a; 'yiiñitapega dá'maq chicqochigui da nachaalataxac chaqai denaxachiichigui dá'maq 'neeta da lpi'ỹaxac.

₈So Jesucristo se nadalaxat, sqaica lqodoc quiyim chaqaidaata 'neetari'. ₉'Neeto' quiita'pegue' na ỹoreta'oguit se qaiuanapega napaxaguinataxanaxaquipi. Paguec la'maxa quiyim añi qare'taxanata icoñiguit da lquesaxanaxa chicqochigui da le'xorenataxanaxa ñi qota'a, mesqai da llicyaxac ca na'ic; ma' nauajo llicyaxaco na na'ic se iuanapega quiyim ỹa'maxajñi quet ná'maq queetalgoto naua'maxare.

₁₀Ma' coqomi' 'ue qam ỹoqa'a aso qarcopatoxonaxalate só'maq se ishit quiyim qanaqata'a ca lahi na nachitaxanataxanqateripi queso letaxaỹaxanqajanqaipi na qomyipi quiyim retaxaỹa'pegue' ñi qota'a quená'maq reloqota'a ñi ñauapec lauo' ñi qota'a. ₁₁Ma' só'maq lashi na letaxaỹaxanqajanqaipi na judioipi, ma' so'maxare ỹodouo na leuo' na iseripi quesó'maq noma' sqaica ca ishit ỹovira'a quená'maq nachitaxanataxanaxat, qaiyi qanaqat na nasauaxaseteripi. Qam na la'at na iseripi, quiyim qaỹavigaxat, ca' qaỹodouec queca qoỹoqote'oga queca qoyinta'ñi. ₁₂Ma' qai'neeto' na'le so Jesús co'na' qaỹalauat pa'aatauec quiyi na'a' lodegaxat Jerusalén, qaiyi ishit quiỹouec na lasauaxaset na qomyipi, quiỹoxonalo sauá'maq chi leuo'. ₁₃Ca vichiguiño' ñqo'naxe'oga so Jesús hueeta'oga yi qoỹoqote'oga quiyi qoyinta'ñi, ca' qare'xoyaxaua quiyim se qaỹa'maxata'gue, shinqatam dá'maq le'xoric so'maxare. ₁₄Ma' quenajo 'laua seuqatalec qaica quet cá'maq ỹaatqajam qara'a' quiyim sqaica lqodoc, ta'ta'a quiyim sedaanqataque ca qara'a' naỹa'quena ma'le. ₁₅Vichiguiño' se qareme quiyim semaqachinqatac ñi qota'a, chicqochigui nqaishinaq so Jesucristo. Ca' dajo quiyim semaqachinqatac ñi qota'a, ca chaqaida dá'maq 'ec qarachitaxanataxanqate saanqatacot ñi'maxare. ¡Semaqachinqatac ñi'maxare, sahoqota'ahi naua qara'qaatqa! ₁₆Chaqai se couahi'e quiyim 'viichitac cá'maq ỹa'maqachiguiñi, chaqai quiyim nouañii'te' cá'maq riỹahi quecá'maq 'ue caqamii, ma' dajo nachitaxanataxanaxac chaqaida dá'maq ỹa'maxarenta ñi qota'a.

₁₇Ỹaatqajam na'xaỹaxañitalo naua ra'gaxalachiri, chaqai nañaañiỹoto naua'maxare; ma' chaqainaua nauá'maq reloqota'alo da nachaalataxaguii, chaqai chaqainaua nauá'maq 'ue ca na'xa'a, ca' qainate' quiñi qota'a. Nquipichiỹa'pegue' quiyim 'maxaraic da lo'ueenataxanaxac chaqai se resallii, ma' no'm sqai 'neeta dajo, ca' qaica quet cá'maq 'ñiigue qamiri.

₁₈Nqouagaxaiñitalgoto qomi', ma' qomi' qaica quet cá'maq huapigui qouel, ma' sahoqotaque quiyim ña'maxatqata quená'ogue. ₁₉Ca ỹaatqajam souen ca nqouagaxainaxaguii, qaiyi ñi qota'a ỹo'uet quiyim sqaỹaloq liỹa salequetauguilo qamiri.

₂₀Ca' ñi qota'a ñí'maq ỹo'uet da na'maxa, ñí'maq liỹa nca'laxatec queso lelauaxa so qara'gaxala' Jesucristo, só'maq ỹapacauec la'gaxala' ana qagreta, ma' quesaua leuo' ca' i'taxajñi dá'maq 'maqataxac sqaica lqodoc, ₂₁ca ñi'maxare ỹaatqajam naloqojonchiriñi qamiri, chaqai no'ueenaxat da no'ueenataxaguii quená'ogue, qaiyi 'viichii cá'maq ỹahotaque, chaqai quiyim ỹo'uet ñi'maxare coqomi' cá'ogue cá'maq ỹahotaque, chicqochigui nqai'en so Jesucristo. ¡Ca' se neme qaimaqachintac so Cristo! Ajá'a, ca' chaqaida 'neeta dajo.

₂₂Qamiri ỹaqaỹa', ñi'xoresentouguilo qamiri quiyim na'ñaxachiiguit da ỹaqataxac caqamiri, ma' sqo vito'olqai' naua ỹa'qaatqa shichiñi selatalo qamiri. ₂₃Ca' sa'qaataxanema qamiri quiyim so qarqaỹa Timoteo mashic shi'gue qaỹosouec. Ca no'm sqaỹaloq novi' quenajo, ca' iỹaatac ma' shicpegueto qamiri.

₂₄Iquinaxanaxac ma'le quecaua'que caua ra'gaxalachiri, chaqai ná'ogue na qarqaỹaripi quená'maq mashic icoñiguit da na'qaatec. Ná'maq chicqa'gue da Italia ila' da liquinaxanaxac caqamiri.

₂₅Ca' ñi qota'a ỹaanema qamiri cá'maq no'uen qayicyaxaguii. Ajá'a, ca' chaqaida 'neeta dajo.