Génesis 7

₁Ca co'na' ime, ca ñi qara'gaxala' 'naaco' queso Noé:

—Quená'ogue na qomyipi quená'maq hueetauguilo nauajo ñaxari ỹaatqajam qaqamite' 'viichi'sac dá'maq sahotaque. Ca vichiguiño' noxoñirougui añi rahichi' naỹoxontashiguim riỹa'isaho naua qachaalaxahi'. ₂Coñire'ogalo caua siete louaari chaqai aca siete 'aalo quená'maq iseripi ishit qaỹa'ic, qam 'oonoqui' ca ỹale chaqai 'oono'lli' aca 'aalo quená'maq se qaỹa'ic. ₃Chaqai coñireu'alo caua siete 'aalo chaqai ỹale' quená'ogue ná'maq lashic na ỹoipi, qaiyi qaica ca na'laañi quena'maxare quena 'laua. ₄Ma' ime'ueque nauajo siete na'xata', ca' so'uet ca ỹaxat ỹoviraxaterauec naua cuarenta na'xata' chaqai naua cuarenta piri. Ca' ¡sapalaxat ma'le quena 'laua ná'ogue ná'maq ỹo'ueenatec 'ue na lacat!

₅Ca' so Noé ỹo'uet ná'ogue ná'maq qailarelec quiñi qara'gaxala'.

₆Ca so Noé co'na' ỹovite' saua seiscientos ñaxari, na' so ỹaxat i'paxanleco' nqai'en na'le na 'laua. ₇Ca' so Noé inoxono caso lahi' naỹoxontashiguim liỹaresaho saua llaalqa, chaqai aso loua chaqai saua latel, 'eetera'piguit so ỹaxat. ₈Ca' na iseripi quená'maq qaỹa'ic chaqai quená'maq se qaỹa'ic, ná'maq ỹootegueri' chaqai ná'maq nqai'queetegueri', ₉liỹaresaho so Noé na' inoxono caso lahi' dooseta'pe, ỹale chaqai ana 'aalo. Ca ipaquichigui dá'maq lelaataxanaxac ñi qota'olec.

₁₀Ca co'na' ime' saua siete na'xata', ca' nac so ỹaxat i'paxanlec nqai'en na 'laua. ₁₁Co'na' ime so 'auaxaic shiraigo quesaua diecisiete na'xata' queso liỹa shiraigo. Ca' chaqaiso' sojo na'xa'a viichiquio' na' so Noé ỹovite' saua seiscientos ñaxari, na' nachipishiguim na huaxaỹaq pa'aañi, chaqai nauachigui qai'neeta na piguim. ₁₂Ca' queuguilo saua cuarenta na'xata' chaqai cuarenta piri quiyim naquetac so ỹaxat quena 'laua. ₁₃Ca chaqaiso' sojo na'xa'a co'na' so Noé inoxonougui aso lahi', liỹaresaho saua llaalqa Sem, Cam chaqai so Jafet, chaqai aso loua chaqai saua tres latel. ₁₄Liỹaresaho' ná'ogue nanchaqaina iseripi neuec, chaqai na nelo, chaqai ná'ogue nanchaqaina lashic na isecỹac nqai'queetajlec, chaqai na ỹo. ₁₅Quená'ogue na isecỹac dooseta'pe, liỹaresaho so Noé na' inoxono caso lahi' naỹoxontashiguim. ₁₆'Óna ỹale chaqai 'óna 'aalo quená'ogue na lashic na iseripi inoxono. Ca ipaquichigui dá'maq 'naaco' na'le ñi qota'olec queso Noé. Co'na' ime, ca ñi'maxare ỹapogui so lasom.

₁₇Ca' ỹoviraxaterauec saua cuarenta na'xata' quiyim naquetac so ỹaxat. Ca co'na' nqo'ñishiguim so huaxaỹaq, ca' aso nahi' naỹoxonshiguim, ca chi ỹaỹoxontegueri'. ₁₈Ca' so huaxaỹaq lama'xa nqo'neetashiguim, qam aso nahi' queeta quiyim naỹoxontashiguim. ₁₉Ca' so huaxaỹaq chi nqo'neetashiguim, vire'to' na' ỹapolec ná'maq paguec lishicshi'megue qa' quena 'laua. ₂₀Ca co'na' ỹapolec ná'ogue aná'maq paguec lishicshi'megue qa', qam qaiyiita liỹa nqo'ñishiguim siete metros liỹa. ₂₁Co'na'le, ca' ileu ná'ogue na qom quena 'laua, chaqai na ỹoipi, chaqai na neloipi, chaqai na neuec iseripi, chaqai ná'maq nqai'queetegueri' quena 'laua. ₂₂Ca' ileu ná'ogue ná'maq hueetalec na 'laua quená'maq 'ue da lca'laxa chaqai ná'maq ishit nacategaxan, ná'ogue ileu. ₂₃Qaisauate' saua Noé chaqai sauá'maq neesaugui aso nahi' nca'lerec. Ca sá'ogue so liỹaripi qaỹapalaxat: so qomyipi, na nelo iseripi, chaqai na ỹoipi, chaqai na iseripi nqai'queetegueri', ₂₄ma' na 'laua i'paxanejlco' na'le quesaua ciento cincuenta na'xata'.