Aso ne'taxaqui so José
1Co'na' ime dajo, ca' so José 'naapega so neloxoỹaq quiyi la'a':
—Ỹoqoiriguilo naua lloxoqui' nauajo ỹale' quecá'ogue cá'maq trigo ishite' i'xate', chaqai aca lame' lli'rañiguilo naua laapi' naua lloxoqui'. 2Chaqai lli'rañigui qai'neeta aca ñi'taxaqui plata aca lloxoqui ñí'maq lqaỹa' paguec noctoqui', liỹaatac aca lam lishiuetenaxanqate quena trigo.
Ca' so neloxoỹaq ỹo'uet dá'maq qohinapega queso José. 3Ca co'na' richilecna, ca' so José ỹaxandec quiyim que' saua lqaỹa' chaqai saua laloo 'ashiñi'. 4Ca saqa' ỹoxe'ueque quiyi na'a' co'na' so José 'naapega so neloxoỹaq quiyi la'a':
—Mo'e', cuañira'pe saua ỹale'. Ca ma' vichi', ca 'ñiraco': ¿Chi'negue ma' dá'maq no'uen pilaxachiguit quecá'maq se no'uen? ¿Chi'negue ma' cuachiỹa aca 'taxaqui plata?, 5só'maq ỹaatqajam ne'taxaqui ñi ña'co', chaqai louena quena' ỹahotaque ra'iuec canchaqaica. ¡Qamiri ỹaatqajam se ỹa'maxañi dá'maq 'ñii'tegue!
6Qam co'na' qaỹoviralgoto queso nelaatec, ca liỹa ỹa'xat dá'maq qohinapega. 7Ca saua'maxare 'neraco':
—¿Chi'negue ma' 'ñirac dajo coqomi'? ¡Qomi' qaica ma' so'ueetaq quet dajo! 8Ma' qomi' sachigoxosqota'gue da Canaán, yapilaxataq aca qodam seuanqajlec quena laapi' naua qochoxoqui'. Ca ¿chi'negue queta' socachaxa quet ca plata chaqai ca ne'óro quiyi la'a' ñi na'coochi'? 9Ca no'uen quiyim qaỹalauat canchaqaica quenauajo relaataxahi' quecá'maq qaiuanalec hueeto'ot cajo 'taxaqui, vire'talo qomi' qai'neeta qomi' relaataxahi' ma'le.
10Ca' só'maq neloxoỹaq quiyi na'a' 'naaco':
—Hua', ca chaqaida dá'maq 'ñiỹac qohine'tegue ma'le. Qam qaicaata cá'maq hueeto'ot aca 'taxaqui, ca' chaqaica ỹa'ac ma'le. Ca ná'maq liỹaripi, ca' qaica ca lasauaxaset.
11Ca chaqa'ma' quiñi 'óna naqajñi aca lloxoqui quena 'laua. Ca' qaỹauajñigui. 12Ca só'maq nelaatec idaanaque caca lloxoqui quiñi 'óna, ỹa'auaxanta só'maq paguec ỹi, chi ỹovireta'a só'maq paguec na'aasa. Ca ỹanata aso 'taxaqui caso lloxoqui so Benjamín. 13Ca saua'maxare quiñi 'óna nasectaqta'ahi naua loho paguec nqui'ic. Ca na' ime, ca quiñi 'óna inaxashiguim ca li'ỹaac queca lalo 'ashin, ca pilda'a yi na'a'. 14Ca co'na' so Judá chaqai saua lqaỹa' ỹovirera'a yi la'a' so José, ca so'maxare ñaqai neeta'anyi. Ca ỹa'chi'iñi naua le'cootal, ỹoviraqtera'guit naua lataapi' na 'laua. 15Ca' so José 'naaco' quesaua'maxare:
—¿Negue' cá'maq 'neeto' dá'maq 'viichii? ¿Sqa 'yiiñiỹo' queca ỹale 'nejem aỹim ỹa'den quiyim 'ec ra'ỹaauec ca liỹa?
16Ca' so Judá 'naaco':
—¿Negue' queto' cá'maq shinqac caqami'? ¿Negue' queto' ca se'guenaxague? Ma' ñi qota'olec mashic ỹauajlec da qarasauaxaset. Ca' nagui ñañaanaq quiyim qomi' relaataxahi', qariỹaataho dá'maq hueeto'ot aso ne'taxagui'i'.
17Qam so José 'naaco':
—'E', qaidaata dá'maq hueeto'ot aso ñi'taxaqui no'ueenañi, ca ỹa'ac. Ca na liỹaripi, ca pil queca la'a' ca leta'a. Qaica cá'maq quepaxat.
So Judá ne'xoresene'tot so José queso Benjamín
18Co'na'le, ca' so Judá nqo'not so José, ca 'naaco':
—Ỹim ñi'xoresene'tot, qami' qara'gaxala', quiyim 'maxariñi' 'ue ca sa'xat caqami' ñimoote'tot. Qam qouaquiric, sqai 'o'iriua', ma' qami' chaqai 'ec 'ñiisari' ñí'maq Faraón. 19Qami' na'le qarenachi' quiyim 'ue ca qareta'a, loqo'm ca liỹa qarqaỹa. 20Ca qomi' shinqac quiyim 'ue ca qareta'a, qam mashic qo'xoỹom, chaqai 'ue ca qarqaỹa ñaqai noctoqui'. Ca'maxare ne'qaañi na' mashic qo'xoic ñi qareta'a. Chaqai qai'neeta shinqac ñi qareta'a ỹaatqajam lauochaxat, ma' qaiñiita no'ueeno'ot cá'ogue acá'maq late'e', ma' cá'maq liỹa lqaỹa ileu. 21Ca na'le, ca' qarashiila'e' quiyim ñauegaq, ma' vi'saque huañita. 22Ca qomi' shinqac na'le quiyim ñi ne'nec se ishit ca'e ñi leta'a, ma' no'm ca'e, ca' ileu ñí'maq leta'a. 23Qam qami' 'ñirac quiyim se ñauegaq, ca totqai daañichiguita qomi'.
24Ca na' sovitaxa ca qareta'a, ca sa'qaataxanaxa quedá'ogue dá'maq 'ñirac na'le coqomi'. 25Ca' na'le ca qarela' ñi qareta'a quiyim ñanaxaquena, liỹa seshiujnaxanqaque na trigo. 26Qam qomi' shinqac quiyim se seshitaq ñanaguinaq, no'm se qariỹaatac ñi qarqaỹa na'aasa. Ma' no'm sqai eec ñi'maxare, ca' se ñiuanaxa'e' qami'. 27Ca' ñi qareta'a 'naac coqomi': Qamiri 'yiiñita quiyim doosolqai' naua ỹaalqa caso ỹoua. 28So 'óna mashic shi'gue ỹoxogue, ca' chaqaica vigui, ca' tot seuana. Ỹaatqajam llic quiyim 'uo' ca isecỹac ito. 29Ca no'm 'xachii ñi liỹa ỹaalec quenajo, ca 'ue ca lo'maxaset, ca' qamiri rasauaxashichii quiyim najo qo'xoicolec ileu, ỹalauat ca lachicoxo.
30Ca' da nachaalataxac ñi qareta'a ỹaatqajam na'deeta'guit da nachaalataxac ñi ne'nec. Ca' ñi ne'nec no'm sqa riỹaatac ma' soviraq, 31ca' ca qareta'a ileu ma' se iuana. Ca' qomi' qarasauaxaset quiyim ñi qo'xoỹom qareta'a ileu, ỹalauat ca lachicoxo. 32Ỹim shinac na'le queca qareta'a quiyim ỹim seloqota'a ñi ne'nec. Chaqai qai'neeta shinac: No'm se yapilaxat da'maxare quenajo, ca ỹasauaxaset nqai'ñi'. Qam cajo ỹasauaxaset sqaica ca lqodoc, chi ỹovireta'a ca lqodoc aca ỹaqauaxaqui. 33Vichiguiño' ñi'xoresene'tot qami' quiyim ỹim yo'ueenañi, ỹim ra'aqui', ñigui aỹim ñí'maq ne'nec. Ca ñi'maxare 'xañirec quiyim pil, liỹareta'pe yaua lqaỹa'. 34Ma' ¿negue' quet cá'maq 'neeta quiyim sopil, sopila ca ita'a, no'm se iỹaatac dá'maq ne'nec? Se sa'maxaren quiyim seuantalec ca le'xoric ca ita'a.
