Ñi qota'olec ỹaanem da lqouagaxa so Jacob quiyi Betel
1Ñi qota'olec 'naaco' na'le queso Jacob:
—Ne'laxachirishiguim, ca' qui', ca ñira'ño' ma'le yi Betel. Ca' quiyi ma'le, ca' no'xoñirishiguim aca ncopatoxonaxalate quiyim ỹovita nqouagaxaiñitot ñi qota'olec ñí'maq nauanchiguit na' 'iichisa'piguit ca rqaỹa'e' Esaú. 2Co'na'le, ca 'naaco' so Jacob queso llaalqaipi chaqai quesá'ogue so liỹaripi:
—Naqachiuec ná'ogue na nqolaqaipi hueeto'oto qamiri. Nachillii, chaqai dalaxachii' naua qatoohi. 3Se ñaỹaloxonaq quiyim saxague da Betel, ma' queda ma'le, ca' so'uet aca icopatoxonaxalate quiyim ñqouagaxainot ñi qota'olec ñí'maq yotauan na' yiuocqotac chaqai ycoỹaretegueñi quecá'maq seueta'gue.
4Ca' so qomyipi ỹaanem so Jacob sá'ogue so lqolaqaipi chaqai so nishitellipi. Ca' so Jacob ishiñi'ñot aso qo'paq leenaxat encina na'ñi yi sqoỹoqaque quiyi Siquem. 5Ca co'na' eec sá'ogue so lauo' so Jacob, ca' ñi qota'olec ỹo'uet quiyim 'xoic da lqolonaxa sá'ogue so lauoraripi sqoỹoqaque quiyi'maxare. Vichiguiño' se qaỹocan so llaalqaipi so Jacob.
6Ca' so Jacob chaqai sá'ogue so nalliripi liỹaatac ỹovijta yi Luz, yí'maq na'a' qai'neeta leenaxat Betel, huaugui yi 'laua Canaán. 7Ca na'le, ca' ỹo'uet aca lcopatoxonaxalate quiyim nqouagaxain. Ime, ca' ỹanegue sojo 'laua leenaxat El-Betel, loqo'm la'a' yí ñi qota'olec. Ma' na' 'eetapeguem so lqaỹa, ca' qanachaxano' na'le quiñi qota'olec quiyi'maxare. 8Chaqai qai'neeta hua'ño' yi na'le na' ileu aso Débora; sojo 'aalo reloqoto'o' quen na'le aso Rebeca. Ca' qaishiñi'ñoto' na'le aca qo'paq leenaxat encina quiyi sqoỹoqaque yi Betel. Ca' so Jacob ỹanco' leenaxat yijo 'laua Ada encina hua'ñi yi oỹenqa'.
9Ca co'na' so Jacob chicqota'gue da Padan-aram, ca' lotqai qanachaxana quiñi qota'olec. Ca' ỹaanem da no'uen llicyaxac, 10'naaco':
Qami' qadeenaxachi' Jacob,
qam nagui, ca' tot qadeenaxachi' da'maxare;
ca' nagui, ca' qadeenaxachi'o' Israel.
Ca' co'na' ime qaỹadalaxat da leenaxat so'maxare quiñi qota'olec, 11ca 'naaco' queso'maxare:
Ỹim ná'maq ỹim qota'olec sqaica lqalanec;
'xoic ma'le ca qachaalaxai'pi chaqai ca qauachi'ipi.
Qami' chicqochigui ma'le ca 'xoic ỹoreta'oguit qomyipi,
ca' queca qachaalaxai'pi 'ue ma'le ca chicqaugui nashillipi.
12Chaqai na 'laua saanem na'le so Abraham chaqai so Isaac,
qai'neeta saanem qami' ma'le,
ca ma' imeuo qami', ca lotqai saanem na qachaalaxai'pi.
13Ca co'na' ñi qota'olec ca'e yí'maq hua'ño' na' retaqata'pegue' so Jacob. 14Ca so'maxare icono' so qa', ca ỹalamaxajñi, letanec quiyí'maq hua'ño' na' retaqata'pegue' ñi qota'olec. Ca co'na' ime, ca' so'maxare ỹocorelec queso aceite chaqai so lataxa. 15Ca' sojo 'laua ỹanegue leenaxat Betel, loqo'm qota'olec la'a'.
Dá'maq 'neeto' da lelauaxa aso Raquel
16Ca co'na' ime, ca' quere'e yi Betel, qam ñaqai ỹoxauc yi Efrata co'na' aso Raquel co'o, qam 'xoico' lqalaic so lco'oxoc. 17Qam co'na' tot qaica ca la'maqa', ca' aso ncochaaqoro 'naaco':
—Qaica huapigui qavilli', totaxan ro'chi'i', ma' ỹale yí'maq dalaxaic qachaalqui'.
18Qam aso'maxare mashic ileuetac, ca' quesó'maq co'uaataxanta lacatoqui', ca ỹanco' Benoni, llaalec da i'xoric, só'maq llaalec, 'eno'm só'maq leta'a ỹanco' leenaxat Benjamín, loqo'm ỹoic llaalec.
19Ca' chaqaido' da 'neeta co'na' ileu aso Raquel. Ca qaishinñi quena lahi so nayic quiyi Efrata. Ca' nagui yi'maxare leenaxat Belén. 20Ca' so Jacob nachaalataxanñi so qa', ỹanalec aso napal lahi'. Ca' chaqaiso só'maq qa' qaỹalamaxajñi, so'maxare ñaqai netanaxaset aso lahi' aso Raquel.
21Ca' so Israel ñaqai queeta quecá'maq taigue. Ca na' napaguelec aso naue leenaxat Edar, ca' lotqai na'ñi. 22Ca co'na' ñaqai neetalec yijo 'laua so Israel. Ca 'uo' so na'xa'a co'na' so Rubén lapa'ñi' aso Bilha só'maq leloxoỹaxanata so leta'a. Ca co'na' ỹa'den so'maxare, ca' ỹaatqajam ro'o.
Saua llaalqa so Jacob
Ca' saua llaalqa so Jacob ỹovite' doce. 23Ca sauá'maq llaalqo' caso Lea, saua Rubén só'maq ỹi llaalec, ime, ca' so Simeón, Leví, Judá, Isacar chaqai so Zabulón. 24Ca' saua llaalqa caso Raquel, saua José chaqai so Benjamín. 25Chaqai saua llaalqa caso Bilha só'maq la'a aso Raquel, chaqaisaua saua Dan chaqai so Neftalí. 26Chaqai saua llaalqa caso Zilpa só'maq la'a aso Lea, saua Gad chaqai so Aser. Ca' 'esaua saua llaalqa so Jacob ne'xaira'ñi yi Padan-aram.
Dá'maq 'neeto' da lelauaxa so Isaac
27Ca' so Jacob quepegue' so leta'a Isaac ra'ajnaxana quiyi Mamre yí'maq na'a' leenaxato' quen qai'neeta da Arba, loqo'm Hebrón. Yi nera'ño' quen saua Abraham chaqai so Isaac. 28Ca' so Isaac ỹovito'o' saua ciento ochenta ñaxari co'na' ileu. 29Ca' lapooguita saua 'auaxaic leta'allipi co'na' mashic qo'xoỹom. Ca' saua llaalqa Esaú chaqai so Jacob ishiñiño' na'le so'maxare.
