1Ca co'na' aso Raquel iuana quiyim aso'maxare tot qaica ca llaalec queso Jacob, ca' 'ue da lpa'guenaxanaxa caso lopilete Lea. Ca 'naaco' queso loua:
—Vite ca ỹaalqaipi, ma' no'me', ca yileu.
2Qam so Jacob ro'ỹo' aso'maxare, ca 'naaco':
—¿Qa' ỹimo' qota'olec? Ma' ñi'maxare ñí'maq se ỹo'uet ca qachaalqui'.
3Ca' aso'maxare 'naaco':
—Coñita añi ilaata Bilha, ca rapa'ira'ñi' añi'maxare. Ca noma' añi'maxare 'ue ca llaalec, ca' 'ec ỹim 'ue ca ỹaalec, qaiyi 'ue ca ỹaalec ma'le.
4Ca' chaqaido' 'neeta aso Raquel na' ỹaanem so Jacob aso lelaata Bilha quiyim leloxoỹaxanata. Ca' so Jacob lapa'ñi' aso Bilha. 5Ca' caso'maxare, ca 'uo' so llaalec so Jacob. 6Co'na'le, ca' aso Raquel 'naaco':
—Yijo noctoqui' leenaxato' Dan, loqo'm qoshiilec. Ma' ñi qota'olec 'xaỹa da ñqouagaxainaxac, ca ỹo'uet quiyim chaqaida 'neetari' dá'maq taalec aỹim queta'le, ma' ñi'maxare nagui ỹo'uet na ỹaalec.
7Ime, ca' aso Bilha, ca lotqai liỹa co'iguit so Jacob. 8Ca' aso Raquel 'naaco':
—Najo noctoqui' leenaxato' Neftalí, loqo'm iloquiaxac, ma' ỹaatqajam 'xoic na iloquiaxac cañi ỹopilete, ca' mashic ỹoxona.
9Ca co'na' aso Lea ỹa'den mashic tot co'o, ca' icona aso lelaata Zilpa, ca' ỹaanem so Jacob quiyim leloxoỹaxanata. 10Ca co'na' aso Zilpa co'iguit so Jacob, 11ca 'naaco' aso Lea:
—¡Chalego ña'pe! Ca' vichiguiño' najo noctoqui' leenaxato' Gad, loqo'm ña'pe.
12Ime, ca' aso Zilpa liỹo' co'iguit so Jacob. 13Co'na'le, ca 'naaco' aso Lea:
—Ỹaatqajam chalego ỹa'maxa. Ca' nagui na 'aallipi ỹamata'gue aỹim 'maxarai, vichiguiño' najo noctoqui' leenaxato' Aser, loqo'm na'maxa.
14Ca 'uo' ca na'xa'a so Rubén taalec so no'ueenaxa na' qanaqatetac na la so trigo. Ca iuanejlco' ana la ana leenaxat mandrágora. Ca' ỹodou'a aso late'e Lea. Ca co'na' aso Raquel co'na' idaana'a aso la aná'maq ishit co'o nqai'en aca se co'o, ca 'naaco' caso lopilete Lea:
—Qouaquiric, vite aca nañaañi' cana mandrágora nodouo da qachaalqui'.
15Qam aso Lea 'naaco' caso'maxare:
—¿Peeta'a 'ñiisapega se qui'ỹaq quiyim huootaxañira'gue so ỹoua? ¡Ca' nagui lotqai vi'saque huootaxañira'gue ana mandrágora nodouo ñi ỹaalec!
Ca 'naaco' aso Raquel:
—Cha'regue quena pe rapa'ira'ñi'o' so Jacob, ñi'chiguita daua nemandrágora da qachaalqui'.
16Ca co'na' mashic pe, ca' noviro so Jacob chicqauec quena no'ueenaxa. Ca' qaỹanaqta'guit caso Lea, ca 'naaco':
—Quena pe ỹapa'ñi' qami', ma' mashic shi'gue seshivichiñi' quesaua nemandrágora ñi ỹaalec.
Ca' queso pe, ca' so Jacob lapa'ñi' aso Lea. 17Ca co'na' liỹa co'iguit, ca' cinco saua llaalqa so Jacob caso'maxare, ma' ñi qota'olec 'xaỹo' ca nqouagaxainaxac. 18Co'na'le, ca 'naaco' aso Lea:
—Najo noctoqui' leenaxato' Isacar, loqo'm qouagaxat, ma' ñi qota'olec ỹo'uet da lqouagaxa caỹim, ma' saanem na'le añi ilaata so ỹoua.
19Co'na' ime, ca' lotqai liỹa co'on so Jacob aso Lea, ca' ỹovite' seis saua llaalqa. 20Ca 'naaco':
—Chalego loyac na lame ñi qota'olec. Ca' nagui, ca' so ỹoua paguec nqo'chiiua' ma'le, ma' mashic ỹovite' seis naua llaalqa caỹim. Vichiguiño' najo noctoqui' leenaxato' ma'le Zabulón, loqo'm nqo'itaxat name.
21Ca só'maq pa'aatec, ca' aso Lea 'uo' aso llaale, ca leenaxato' nqai'en Dina. 22Qam ñi qota'olec ỹo'leento'o' aso Raquel, ca' 'xaỹa da nqouagaxainaxac. Ca lotqai 'uo' nqai'en so llaalqaipi. 23Ca co'na' 'ue so 'auaxaic llaalec, ca 'naaco':
—Ñi qota'olec naqat da ipocoxo, ma' sqaica ca ỹaalec. 24Saxanchi' ỹo'uet ca liỹa ỹaalec.
Ca vichiguiño' ỹanco' leenaxat José so llaalec.
Nachiita'ta' saua Jacob chaqai so Labán
25Ca' aso Raquel co'na' ime ne'qaañi so llaalec José, ca' so Jacob 'naaco' queso Labán:
—Ñaq yashiñiterec quiyim sopil quecá'maq ỹalamaxaret ỹa'a'. 26Nañaañirec na ỹaalqaipi chaqai naua ỹoua', ma' chaqaidaua dá'maq 'em so'ueenataxantacot qami'. Ca' yayaxañirac ñaqa shic sopil, ma' qami' 'yiiñite' dá'maq 'neeta quiyim so'ueenataxantacot qami'.
27Qam so Labán 'naaco' queso'maxare:
—Qouaquiric, ro'viiñirañi, chaqai 'ñi'sari' ñiiso'ot aỹim, ma' mashic senataxanteguelec qami', ca' sa'den quiyim ñi qara'gaxala' 'ue da lqouagaxa caỹim chicqochigui qami'. 28'Ñirapiguiỹa' ỹote' acá'maq vi'saque ravigui'i', ca' ỹim seshiueten ma'le caqami'.
29Co'na'le, ca 'naaco' so Jacob:
—Qami' 'yiiñite' dá'maq 'neeta quena' so'ueenataxanot qami' chaqai dá'maq 'neeta quena' seloxoỹa'a na qalohi'ipi. 30Ma' sqo vito'olli' caua qalohi' na' saqa' ñovi', chaqai quiyim chaqa'ma' nqo'neuec na' ñovi', ca ñi qara'gaxala' nqouaguegue qami', qam ¿laquio' chi so'ueenataxanlgoto nauá'maq ỹalamaxarete' ỹaalqa?
31Qam so Labán 'uo' da lepagaxallic, 'naaco':
—¿Ỹote' acá'maq vi'saque nishivichi'i'?
—Se yishivichiñi', —'naaco' so Jacob—. Liỹo' scochiỹa ana qalo'e' qagreta, no'm 'maxariñite' dá'maq shinac caqami': 32Ñaq yayaxañirac quiyim nagui ná'ogue ana qalo'e' quiyim soỹoote'oga ná'ogue na qagreta llaalec laueraxaic chaqai ná'ogue na quetaq llaalec 'ue ana lete. Ca' chaqaina ná'maq ñishiue' ma'le. 33Qaiyi quenauá'maq na'xata' ma' na'ajnaxañire'oga, ca' ỹaatqata acá'maq ñigui dá'maq ỹo'ueenataxanaxac. Ca' ỹaatqajam 'chiichiguiñi ma' no'm queca iloipi 'ue aca quetaq sqaca aca lete, loqo'm ca qagreta se laueraxaic, ca' ỹaatqajam llic socachot qami'.
34Ca' so Labán 'naaco':
—Ajá'a, sa'maxarenta da 'ñirac.
35Qam chaqaiso sojo na'xa'a, ca' so Labán ỹoỹoote'oga sá'ogue so quetaqaipi 'ue ana lete, chaqai ná'ogue ana quetaq 'vii naua lachi', chaqai na qagreta llaalec laueraxaic, ca' ỹaanema saua llaalqa quiyim reloxoira'a. 36Ime, ca' imaq sojo laloipi quiyí'maq neeta'ñi so Jacob yijo ishit qaỹovita quiyim tres na'xata' queeta ca qom.
Ca' so Jacob ñaqai queetalec quiyim reloqota'a so lalo qagreta so Labán. 37Ime, ca ỹouaxandec saua lasote ladalahi' ana qo'paq leenaxat álamo, chaqai ana almendro, chaqai ana castaño. Ca' cola' naqat ana leso, qaiyi re'qoote' naua lachi' lalagaxaqa. 38-39Ca co'na' ime cola', ca' ỹa'chi'iñi quena lahi so ne'taxanataxanaxaqui dá'maq reloqota'co' quena' ne'et quena huaxaỹaq so neloipi. Ca' quiyi hua'ño' quena' na louaaripi renojlec ana loua, qam ma' co'quena' renojlec ca reloqoto'ot saua qo'pa' ncola, ca co'quena' ne'qaañi na llaalec, ca' 'vii naua letee, loqo'm naua lachi' chaqai teulaxai. 40Ca' so Jacob ỹoỹoote'ogo' quen ana isecỹac 'vii naua lachi' chaqai ana laueraxai cana lalo so Labán. Ca' chaqaida 'neeto' na'le so Jacob na' ỹo'uet asó'maq chi lalo ỹoỹooteta'oga caso lalo so Labán. 41Ca co'quena' ná'maq isecỹac paguec 'uegaxasaq renojshiguim quiyim ỹa'ue ca llaalec, ca' so Jacob ỹa'chi'iñi saua qo'pa' quena lahi so ne'taqa', qaiyi quiyim renojshiguim, ca' reloqo'toto saua qo'pa'. 42Qam co'quena' noviraxasom ná'maq ỹapo'ota iseripi, ca' se ỹa'chi'iñi saua qo'pa'. Ca' vichiguiño' ná'maq iseripi paguec po'xoic, ca lalo so Labán. 43Ca chi ỹovireto'o' quiyim ỹaatqajam nesallaxanec so Jacob, chaqai vire'to' na' 'xoic aso lalo qagreta, chaqai so lelaatqaipi, chaqai aso lelaataipi, chaqai lalo nauaanaxanaxa late'ellipi, chaqai 'ashinyipi.
