Ñi qota'olec nopoxoỹaxajñi yi Sodoma chaqai yi Gomorra
1Ca co'na' mashic sham napalñi, ca' saua dos nelaatqa piguim lase' ỹovirero quiyi Sodoma. Ca' so Lot nqa'xantañi quiñi lasom yi na'a' yí'maq hua'ñi lapooqo' na qomyipi. Ca co'na' idaana'guita, ca ne'laxashiguim, ca'guita. Ca' nqai'guiñi, ỹoviraqta'guit na latap na 'laua. 2Ca 'naaco':
—Qamiri ỹa'gaxalate', ñaq qouaguiic quiyim via'ñi quena pe yi la'a' na relaachiguii. Ca' quiyi ma'le, ca quiỹohi' naua qapiaachiri. Ca' nete'e ma' nete'etam, ca lotqai liỹa quii quecá'maq 'iỹa'gue.
Qam saua'maxare 'neraco':
—'E', yí, qana'aachic. Chi selaxasqo' quena nayic quena pe.
3Qam so Lot ỹaatqajam 'xoic da lepagaxallic, vire'ta na' qarasaachiguit. Ca' qoyicpegue' ca la'a'. Ca co'na' ỹovirero, ca' so Lot ỹo'uet ca na'ic chaqai ca pan qaca aca lalequete. Ca' saua huoxoiqa qui'ỹe'.
4Qam co'na' saqa' nenañiñi laxe' saua'maxare, ca' sá'ogue so qomyipi na'ñi yi na'a' Sodoma nahiquinchiguiñi ca 'imec. Na ne'naqaipi chaqai vire'ta na qo'xoiquipi 5ỹaualqatapega'a so Lot, 'neraco' quen:
—¿Negue' ca hueesa'gue caua ỹale' novirera'a na ra'aachi' quena pe? Nenoxonaxachirec, sahoqotaque qarapa'anto.
6Co'na'le, ca nenoxonec so Lot, ca ỹaatqajam ỹapoochigui ca lasom. 7Ca 'naaco':
—Qouaguiic qamiri ñauochaxaua', 'neeto' 'viichii ca chalego la'aaxa. 8Ỹim 'vii yaua dos ỹaale saqa' iuandapega ca ỹale. Nenoxondec nqaishine', qaiyi 'viiquiñita'pe quecá'maq 'ñiita'que, qam sqaica ca 'ñii'teguelo yaua ỹale', ma' ỹalecse'.
9Qam saua'maxare 'neraco':
—¡Qo'ñirec quenajo! Saqa'leco'eda quiyim ca chicqauec 'nejem qami' ỹahotaque qarela'. Qam ¡nagui paguec la'aaxa dá'maq shinqa'tegue qami' quiyaua'maxare!
Ca chaqa'ma' se qaỹa'maxata'gue so Lot, ca qanqo'neu'a ca lasom qaỹahotaque qaỹopoxoỹaxato. 10Qam saua na'piicha' so Lot iconera'oga so'maxare, ca' inoxonaxatero queca 'imec, ca' ỹaporigui ca lasom. 11Chaqai sá'ogue so qomyipi qai'laq nqai'ne'; ca sá'ogue só'maq pa'aatauec, so ne'naqaipi chaqai vire'ta só'maq qo'xoiquipi, sá'ogue se neuanñi. Ca' chi nco'teetec se ỹanata ca lasom. 12Co'na'le, ca' saua huoxoiqa 'neraco' queso Lot:
—¿'Uo' ca liỹa qauochi' le'ec quenajo? 'Guiñirau'alo caua qachaalaxahi', chaqai caua qachaalli', chaqai caua radonaxanaxahi', chaqai cá'ogue cá'maq hueetaugui na na'a'. Naqachira'alo, ca qoỹoqo'tegue ca viquitegue quenajo, 13ma' qomi' ñopoxoỹaxataxañi najo na'a'. Ma' mashic 'xoic na na'qaatqaipi se no'uen, ỹoviretacot ñi qara'gaxala' quedá'maq se no'uen ỹo'ueetetac na qomyipi na'ñi najo na'a'. Vichiguiño' nelate' qomi' quiyim sopoxoỹaxataxagui.
14Co'na'le, ca' so Lot quepegueto saua ladonaxanqa sauá'maq ỹahosaque loua' saua llaale. Ca 'naaco':
—¡Ne'laxachishiguim, oquiỹe'e najo, ma' ñi qara'gaxala' nopoxoỹaxajñi ma'le najo na'a'!
Qam saua ladonaxanqa se na'xaỹaxanta da 'naac so Lot. 15Qam co'na' mashic sham richiguiñi, ca' saua nelaatqa piguim lase' 'neraco' queso Lot:
—¡Riỹalli'sac! Ñirishiguim, 'xachi' quenajo añi roua'e', chaqai naua qachaalli', no'm sqai 'maxariñi' quiyim rillivi'. Ma' sahoqe ca nouaxanaxaset najo na'a'.
16Qam ma' so Lot 'xoic da laỹaloxo, ca' saua nelaatqa piguim lase' iconalo naua laua', ma' ñi qara'gaxala' i'xoren so'maxare. Qai'neeta qaicona'a aso loua chaqai saua llaale, ca' naqata'alo quiyi na'a', qaiyi nca'lerec. 17Ca co'na' mashic inoxondec quiyi na'a', ca 'óno' so quesaua nelaatqa 'naaco':
—¡'Iichi', qaiyi rca'llirec! Se nqovilquira, chaqai sqai vire'e quena ca'megue. Quirepegue' yi qoỹoqoshi'megue 'laua, no'm vi'saque rca'llirec.
18Qam so Lot 'naaco' quesaua'maxare:
—¡'E', ñaq qouaguiic, qamiri ỹa'gaxalate'! 19Qamiri mashic 'xoic da rqouagaxahi caỹim, chaqai qamiri huagaxaraqa caỹim, ma' yca'laxachiuec. Qam ỹim re'qoota se sovijta'a yi qoỹoqoshi'megue 'laua. Ca ma' qanopoxoỹaxajñi najo, ca qaỹoviralgoto qomi' quena nayic, ca qai'neete' qomi' qareleu. 20'Ue yi na'aa'oqui' sqoỹoqaque quenajo, yí'maq ỹa'maqachiguiñi se'guena. Quiyim 'maxariñita, shicpegue', qaiyi yca'leuec. 'Nesa ma' yi'maxare ỹaatqajam cocho'qui'.
21Ca' so 'óna quesaua'maxare 'naaco':
—Sa'qaatapega dá'maq 'ñirac, ca so'uet dá'maq shiilaxañisaque. Se ñopoxoỹaxajñi yí'maq 'ñirac na'a'. 22Qam raqamqai', qui', quirepegue' yi'maxare. Ma' ỹim sqaica ca so'uet ma' saqa' vichita yi'maxare.
Vichiguiño' yijo na'a' leenaxat nqohin Zoar, loqo'm sqa logoñoqui'.
23Ca co'na' mashic richiguiñi, ca so Lot ỹovito' yi Zoar. 24Ca' ñi qara'gaxala' chicqo'ot nqai'en na piguim so norec chaqai na 'eco' quiquiaxaic, ca taalec nqai'en yi Sodoma chaqai yi Gomorra. 25Ca ỹopoxoỹaxachigui liỹaata'ñi' ná'ogue ná'maq na'ñi yi'maxare. Chaqai nomachichiguiñi ná'ogue ná'maq ñaxajlec so ca'megue. 26Qam aso loua so Lot coỹaretaho' na'le nqovilco', ca chaqa'ma' ñigui 'ue, 'ec qa'.
27Ca' queso nete'etam queso liỹa na'xa'a, ca' so Abraham quepegue' yí'maq hua'ño' na' retaqata'pegue' ñi qara'gaxala'. 28Ca ra'ỹa'gue dá'maq pa'aasa'gue yaua Sodoma chaqai yi Gomorra, chaqai quesá'ogue so ca'megue. Ca iuane'ta na lesalaxaripi quiyá'ogue yijo 'laua mashic 'ec nqatelaxanaxaqui. 29Ca' chaqaida 'neeto' na'le na' ñi qota'olec nopoxoỹaxachiñi sauajo na'aate' quesó'maq ca'megue neeta'ño' na'le so Lot. Qam ỹo'leenta'a so Abraham, ca naqata'a so Lot na' nopoxoỹaxachiñi yaua'maxare.
Cá'maq chicqochi'ñi na moabitaipi chaqai na amonitaipi
30Ca co'na' ime, ca' so Lot no'chi quiyim neeta'ñi yi Zoar. Ca' eec, quepegue' yi qoỹoqoshi'megue 'laua, liỹareta'pe saua dos llaale. Ca' saua tres neesalec so 'laua neesau'gue so lauac. 31Ca 'uo' so na'xa'a asó'maq ỹi llaale 'naaco' caso lano'o:
—Ñi qareta'a mashic qo'xoỹom, qam quenajo 'laua qaica ca 'oonoqui' ỹale quiyim o'ñiguita qomi', qaiyi ipaquichigui dá'maq no'ueenataxac na qomyipi. 32Ca squiñiuguetqachitaq ñi qareta'a, ca' llapaaqa'ñi', qaiyi 'ue ca llaalec.
33Ca' queso pe, ca ne'taxane' queso lataxa so leta'a'. Ca' eec asó'maq ỹi lapa'ñi' so'maxare, qam so leta'a se nauate co'na' nenanñi chaqai na' ne'laxashiguim aso'maxare. 34Ca' queso liỹa na'xa'a, ca só'maq ỹi 'naaco' caso lano'o:
—Queso pe llapaata'ñi' ñi qareta'a. Ca' quena pe lotqai squiñiuguetqachitaq, ca lapa'ira'ñi' ma'le, qaiyi 'vii caua llaalqa coqomi'.
35Ca' queso pe lotqai ne'taxane' so leta'a'. Ime, ca' eec aso na'aasa lotqai lapa'ñi' so'maxare, qam so Lot qaiyiita se nauate co'na' lapaata'ñi' aso'maxare chaqai co'na' ne'laxashiguim aso'maxare. 36Ca' chaqaida 'neeto'o' saua dos llaale so Lot na' 'mane', 'manchiguit so leta'a'. 37Ca asó'maq ỹi 'uo' so llaalec, ca ỹanco' leenaxat Moab, loqo'm chicqaugui ñi ita'a. Ca' chaqaiso' só'maq leta'a na na'ñi yi Moab nagui. 38Ca' aso na'aasa qai'neeta 'uo' so llaalec, ca ỹanco' leenaxat Ben-amí, loqo'm llaalec na iuo'. Ca' chaqaiso' so leta'a na amonitaipi nagui.
