Ñi qota'olec 'naac quiyim 'ue ma'le ca llaalec so Abraham
1Ñi qara'gaxala' lotqai nachaxana so Abraham quiyi loma' ana qo'paq leenaxat encina na'ñi so ỹale leenaxat Mamre, co'na' so Abraham nqa'xantañi quiñi lasom ñi lauo' na'daañi na' mashic 'uo' ca na'xa'a lavinñi. 2Ca co'na' so Abraham nedaanashiguim, ca' saua tres ỹale' reloqoso'ot so'maxare. Ca co'na' iuane'talo, ca ne'laxatashiguim quelola'pegueto, ca nqai'guiñi ỹoviraqta'guit na latap na 'laua. 3Ca 'naaco':
—Qami' ỹa'gaxala', sashiila'e' quiyim sqaua' qui'. 4No'm 'maxariñite', ca' sashiilaxanaque ca huaxaỹaq, qaiyi quiỹohi' naua qapiaachiri. Ime, ca' nco'machiuec quena la'al ada qo'paq. 5Ma' mashic naguii'tegue na la'a' ná'maq ro'ueenataxantacoto qamiri. Ca ñodouec ma'le ca qanoxohi, qaiyi nqo'neuec ma'le ca rquesaxanaxahi quecá'maq 'iita'gue.
—Hua', ỹa'maqachiguiñi —'neraco' saua'maxare.
6Ca' so Abraham inoxonouguio' so lauo' na'daañi, ca 'naaco' caso Sara:
—¡Qui'guiñira'gue! Coñita ca veinte kilos quecá'maq no'uen 'aríña, ca 'viichi' caua paañi'.
7Ime, ca' so Abraham ne'guenta'oga yi hueeta'ñi so laloipi, ca' nca'au'a só'maq ỹaatqajam 'uegaxasaq huaqui llaalec. Ca' ỹaanem so lelaatec, ca so'maxare que'guena'gue ỹauaaque na'ic. 8Qam sqaisoota so huaqui llaalec, ma' so Abraham naueguec so ques, chaqai saua huaca lo'i'. Ca so'maxare ỹaatqajam 'ue da lquelolaxa na' ñaq que'eeta'pe saua'maxare neeso'ot yi la'al aca qo'paq.
9Ca co'na' ỹa'aate', ca sauá'maq ỹouoota'pe inate' so Abraham:
—¿Negue' ca hueeta'gue aca roua'e' Sara?
Ca so'maxare 'naaco':
—Hueetaugui ñi qouo' na'daañi.
10Ca' so 'óna quesaua'maxare 'naaco':
—Quena liỹa ñaaxa lotqai liỹa ña'piicha qami', qala' 'ue ma'le ca llaalec añi roua'e' Sara.
Qam aso Sara na'xaỹaxantapega sá'ogue so na'qaatqaipi, hueeta'gue na lelaq so Abraham, hueete'e ñi ñigo quiñi 'imec na'daañi. 11Qam so Abraham chaqai aso Sara mashic qo'xoiqam, ca aso Sara mashic qac da la'aaxa quena lqo'xo. 12Vichiguiño' aso Sara se nalo'guit so le'naxanaxa, ca 'ñiichiquio' lauel: ¿Tegue' cá'maq la'maxa iuel ma'le, ma' ñí'maq ỹoua chaqai aỹim mashic qomi' qo'xoiqam?
13Qam ñi qara'gaxala' 'naaco' queso Abraham:
—¿Chi'negue ma' raỹaleguere añi Sara? ¿Sqai huelec peeta'a quiyim 'ue ma'le ca llaalec ma' mashic qo'xoỹom? 14¿'Uo' ca lqalanec ñi qara'gaxala' quiyim ỹo'uet? Quena liỹa ñaaxa, ca lotqai liỹa ñovita qami', ca mashic 'ue ma'le ca llaalec añi Sara.
15Ca 'uo' da lqolonaxa aso Sara co'na' 'xaỹa dajo. Ca na'le, ca shimo' noqolliguit aso Sara, ca vichiguiño' 'naaco':
—Ỹim se saỹalegueretac.
Qam ñi qara'gaxala' 'naaco':
—Ỹim sa'den quiyim qami' ỹalliguiri'.
So Abraham rashiilaxanlec yi Sodoma quiñi qota'olec
16Ca na' ime, ca' saua huoxoiqa nachaachiñi, ca que', taategue da Sodoma. Ca' so Abraham coỹarerauec saua'maxare, ma' ỹahotaque niquinto. 17Co'na'le, ca 'ñiichiquio' lauel ñi qara'gaxala': Nagui sa'qaataxanem na Abraham quedá'maq shim so'uet. 18Ma' na'maxare leta'a ma'le ca 'xoic qomyipi chaqai quesaxanaxaic. Chaqai mashic shinac quiyim chicqochigui nqaishin da'maxare quiyim yqouaguegue ma'le ná'ogue na ỹoreta'oguit qomyipi quena 'laua. 19Ma' ỹim ica'acsec na'maxare, qaiyi 'naapega ca llaalqaipi chaqai ca lauaripi quiyim huelec da ỹapaxaguinataxanaxac, chaqai quiyim ỹo'uet ná'ogue ná'maq ỹa'maqachiguiñi chaqai da no'uen ñicyaxac, qaiyi sepacqajanchigui ná'ogue ná'maq shinac na'le.
20Ca ñí'maq qara'gaxala' ra'qaataxano' na'le, ca 'naaco':
—Yi qomyipi na'ñi yi Sodoma chaqai yi Gomorra ỹaatqajam se no'uen da na'qaataxac, chaqai chalego lecaic da lasauaxaset. 21Ca' nagui shicpegue' yi'maxare sa'aaten quiyim llic quiyim chalego la'aaxa dá'maq ỹo'ueetetac dá'maq shi'gue qaỹa'xatetapiguim, qaiyi ỹaatqajam sa'deenta.
22Ca' dos sauá'maq que', querepegue' yi Sodoma, qam so Abraham ñaq reloqota'guit ñi qara'gaxala'. 23Cocho'qui' liỹa nqo'not so'maxare, ca' inato':
—¿Liỹaata'ñi' nqai'ñi' na sqaica ca lasauaxaset ná'maq sauaqhuaiquipi? 24Ma' sqoue 'ue ca ỹovite' cincuenta caua sqaica ca lasauaxasete' quiyi na'a'. Qam ¿peeta'a qaiyiita nomachichiriñi yi na'a', ca' sqai 'xoriñi' chicqochiguilo caua cincuenta? 25Ca' ¿shichi' lauachi' qai'neeta cá'maq sqaica ca lasauaxaset, queeta'ñi' cá'maq sauaqhuaic? ¡Sqai 'ñitetegue dajo quiyim caua'que sqaica ca qohineguelo! Qami' ma' qaica ca 'nejem aqami' quiyim michi' ca nasauaxaset quená'ogue na hueetalec ana 'laua. Ca' ¿sqai shichi'o' daañiraque ca la'maqa' dajo?
26Ca' ñi qara'gaxala' 'naaco':
—Quiyim 'vii caua sanatalo cincuenta qaica ca lasauaxasete' quiyi na'a' Sodoma, ca' quecaua'maxare, ca' nca'leuec nqaishin yá'ogue yí'maq neeta'ñi yi'maxare.
27Qam so Abraham liỹa 'naac:
—Chi yi'xoriñi'sac quiyim 'ue da liỹa sa'xat caqami', ma' ỹaatqajam qami' qota'olec, ca' ỹim chaqaỹim qom. 28Qam sqoue quiyim saqa'lecaua cincolqai', ca ỹovite' caua cincuenta. Ca' ¿quiyim sqaicaua caua cincolqai', ca qaiyiita poxoỹaxachirigui yi na'a'?
Ca' ñi qara'gaxala' 'naaco' queso'maxare:
—No'm sanata ca cuarenta y cinco, ca' se ñalauajñi.
29Qam so Abraham liỹa ỹashiilo'ot so'maxare:
—Qam sqoue 'ue ca cuarenta sqaica ca lasauaxaset.
Ca' ñi qara'gaxala' 'naaco' queso'maxare:
—Vire'ta quiyim 'vii caua cuarenta, ca sqaica nqaishinegue quiyijo na'a'.
30Qam so Abraham liỹa pilalec renataxan:
—Sashiila'e' quiyim sqai 'ohi' quiyim sopiltalec cá'maq sa'xatetac sashiila'isac, qam sqoue 'vii caua treinta.
Ca' ñi qara'gaxala' 'naaco' queso'maxare:
—Vire'ta quiyim 'vii caua treinta, ca' sqaica ca shine'tegue yi na'a'.
31Qam so Abraham qaiyiita da lepagaxallic:
—Qami' ỹa'gaxala', chi yi'xoriñi' quiyim sashiila'e' quedajo, qam ¿negue' quet ca 'neeta quiyim ỹovite' caua veinte caua sqaica ca lasauaxasete'?
Ca' ñi qara'gaxala' 'naaco':
—Quecauajo veinte, ca' qaica ca shine'tegue yijo na'a'.
32Qam so Abraham qaiyiita 'ue da lepagaxallic:
—Qouaquiric qami' ỹa'gaxala', totaxan 'o'iriua'. Ma' qaidaatoqui' dajo ỹa'qaatec, ca' tot liỹa setaqa. Qam ¿no'm huañirejlgoto caua diesolqai'?
Ca' ñi qara'gaxala' 'naaco':
—Vire'ta quecauajo diez, ca' se seshit ñalauajñi yi na'a'.
33Ca co'na' ñi qara'gaxala' ỹomat quiyim retaqata'pegue' so Abraham, ca' ca'e yí'maq hueete'e. Ca' so Abraham pilougui so lauo' na'daañi.
