Ñi qota'olec ỹo'uet da na'maqataxague' queso Abram
1Ca co'na' ime dajo, ca' ñi qara'gaxala' retaxaỹa'pegue' so Abram, viichigui nqai'en so leuanaxanaxac. Ca 'naaco':
—Qaica ro'chi'raque, Abram, ma' ỹim squepaqataxanteguelec qami'. Ỹaatqajam 'xoic lecaic ma'le aca nishivichi'i'.
2-3Qam so Abram 'naaco':
—Qami' ỹa'gaxala' qota'olec, ¿negue' quet cá'maq 'negue quiyim vite ca ñishiue'? Ma' qami' 'yiiñite' quiyim qaica ca ỹaalec. Ma' qaica ca nañaañi' ỹaalec, ca ñí'maq taalec ma'le cá'ogue ca isallaxa, ca' chaqaiñiita ñi Eliezer ñí'maq ỹaaqainatec Damasco le'ec.
4Ca' ñi qara'gaxala' 'naaco':
—Qami' ma'le, ca 'ue cá'maq ỹaatqajam ralamaxarichi' qachaalqui', cá'maq taalec da resallaxa'e', mesqai ca ỹoqa'a.
5Co'na'le, ca' ñi qara'gaxala' ỹauegueco' so Abram. Ca 'naaco':
—Ỹaatqajam 'ajñite' na piguim, ca naloqochiñi' ana huaqajñi, no'm shichi' naloqojñi'. Ca chaqaica ỹorete' caua qachaalaxahi' ma'le.
6Ca' so Abram huelec ñi qara'gaxala', ca vichiguiño' ñi'maxare ỹamata'gue no'uen ỹale. 7Ca 'naaco' queso'maxare:
—Ỹim ná'maq ỹim na'gaxala'; ỹim ná'maq ñaqatec na'le qami' quiyi Ur yí'maq huaugui yi 'laua Caldea. Ca' saañiraxarom najo 'laua quiyim ralamaxarichi'.
8Ca 'naaco' so Abram:
—Qami' ỹa'gaxala' qota'olec, ¿nega'ỹo' cá'maq 'neeta quiyim ỹaatqajam sa'den quiyim nañaañirim najo 'laua?
9Ca' ñi qota'olec 'naaco' queso'maxare:
—Nodo'iriri' aca 'óna huaqui llaale, 'óna quetaq, chaqai 'óna qagreta loua', tres niñaxari quiñi 'óna, chaqai 'óna coviguiñicoqui' chaqai ca co'toco' llaalec.
10Ca' so Abram ỹodou'a sá'ogue so iseripi ñi qota'olec. Ime, ca' ichaqa'tegue na lavinñi quiñi 'óna. Ca reloqota'ta' nqai'ne', qam se conaxata'guelo saua qo'oole. 11Ca' na ratecsan naỹo'ñalo' quen saua ise' leuaxaqa, ỹahotaque ỹa'gue', qam so Abram ro'ootaxanteguelgoto. 12Ca co'na' mashic sham pe, ca' so Abram ỹaatqajam laqatam. Ca' naco' so napalaxa lodegaxat ỹapojlec. Ca' so'maxare, ca ỹaatqajam no'chi. 13Co'na'le, ca qohinapego' quiñi qara'gaxala':
—Qami' 'yiiñi' quiyim ma'le ca qachaalaxai'pi ỹoqa'a ma'le ca neetalec 'laua, ca na'aquipi ma'le chaqai se qaỹa'maxata'gue, ỹoviraxaterauec caua cuatrocientos ñaxari. 14Qam ỹim qai'neeta sa'ue ca nouaxanaxaset cá'maq ỹo'uet quiyim la'aquipi ca'maxare. Ca ma' ime, ca qoỹaxanec ma'le ca qachaalaxai'pi. Ma'le, ca' ỹaatqajam lalamaxaret da lesallaxa. 15Qam caqami', ca' ma' qami' qo'xoỹom, ca qaigueme rillivi', qam qaicanqaida. Ime, ca lapo'ichiguit ca 'auaxaic qataa'i'llipi. 16Ca cá'maq llaalqaipi ca qauachi'ipi, ca' chaqaica cá'maq rapila ma'le najo 'laua, toco' ma' ỹovita ca laloqo' da le'taxaloxo na amorreo laseripi.
17Ca co'na' mashic napalñi queca pe, ca re'oqo' so nqatelaxanaxaqui nichiitashiguim, chaqai so ncoỹeraxanaxat ỹaviquetaugui, queeteguelgoto saua ise' qaiconaqta'que. 18Ca' chaqaiso so na'xa'a, ca' ñi qara'gaxala' ỹo'uet so na'maqataxac queso Abram. Ca 'naaco':
—Najo 'laua saanem ma'le ca qachaalaxai'pi chicqochi'ñi aso lachiugue quiyi Egipto, ca ỹovireta'a aso lachiugue late'ogue', leenaxat Eufrates. 19Ná'maq shintapega chaqaina na na'laua na ceneoipi, na cenezeoipi, na cadmoneoipi, 20na hititaipi, na ferezeoipi, na refaítaipi, 21na amorreoipi, na cananeoipi, na gergeseoipi, chaqai na jebuseoipi.
