Neuagaxata'pe saua Lot chaqai so Abram
1Ca co'na' so Abram chaqai aso loua quere'e yi Egipto, i'xate' sá'ogue so na'aatete', querepegue' yi 'laua leenaxat Néguev. Ca' so leteesec Lot qai'neeta liỹareta'pe saua'maxare. 2Ca' so Abram ỹaatqajam nesallaxanec, 'ue ana lam 'óro, plata chaqai 'xoic so laloipi. 3Ca' quiyi Néguev nemooteta, nqo'neeta'a chi ỹovireta'a yi na'a' Betel. Ca' quiyi, ca' quepegue' yí'maq 'auo' neeta'ñi viichiguiñigui na lavinñi yi Betel chaqai yi Hai. 4Yí'maq hua'ño' na' no'xonshiguim aca lcopatoxonaxalate co'na' nqouagaxaintac queda leenaxat ñi qara'gaxala'.
5Chaqai so Lot qai'neeta nesallaxanec 'nejem so neteesqo' Abram, 'xoic ana lalo qagreta, chaqai ana huaca, chaqai so lelaatqaipi liỹaatac so'maxare. 6Qam so 'laua neesalec sqa logoñi, ca' tot nalolec quiyim qaiqui'ỹaxanlec so 'xoic neloipi. Ca' tot ỹa'maxañi quiyim neuora' saua'maxare. 7Ma' só'maq neloxoỹaripi caso lalo so Abram nco'uaate'e' só'maq reloqota'a aso lalo so Lot. Chaqai quesauajo na'xata' ñaqai neetalec yijo 'laua so cananeoipi chaqai so ferezeoipi. 8Ca' 'uo' so na'xa'a, ca' so Abram 'naaco' queso Lot:
—Qomi' neuo' lase'. Ca' se ỹa'maxañi quiyim 'ue quet ca se ỹa'maxañi coqomi', chaqai quenaua relaataxahi' chaqai quenaua ilaatqa. 9'Ena ná'ogue na 'laua, nca'a'irigui. Qouaquiric noỹoochirec caỹim. No'm 'itegue da rapiguim, ca' ỹim saico' da 'guiñi, chaqai no'm qami' 'itegue da 'guiñi, ca' ỹim saico' da rapiguim.
10Ca' so Lot ỹa'ajan sá'ogue so ca'megue quena lahi aso lachiugue leenaxat Jordán. Ca' iuana quiyim ỹovira'a yi na'aa'oqui' leenaxat Zoar. Ca' queso ca'megue ỹaatqajam 'xoic na huaxaỹaq 'nejem loyac cá'maq ỹaatqajam no'uen nanaxanqa', chaqai 'nejem na 'laua quiyi Egipto. (Ca chaqaida 'neeto' da loyac yi 'laua co'na' ñi qara'gaxala' saqa' nopoxoỹaxachiñi yaua na'aate' leta'al Sodoma chaqai yi Gomorra.) 11Ca' so Lot nca'au'a sá'ogue so ca'megue quena lahi aso lachiugue Jordán, ca' taigue da lqodoigue quecá'maq neesa'ñi. Ca' chaqaida 'neeto' na' neuagaxate' so Abram chaqai so Lot. 12Ca' so Abram no'ueenalec yi 'laua Canaán. Ca' so Lot quepegue' quiyim naañigui yi na'aateripi naalec so ca'megue sqoỹoqaque nqai'en yi na'a' lodegaxat Sodoma, 13yí'maq na'ñi ná'ogue na qom hualoxonyipi, chaqai ỹo'ueetetac ná'ogue na se no'uen quená'maq se nqo'ta ñi qara'gaxala'.
14Ca co'na' ỹoxogue so Lot, ca' ñi qara'gaxala' 'naaco' queso Abram:
—Quenajo viise'e, ca' ra'iitegue da rapiguim chaqai da 'guiñi, lqodoigue chaqai da lauashiguim. 15Ná'ogue najo 'laua 'ajñisac ỹim saanem aqami', ca chaqa'ma' ralamaxarichi' chaqai ca qachaalaxai'pi. 16Ỹim ỹaatqajam 'xoic nqaishin ca'maxare, 'nejem na lamoxoỹaxa na 'laua. Ca 'nejem quiyim se qaishit qanaloqochin na namoxoỹaxa, ca' qai'neeta se qaishit qanaloqochin ma'le ca qachaalaxai'pi. 17¡Ne'laxachirishiguim!, huoxoñi' quirelec najo 'laua da ladoqueta chaqai da leca'gue, ma' ỹim saañiraxarom ma'le.
18Ca' so Abram napoc so lauo' na'daañi. Ime, ca' quepegue' yi 'laua hua'ñi ana qo'paq leenaxat encina, lalamaxaret so ỹale leenaxat Mamre, sqoỹoxa quiyi na'a' lodegaxat Hebrón. Ca no'xonshiguim aso lcopatoxonaxalate, ca' nqouagaxainot ñi qara'gaxala'.
