Da lasauaxaset so qomyipi chaqai da nqouagaxainaxac so Esdras
1Ca co'na' ime dajo, ca' so na'gaxalateripi nqo'neuo caỹim, ca 'naac:
—Na llaalqaipi so Israel, chaqai na netaxaỹaxanqajanqaipi chaqai na lotauaripi, na'maxare sqo ỹoxe'oga quená'maq na'ñi yi 'laua quena cananeoipi, hititaipi, ferezeoipi, jebuseoipi, amonitaipi, moabitaipi, egipcioipi chaqai na amorreoipi, ma' ỹo'uet da naqaigaxa dá'maq no'ueenataxac. 2Ma' na Israel laseripi chaqai na llaalqaipi o'ñiguit na llaallipi so ỹoqa'a qomyipi, ca só'maq lalamaxareteripi ñi qota'olec ỹalliguiguit na ỹoqa'a qomyipi. Ca ná'maq 'au ỹo'uet da nasauaxaset chaqaina ná'maq na'gaxalateripi chaqai na nashillipi.
3Ca na' sa'qaachigui dajo, ca ñasectaqta'ahi saua ỹoho chaqai ño'teque'e na iue chaqai ana ỹaqareue queda nqui'ic. Ca' ñqa'xanñi sa'lliichiguiñi. 4Ca ná'maq no'chiitaque ca nouaxanaxaset quiñi qota'olec quena Israel queda lasauaxaset ná'maq mashic rapil quiyim na'ac, ná'ogue lapooguit aỹim. Qam ñaqaỹim ñqa'xantañi sa'lliita, chi ỹovireta'a ca laloqo' quiyim qaỹo'uet aca nachitaxanataxanqate queso avit. 5Ca' rapil da iquesaxanaxa, ca' ñaqai sansañi saua ỹoho sectete', ca ñqouagaxainot ñi ỹa'gaxala' qota'olec. 6Ca' shinac:
—Qami' ỹa'gaxala' qota'olec, qami' ỹa'gaxala' qota'olec, ỹaatqajam chalego da ỹayiloxo, chaqai tot sa'den ca shine'tegue quiyim ñqouagaxainot qami'. Ma' na se no'uen mashic ỹapacshiguim coqomi', chaqai na qarasauaxaset mashic ỹovitot na piguim. 7Mashic shi'gom chi ỹovireta'a nagui quiyim seuqataugui na qarasauaxaset. Sauaxat na qarasauaxaset qomi' chaqai na qarashillipi chaqai na netaxaỹaxanqajanqaipi qoỹaañiguita qomi' da lquesaxanaxa na ỹoqa'a nashillipi, ỹoqa'a na 'laua neetalec. Qomi' ncoñirqatqa, na'aqa, nouootqa, naqaicqate'. Ca' chaqaida dá'maq shinqatari' nagui. 8Qam nagui qami' qara'gaxala' chaqai qota'olec coqomi', queda rqouagaxa'e' ỹo'uet quiyim qomi' qaỹosoorec, ca lotqai liỹa qarapilaxatalo qomi' naua qara'aate' quena na'laua'e'. Ca lotqai liỹa neuañiñi nqai'ñi' qomi' chaqai cocho'qui' nachipinec nqai'ñi' da qaracat quiyim qomi' na'aqa. 9Ma' 'eno'm qomi' na'aqa, qam se qaralachi'. Ta'ta'a quiyim choxochi' da rqouagaxa'e' coqomi' iuanchigui nqai'ñi' yi nashillipi quiyi Persia, chaqai 'ỹaañitema qomi' da qarca'laxa, qaiyi liỹa ño'xonaxashiguim añi ro'ueenaxanaxagui'i' quiyim mashic ñá'ogue 'guiñi, chaqai 'ootaxañirelgoto qomi' quena Judá chaqai na Jerusalén.
10Qam nagui qami' qota'olec, ¿negue' queto' cá'maq shinqac quedá'ogue dá'maq so'ueetaq? Na' se sepacqajnaxaguilo naua nelaataxanaxaco, 11quedá'maq laataxañirelec na'le coqomi' quesaua retaxaỹaxaquichi' sauá'maq relaataxahi'. Vite na'le da raqataxaqui' coqomi' quiyim quená'maq 'laua senoxonaxau'a quiyim senqalec, ỹaatqajam se no'uen sauaxat na se no'uen ỹo'ueetetac na qomyipi quena'maxare. Quedá'maq sqaica nqo'ta lanatec mashic no'xataxajlec quená'maq ỹo'ueetetac se no'uen. 12Chaqai qai'neeta 'ñirac quiyim sqo 'ñiguit nqaishinaq na qochaallipi, chaqai quiyim se sa'maxarenaq quiyim na qochaalqaipi o'ñiguit na llaallipi na'maxare, chaqai quiyim se seuagaxaguit chaqai ca la'maxa yijo qomyipi, qaiyi se neme quiyim qomi' quesaxanaxaqa, chaqai quiyim seconaxaguit ná'ogue ná'maq hueetalec na 'laua. Ime, ca' ño'ueenaxatqa'guit ná'ogue na'maxare na qochaalqaipi, ca' sqaica lqodoc quiyim chi lalamaxat.
13Ca na' ime'uegue ná'ogue ná'maq sovirqau'a sauaxat ná'maq se no'uen so'ueetqatac, ca' vite da qanouaxanaxaset, qam qaiyiita ñaqai 'ñira'guelo qomi', ca' vite quiyim chaqai shinqatari'. 14Ca' ¿peeta'a ỹa'maqachiguiño' quiyim se ña'xaỹaxanaxalo naua relaataxanaxagohi', ca ña'aaquenaxaguit na qomyipi ỹaatqajam chalego la'aaqa' naua no'ueenataxaco? Ca' ¿peeta'a sqai 'o'italo qomi', ca' palaxachira'pe qomi', vire'ta quiyim qaica quet ca 'oonoqui' no'ueenashiguim coqomi' ca'laaxaic?
15Qami' qara'gaxala', qami' qota'olec quena Israel, ỹaatqajam ỹa'maqachiguiñi dá'maq 'ñiteteguelo qomi', ma' ñaqa 'ue nqai'ñi' na ca'laaxaic ná'maq nagui qaiuanchigui. Ca' qomi' ỹaatqajam 'ue da qarasauaxaset caqami'. Vichiguiño' qomi' se ỹa'maxañi quiyim seloxoiqato'ot qami'.
