So Esdras chaqai so lotauaripi novijta yi Jerusalén
1Ca co'na' mashic shi'gom dajo, co'na' mashic nashi so Artajerjes quiyi Persia, ca 'uo' so ỹale leenaxat Esdras. So'maxare chigoxougui so Seraías só'maq llaalec so Azarías, llaalec so Hilcías, 2só'maq chigoxougui so Salum, Sadoc, Ahitob, 3Amarías, Azarías, Meraiot, 4Zeraías, Uzi, Buqui, 5Abisúa, Finees, Eleazar chaqai Aarón só'maq ỹaatqajam 'auaxaic na'le quena netaxaỹaxanqajanqaipi. 6Ca' sojo Esdras napaxaguinataxanaq ỹaatqajam ỹa'deene' naua leloxoỹaxaco naua laqataxaco ñi qara'gaxala' ñí'maq qota'olec quiyi Israel ỹaaneco' na'le, chicqochigui nqai'en so Moisés. Ca so'maxare ỹaatqajam qaỹotauantac quiñi qara'gaxala'. Ca' so nashi Artajerjes ỹaanem cá'ogue cá'maq rashiilaxanaque. Ca' chaqaida 'neeto' na'le na' so Esdras quiyi Babilonia pil, 7taigue da Jerusalén, 'ue so liỹaatec llaalqaipi so Israel, ỹalliqui'chiguit so netaxaỹaxanqajanqaipi, chaqai so lotauaripi, no'ueenaxanyipi, lasom lo'ollipi, chaqai notaanaxanyipi quiñi no'ueenaxanaxaqui, na' ỹovi' siete ñaxari quiyim nashi so Artajerjes. 8-9Ca' so Esdras na' qaỹotauan quiñi qota'olec, ca' pil, ca'e yi Babilonia queso 'auaxaic na'xa'a queso 'auaxaic shiraigo na' ime'ueque saua seis ñaxari nashi so Artajerjes. Ca' queeta quesaua cuatro shiriguiri, ca ỹovi'. 10Ca' so Esdras ỹahotaque ỹaatqajam napaxaguina quiyim ipacqajanchigui quiyim ỹo'uet na laqataxaquipi ñi qara'gaxala' chaqai quiyim ỹapaxaguin na llaalqaipi so Israel quena laqataxaquipi chaqai na nelaataxanaxaquipi.
11Ca' so nashi Artajerjes ỹa'ue aso lerecse, taỹaugui nqai'en na Israel llaalqaipi, ca' ỹaanem na'le so Esdras, só'maq netaxaỹaxanqajnec chaqai napaxaguinataxanaq ỹa'yiinchiguilo naua lelaataxanaxaco chaqai naua laqataxaco ñi qara'gaxala'. Ca dá'maq qanaqajshiguim hueetalec aso'maxare 'neetasa':
12Ỹim Artajerjes, ỹim lashi na nashillipi, saanem da ỹa'qaatec na Esdras ná'maq netaxaỹaxanqajnec chaqai napaxaguinataxanaq quena laqataxaquipi ñi qota'olec neetashiguim queda piguim.
13Ca' ỹim saan da ỹa'qaatec quiyim ná'ogue na Israel llaalqaipi ro'ueenataxantacot aỹim ishiteta eec cá'maq ỹahotaque taigue da Jerusalén quecá'maq sham quegue qami', vire'ta na llaalqaipi so Leví, netaxaỹaxanqajanqaipi chaqai na lotauaripi. 14Ma' ỹim chaqai naua siete ỹotaua' selata qami', qaiyi napaxaguiñita ca leloxoỹaxac nqai'ñi' yi Judá chaqai yi Jerusalén quiyim ipaquichiguilo nqai'ñi' naua laqataxaco ñi qota'olec caqami' lo'qo'isa'a'lo. 15'Xachi' ana plata chaqai na 'oro ná'maq chi ỹame chaqai na ỹotauaripi quiñi qota'olec quiyi Israel neeta'ñi yi Jerusalén. 16Chaqai 'xachi' cá'maq plata chaqai cá'maq 'oro chigoxochiraugui ná'ogue na qomyipi neetalec na 'laua Babilonia, chaqai ná'maq chi lame na qauochi' laseripi chaqai quená'maq netaxaỹaxanqajanqaipi lame quiñi lauo' ñi qota'olec na'ñi yi Jerusalén.
17Ca' najo nam viñi' ma'le quiyim shiujnaxañiraque ca huaqui llaalqaipi, qagreta louaaripi, chaqai ca qagreta llaalqaipi, liỹaatac nqai'ñi' na name trigo la chaqai na lataxa, quiyim qaillaalec aca ncopatoxonaxalate quiñi lauo' ñi qota'olec caqamiri quiyi Jerusalén. 18Chaqai quená'maq 'oro chaqai ana plata naauec, ca 'viiquiñitac quecá'maq 'ñiita'gue quenauá'maq nauegaxauari, quecá'maq ỹa'maxarenta ñi qota'olec. 19Ca ná'maq nouenqaipi qoỹaanem qami' ná'maq chi louenqaipi aca lo'ueenaxanaxaqui ñí'maq qota'olec caqami', chaqaiqami' 'ỹaañitem ma'le ñi qota'olec quiyi Jerusalén.
20Ca no'm 'ue ca liỹa louenec ca lo'ueenaxanaxaqui ñi qota'olec caqami', ca' chigoxochiraugui ná'maq ỹapoonaxanaxaquiripi. 21Ca' ỹim nashi Artajerjes, saanec da ỹa'qaatec quená'ogue ná'maq reloqota'a ana nam quiyi 'laua pa'ỹa'gue da lauashiguim caso lachiugue Eufrates, quiyim chaqa'ma' qoỹaanem canchaqaica rashiilaxanaque na netaxaỹaxanqajnec Esdras chaqai napaxaguinataxanaq quenaua laqataxaco ñi qota'olec queda piguim. 22Chaqai 'eno'm ỹovi' tres mil trescientos kilos na lecat plata, veintidos mil kilos quena trigo, dos mil doscientos litros na lataxa, dos mil doscientos litros na aceite, chaqai cá'ogue cá'maq qaỹouen quena 'ue, qaiyiita qoỹaanem.
23Cá'ogue cá'maq roỹaxanaque ñí'maq qota'olec queda piguim quena louenec ñi lo'ueenaxanaxaqui, ca chaqa'ma' qoỹaanem, qaiyi qaica ca nouaxanaxaset taalec na ỹaalqaipi chaqai ná'ogue ná'maq seloqota'a. 24Chaqai qai'neeta ỹaatqajam qaỹa'deenta quiyim se qaỹa'maxaren 'ue aca ishiueten na netaxaỹaxanqajanqaipi chaqai na lotauaripi, no'ueenaxanyipi, lasom lo'ollipi chaqai na reloqota'a añi no'ueenaxanaxaqui, loqo'm canchaqaica liỹa neloxoỹaq cañi lo'ueenaxanaxaqui ñi qota'olec.
25Ca' qami' Esdras quedá'maq na'deenaxanaxa ỹaanem qami' ñi qota'olec, ca vite caua ñi'ro quená'maq imit ca nasauaxaset chaqai ca nashillipi quená'maq ỹa'maqachiguiñi ca lo'ueenataxanaxac, quiyim idaanlec ná'ogue na ỹalliripi neetalec yi 'laua pa'ỹa'gue da lauashiguim caso lachiugue Eufrates, ná'maq ỹa'den na laqataxaquipi ñi qota'olec. Chaqai quená'maq saqa' ỹa'den, ca' qaỹapaxaguinegue. 26Chaqai cá'ogue cá'maq se ipaguigui nqai'en da laqataxaquipi ñi qota'olec caqami' chaqai da ilaataxanaxac, ca chaqa'ma' qaỹa'ue ca nouaxanaxaset quiyim qaỹalauat, loqo'm qaỹo'daauec, loqo'm qaỹa'ue aca ishiueten nqohin, loqo'm qaicoñi'.
Da nqouagaxainaxac so Esdras
27Co'na'le, ca' so Esdras nqouagaxain, 'naaco':
—Qaimaqachin qami' qara'gaxala', qami' qota'olec queso 'auaxaic qareta'allipi, ma' qami' 'viichi' quiyim ñi nashi imaqachin ñi qaro'ueenaxanaxaqui na'ñi yi Jerusalén. 28Ma' chaxañi' da rqouagaxa'e' caỹim, viichigui nqai'ñi' ñi nashi chaqai na lotauaripi chaqai ná'ogue ná'maq choxoraic ỹalliripi queda lo'ueenataxanaxac, quiyim nañaañirim da iquesaxanaxa queda rotaanaxanaxaqui' quiyim seshit llapoonta' na llaalqaipi so Israel, quená'maq paguec choxoraiquipi quiyim rapil, liỹaatac aỹim.
(8.1-36 'Ue aso lomalate só'maq rapil na'le quiyi Israel.)
