Lotqai liỹa qano'xonshiguim aso no'ueenaxanaxaqui
1Ca' saua qota'olec letaxaỹaxaqui' Hageo chaqai so Zacarías llaalec so Ido, ra'qaataxantem so judioipi naalec yi 'laua Judá chaqai yi Jerusalén quedá'maq la'qaatec ñi la'gaxala' ñí'maq qota'olec quiyi Israel. 2Co'na'le, ca' so Zorobabel só'maq llaalec so Salatiel chaqai so Josué llaalec so Josadac, lotqai liỹa ro'ueenataxane' quiyim no'xonyishiguim ñi no'ueenaxanaxaqui quiñi qota'olec quiyi Jerusalén. Chaqai saua letaxaỹaxaqui' ñi qota'olec huaqata'to saua'maxare quiyim rotaanaxane'. 3-4Qam so Tatnai só'maq nashi quiyi 'laua pa'ỹa'gue na lauashiguim caso lachiugue Eufrates, chaqai so Setar-boznai, chaqai so lotauaripi, sá'ogue eec, ca 'naaco':
—¿Negue' ca 'naapegalo' qamiri quiyim no'xoñishiguim na no'ueenaxanaxaqui chaqai pohilec quena qo'paq? ¿Negue' ca leenaxat na qomyipi no'xontecshiguim na 'imec?
5Qam ñi qota'olec ỹaatqajam ro'ootaxanlec so la'gaxalateripi na judioipi, ca' se qaiquepaxat da lo'ueenataxanaxac, chi ỹovireta'a quiyim qaila' so na'qaatec quiyim qaỹa'ue la'xaỹaxac so Darío quiyim nela' so la'qaatec so'maxare.
6Ca' dajo dá'maq qanaqajshiguim hueetalec aso nelaata queso Darío só'maq ila' so nashi Tatnai chaqai so Setar-boznai chaqai so lotauaripi nashillipi pa'ỹa'gue na lauashiguim caso lachiugue Eufrates. 7-8So'maxare 'neetasa' da hueetalec:
Dá'maq sahoqotaque caqami' qarashi quiyim qaicanqaida caqami' chaqai no'uen ca qayicyaxaqui'. Sahoqe da ra'xaỹaxaqui' quiyim sovirqa'ta yi 'laua Judá, chaqai ñi lodegaxat lo'ueenaxanaxaqui ñi qota'olec, ca ñi'maxare liỹa qano'xontecshiguim quena qa' lodegaxat qanolliquichiguiñi chaqai naua lahil qaỹapolec quena qo'paq. Ca' sqaỹaloxoshi'megue ma' qaiỹalata'gue da no'ueenataxanaxac. 9Ca' qomi' senataq na'le na na'gaxala' judioipi quiyim negue' ca ỹilen quiyim no'xonshiguim ñi 'imec chaqai ỹapolec quena qo'paq, 10chaqai negue' ca leenaxat dá'maq qomyipi na'gaxalateripi, quiyim seraxañi ca leenqateripi, ca ñodoxou'a qami' qarashi. 11Qam yí'maq qomyipi 'naac quiyim nqouagaxaintacot cá'maq qota'olec lo'ueenatec na piguim chaqai na 'laua, chaqai liỹa no'xonshiguim añi no'ueenaxanaxaqui ñí'maq shi'co' no'xonshiguim na'le so 'ñaaxaic nashi quiyi Israel. 12Chaqai qai'neeta 'naac yi qomyipi quiyim so 'auaxaic leta'allipi ỹo'ooqochit na'le ñi qota'olec quena piguim, ca' ỹaanec na'le queso Nabucodonosor nashi quiyi Babilonia, Caldea le'ec, quiyim loxonec. Ca chaqaiso só'maq nopoxoỹaxajñi na'le aso no'ueenaxanaxaqui, ca' ỹaueguegue so qomyipi da Babilonia. 13Ca' mashic shi'gom, ca' queso 'auaxaic ñaaxa na' nashi so Ciro quiyi Babilonia, ca' relaataxanlec quiyim liỹa qano'xonshiguim ana no'ueenaxanaxaqui quiñi qota'olec.
14Chaqai qai'neeta 'nerac coqomi' quiyim so nashi Ciro naqatec na'le caso no'ueenaxanaxaqui quiyi Babilonia na nouenqaipi 'ue na chicqaugui na 'oro chaqai na plata, icono' na'le so Nabucodonosor cañi no'ueenaxanaxaqui quiñi qota'olec quena Jerusalén, ca qai'xategue da Babilonia, ca' ỹaanem so leenaxat Sesbasar, ca' ỹano quiyim nashi lotaua reloxoỹa'a yi 'laua Judá. 15Ca' so nashi Ciro ilarelec na'le so'maxare quiyim lapoonta' so nouenqaipi, ca' qaỹopilaxata aso no'ueenaxanaxaqui quiyi Jerusalén, ca' chaqaica cá'maq shi'gue loma', ca qoỹanchi'ñi aca dalaxai no'ueenaxanaxaqui quiñi qota'olec. 16Ca na'le, ca' so Sesbasar novi', ca' ỹo'viijñi so lo'xonaxala' na no'ueenaxanaxaqui quiñi qota'olec quena Jerusalén. Ca' chaqaica vigui, ca' liỹa qano'xontecshiguim, qam saqa' qaỹomat.
17Ca' nagui, ca no'm 'maxariñite', qami' qarashi, ca qomi' sahoqotaque quiyim qaimichigui na lerellipi quená'maq hueetalec ná'maq qaỹo'uet quena Babilonia, chaqai qarenataxanegue quiyim llic so nashi Ciro relaataxanlec quiyim liỹa qano'xonshiguim añi no'ueenaxanaxaqui quiñi qota'olec quiyi Jerusalén. Ca' vite ca qara'xaỹaxac, qami' qarashi, chaqai cá'maq 'neeta ca ra'deenataxanaxaqui' ma'le quedá'maq shinqac.
