Qaỹo'daauec so 'aallipi ỹoqa'a ca 'laua chicqa'a
1Ca' so Esdras co'na' ñaq nqouagaxaintac, ỹaatqajam noỹenta'ueguelo naua la'qaatqa, ỹa'deesañi naua le'cootal cañi lo'ueenaxanaxaqui ñi qota'olec, ca' qoyicpegue' queso llaalqaipi so Israel, ỹalliripi, 'aallipi chaqai ñaaqaipioqui', ỹaatqajam chalego noỹenaxac lapoỹau'a so'maxare. 2Co'na'le, ca' so Secanías, llaalec so Jehiel, chigoxougui so Elam, 'au retaqa, ca 'naaco' queso Esdras:
—Qomi' sqai qomi' 'xaỹaxanaxaraqa quiñi qota'olec, ma' so'naxaguit ana 'aalo ỹoqa'a ca chicqa'gue, dá'maq se ỹa'maxaren ñi qota'olec. Qalaxam ñaqa 'ue da quitaxac quena llaalqaipi so Israel. 3Ca' qomi' saanaxauec da qara'qaatec quiyim so'daqauec ná'ogue na qaroua 'aallipi ỹoqa'a ca 'laua chicqa'a chaqai na llaalqaipi, qaiyi ipaquichigui da lelaataxanaxac ñi qara'gaxala'. So'ueetaq dá'maq 'ñirac chaqai ná'maq liỹa qomyipi na'xaỹaxane'ta da nelaataxanaxac. 4Ne'laxachirishiguim, ma' dá'maq dajo chi ro'ueenataxanaxaqui'. Ca' qami' sotauanqai'. Ca na'ñaxachi', ca' coñirelec quiyim 'viichi' da'maxare.
5Ca co'na'le, ca' so Esdras nachajñi, ca' ỹaatqajam ỹaanec nqai'en da la'qaatec na netaxaỹaxanqajanqaipi chaqai na lotauaripi chaqai sá'ogue so llaalqaipi so Israel, qaiyi na'maxare ipaquichigui da lasaataxac. Ca' so qomyipi ỹaatqajam saachiguit da na'qaatec. 6Ime, ca' so Esdras ca'e aso no'ueenaxanaxaqui quiñi qota'olec, ca' quepegue' yi la'a' so Johanán só'maq llaalec so Eliasib, ca' hueeta'ñi queso pe. Qam sqaica ca ỹa'ic chaqai se ne'et ma' ỹaatqajam 'xoic da lachicoxo sauaxat se na'maxat ná'maq chita'gue novi' rapil.
7Ca co'na' ime, ca' qaroỹaxanougui so qomyipi quiyim lapoỹata' ma'le quiyi Jerusalén ná'ogue na chita'gue novi' rapil, quená'maq neeta'ñi yi Judá chaqai yi Jerusalén. 8Ca no'm 'ue ca se noviro ma' ỹovirerec saua naloqojonqa tres na'xata', sauá'maq laloqojonqa so na'gaxalateripi chaqai so qo'xoiquipi, ca' qarouootaxana'gue cá'ogue ca la'a', ca' qaỹo'daauec quená'maq chita'gue novi'. 9Ca' vichiguiño' sá'ogue so qomyipi na'ñi yi Judá chaqai yi Benjamín lapoỹata' quiyi Jerusalén queso na'xa'a veinte queso shiraigo nueve na' ỹovirerec saua tres na'xata'. Ca sá'ogue so qomyipi nqa'xanñi queso qom lapooqo' quiñi no'ueenaxanaxaqui quiñi qota'olec, i'loxoltagui sauaxat dajo, chaqai mashic ñijñi so ỹaxat. 10Ca' so netaxaỹaxanqajnec Esdras nachajñi, ca 'naaco' queso qomyipi:
—Qamiri 'uo' da rasauaxashichii, ma' o'ñiiguit na 'aallipi ỹoqa'a ca chigoxougui ni'ic, ca' ỹaatqajam nqo'naxachitec da lasauaxaset na llaalqaipi so Israel. 11Ca' vichiguiño' nagui ỹaatqajam iuanchiguilo qamiri ñi qara'gaxala' ñí'maq qota'olec queso 'auaxaic qareta'allipi, quiyim ỹaatqajam nichoxochita quiyim 'ue da qarasauaxaset chaqai pacqajñichiguilo nauá'maq ỹahotapigui ñi qara'gaxala'. Chaqai lachii' naua lanatqa na qomyipi nauá'maq se nqo'talo ñi qota'olec chaqai najo 'aallipi ỹoqa'a ca ni'ic chicqaugui.
12Ca' sá'ogue so qomyipi saat, qam netenegue da lasaataxac, 'naaco':
—Ajá'a, cá'maq 'ñirac, ca' chaqaida nqaishinaq. 13Qam qomi' 'xoic chaqai ná'maq ỹaxat sqai ỹaxanegue. Chaqai se ỹa'maxañi quiyim seuqata'ñigui na nayic, ma' dajo quiyim qaỹo'uet mesqai qaỹomat queca 'oonoqui' na'xa'a, ma' ỹaatqajam qom 'xoic 'ue da qarasauaxaset. 14Ca' 'maxaraic quiyim no'ueendañi nauá'maq qara'gaxalate' quiyim ỹomateta dajo chaqai quená'ogue ná'maq qara'aate' quená'maq mashic o'ñiguit ana 'aalo ỹoqa'a ca ni'ic chicqaugui, qaỹa'ue ca naloqojnec na'xa'a quiyim novi', liỹaatac ná'maq la'gaxalateripi chaqai ná'maq nimit ca nasauaxaset nera'ñi naua qara'aate', chi ỹovireta'a quiyim ime'uegue da lonogoxonaxac ñi qota'olec sauaxat dajo.
15-16Ca sá'ogue só'maq chita'gue novi' rapil ỹa'maxarenta dá'maq qohine'tegue, qaisoota so Jonatán, só'maq llaalec so Asael, chaqai so Jahazías, llaalec so Ticva, ma' saua'maxare qoshiirelec so Mesulam chaqai so Sabetai chigoxougui so Leví, sauá'maq se ỹa'maxarene' dajo. Ca' so Esdras nca'au'alo, ca 'vii saua roỹaxanalo ỹale' ỹichiñi quiyim ỹaatqajam na'gaxalate'. Ca' queso 'auaxaic na'xa'a quesaua diez shiriguiri, ca sá'ogue so nerecseripi reloxoỹata' quiyim retaqagui dajo. 17Ca' so 'auaxaic na'xa'a queso liỹa ñaaxa qaỹomat quesá'ogue so qomyipi quená'maq o'ñiguit ana 'aalo ỹoqa'a ca ni'ic chicqaugui.
(10.18-43 Lapoỹata' so nimiitaxanaripi quena nasauaxaset quiyim imitaque ca la'maqa' quiyim qaro'ñiguit aca 'aalo ỹoqa'a ca ni'ic chicqaugui.)
44Ca ná'ogue najo o'ñiguit na'le ana 'aalo ỹoqa'a ca ni'ic chicqaugui, qam qaỹo'daauec, liỹa'uegue' nqohin na llaalqaipi.
