Ezequiel 34

₁Ñi qara'gaxala' novita ỹim, ca 'naapiguiỹa': ₂Qami' ỹale, taxahi' quiichigui nqai'ñi' da ỹeenaxat quena neloxoỹaripi quena Israel, 'ñiraco' ma'le quena'maxare: 'Neetasa' da la'qaatec ñi qara'gaxala': ¡Chalego le'xoric ná'maq neloxoỹaripi quena Israel chi ncochiiteguelta'! Qam ná'maq cochiỹa quet ná'maq neloxoỹaripi, aná'maq ilo qagreta. ₃Qamiri ni'chiitapiguilo naua lo'i', chaqai 'viichitac na qatooỹaguii quena laue, chaqai lauachii aná'maq paguec 'uegaxasaxa, qam se quelolliỹa aná'maq qagreta. ₄Qamiri sqo tauañii ana ỹolaaueta qagreta, chaqai se natariñii aná'maq 'ue na ralolaxa, chaqai sqa vii ca laxa' aná'maq qac na lichi, chaqai se rapilaxachiuo aná'maq ỹo'maauec, chaqai sqai daañiỹaque aná'maq na'laañi, ta'ta'a quiyim sqa 'maxachiỹa'gue chaqai 'ue da rqa'viiguii. ₅Ana ilo qagreta qaica ca reloxoỹa'a, chi neuagaxatetajlec, ca' na isecỹac toxonaxai retoxoñigui. ₆Neuagaxajlgoto naua'que naua qari ladocahi chaqai naua quemaralgoto, ỹo'meetajlec quená'ogue na 'laua, chaqai qaica ma' 'ue quet ca hueetapigui lauel quiyim idaanaque.

₇Ca vichiguiño' nagui qamiri neloxoỹaripi, ñaq na'xaỹaxañiỹalo daua ỹa'qaatqa. ₈Ỹim na'gaxala', ñallitalta' queda ñachaalataxac: Na ỹoreta'oguit iseripi toxonaxairipi rocacha chaqai ito ana ilo qagreta, ma' qaica ca reloxoỹa'a. Ná'maq neloxoỹaripi nqaishin se idaanaque ana ilo qagreta. Na neloxoỹaripi chi ncochiiteguelta', qam se cochiỹa aná'maq ilo qagreta. ₉Vichiguiño' qamiri neloxoỹaripi, ñaq na'xaỹaxañiỹalo daua ỹa'qaatqa: ₁₀Ỹim na'gaxala' ỹaatqajam shinapega qamiri: Qamiri neloxoỹaripi nagui qamiri ñpa'guenaxaua', ca' so'laxana'pegue' ana ilo qagreta; souootaxana'gue quiyim loxoita'a, qaiyi totqai chi ncochiiteguelta' qamiri; liỹa yapilaxat ana ilo qagreta, qaiyi tot qaqamita 'guiitac.

₁₁Ỹim na'gaxala' shinac: Chaqaỹim seloxoỹa'a ma'le ana ilo qagreta. ₁₂Shintari' cá'maq neloxoỹaq quelola aca leloxoiqateguese quena' neuagaxatetajlec, ca' chaqaida shintari' squelola ana ilo qagreta; yapilaxat quená'maq hueeta'ñi neuagaxatetac queso na'xa'a napalñi sauaxat so nonot quesaxanaxaic. ₁₃Ñaqata'a quena ỹoqa'a 'laua neetalec, llapoonta', ca' se'xategue dá'maq chi la'a'. Semaxague yaua lqui'ỹaaqate' quenaua qa' ladocahi quiyi Israel, chaqai quena ñaachi, chaqai quenaua'que nauá'maq qoyintalgoto quiyi 'laua. ₁₄Semaxague, ca' squi'ỹaxanegue ná'maq no'uen 'uaqapi quenaua laqalachi' quenaua qa' ladocahi quiyi Israel. Ca' quiyi, ca ishit nco'matec chaqai ỹa'ic ná'maq paguec no'uen 'uaqapi. ₁₅Chaqaỹim ná'maq seloxoỹa'a ma'le ana ilo qagreta, chaqaỹim ná'maq ñco'mataxanaxanec ma'le. Ỹim na'gaxala', se'taxajñi da ỹa'qaatec. ₁₆Sedaanaque ma'le aná'maq qagreta na'laañi, ño'deuo aná'maq ỹo'maauec, aná'maq qagaxai sa'ue ca laxa' na lichi, sotauan aná'maq ỹolaaueta, chaqai scochiỹa aná'maq no'ueenta chaqai 'uegaxasaxa. Ca' ỹim ná'maq ỹaatqajam scochiỹa ma'le.

₁₇Ỹim na'gaxala' shinac: Na'xaỹaxañii qamiri iloipi qagreta. Ỹim so'uet cá'maq ỹa'maqachiguiñi quena qagreta llaalec, ca' soỹootec na quetaq llaalec. ₁₈¿Mese nalootaño' quiyim a'guii ná'maq no'uen 'uaqapi, qam qaiyiita co'viigui ná'maq 'uaqapi no'ueenañi? Ni'chiitapigui na huaxaỹaq richiichiguiñi chaqai colaxachii na liỹa quenaua qapiaachiri. ₁₉Ca' ana ilo qagreta ỹa'ic ma'le na 'uaqapi shi'gue co'viigui chaqai ni'chigui na huaxaỹaq mashic shi'gue colaxachii. ₂₀Vichiguiño' ỹim na'gaxala' shinac caqamiri: So'uet ma'le cá'maq ỹa'maqachiguiñi caná'maq qagreta 'uegaxasaxa chaqai ana po'xoi. ₂₁Qamiri loỹoochihe'oga, maxaitauec aná'maq qaica ca la'ñaxac viita'ahi na ra'daxanaxachii, ca' vire'ta quiyim 'eet. ₂₂Qam ỹim ñca'laxatec ma'le ana ilo qagreta. Sqai saxanegue quiyim qarocachitapigui, ca' so'uet cá'maq ỹa'maqachiguiñi cana qagreta. ₂₃Ỹim so'uet quiyim rapil ma'le so ilaatec David só'maq rashii na'le, ca' sano quiyim qaisoota neloxoỹaq cana qagreta, ca so'maxare reloxoỹa'a ma'le na qagretaipi. ₂₄Ỹim na'gaxala', ỹim qota'olec ma'le quena'maxare chaqai so ilaatec David, ca' lashi. 'Eda dá'maq ỹa'qaatec, ỹim na'gaxala'. ₂₅Ca' sa'ue ca ña'deenaxac ma'le quena'maxare, ca' 'chiñi nqaishin ca la'maxa. Na'laañi nqaishin ma'le na isecỹac toxonaxai quenajo 'laua, qaiyi i'maqajlem ana ilo qagreta quena no'ueenaxa chaqai quiyim laqaugui na 'oochi.

₂₆Ỹim silla'ñi ma'le naqaletenlec nqaishin ma'le ada ñaqa' co'teeta, ca ño'ueenaxat da llicyaxac, chaqai ñila' na ỹaxat no'ueenaxat dá'maq 'neetari', ma' ỹovita ca laloqo'. ₂₇Ana qo'paq quena no'ueenaxa 'ue ma'le ana la, chaqai na nanec quena 'laua qanaqat na la, ca na'maxare i'maqajlem neetalec ná'maq chi na'laua. Ma' ñaqata'a na ỹalamaxareteripi quená'maq la'aquipi, ca ma'le, ca' ỹa'deena'a quiyim ỹim la'gaxala'. ₂₈Ná'maq ỹoqa'a qomyipi tot npa'xanlec ana'maxare, chaqai tot qaretoxoñigui queca toxonaxai. I'maqajlem, tot qaica ca qo'ỹoqochit. ₂₉'Xoic nqaishin na la ca lanecsec, ca' tot ỹoviro'ot ca le'xoric quiyim qopat, chaqai na liỹa qomyipi tot i'neetac na'maxare. ₃₀Ca ma'le, ca' ỹa'deena'a quiyim ỹim la'gaxala' qota'olec salequetaugui yi'maxare, chaqai quiyim yi Israel ỹalamaxaret. Ỹim na'gaxala', se'taxajñi da ỹa'qaatec. ₃₁Qamiri ná'maq ilo qagreta, ná'maq neetalec yi iqui'ỹaxanataxanqa'. Ỹim ná'maq ỹim qota'olec caqamiri. Ỹim na'gaxala', se'taxajñi da ỹa'qaatec.