Ezequiel 3

₂Ca' sauachigui na ỹap, ca so'maxare 'naac quiyim sa'ic so nerec. ₃Na' ime, ca' 'naac caỹim: Qañi' najo nerqaipi saanem qami' nagui, no'xagui nqai'ñi' ana racoomi'.

Ca' ỹim sa'ic, ca' caỹim ỹaatqajam lo'daxaraic 'ec na rapic li'i. ₄Ca na'le, ca 'naac caỹim: Mo'e', quirepegue' 'ñirapega yi llaalqaipi so Israel dá'maq shinac quiyi'maxare. ₅Ỹim se selachita cá'maq mese ra'qaachaxaua'e' quiyim sqai 'xaiguit qami', ta'ta'a yi llaalqaipi so Israel. ₆Se selachita na ỹoreta'oguit qomyipi ỹora'alo naua la'qaatqa sqai 'qa'italo naua la'qaatqa. Ca 'eno'm quet selata qami' na ỹoqa'a qomyipi, na'maxare na'xaỹaxana quet qami'. ₇Qam na llaalqaipi so Israel se na'xaỹaxana qami' ma'le, ma' ỹim ná'maq se na'xaỹaxana. Ná'ogue na llaalqaipi so Israel ỹaatqajam hualoxonyipi chaqai ỹa'ñaxachichigui na lqahic. ₈Qam ỹim so'uet quiyim 'ñaaxaic ñi qashiiqui' chaqai sqaica que'guenalec qami', 'ñiite'm yi qomyipi. ₉So'uet quiyim ra'ñii qami', 'ec na qa', leenaxat diamante, paguec la'ñaxac quena chaqai qa'. Totaxan ro'chi'i', 'neeto' ro'daxachirec ma' na'axachigui na lashic quiyim npa'guene'e' qami'.

₁₀Ime, ca 'naac caỹim: Ỹaatqajam na'xaỹaxañiteta dá'ogue dá'maq shinac caqami' chaqai totaxan 'laxachite. ₁₁Mo'e', 'ajnaxañita ca qauochi' ỹoqa'a ca 'laua neetalec. Ca no'm na'xaỹaxan loqo'm se na'xaỹaxan, qam 'ñiraco' ma'le: Ñi qara'gaxala' 'naac dajo.

₁₂Ca na'le, ca' da lquesaxanaxa ñi qota'olec yi'xajshiguim, ca' queda sqoshiita'gue 'ue so sa'xaỹaque 'ec na nalataxa da lelamaxa na' nachipishiguim da lquesaxanaxa ñi qara'gaxala'. ₁₃Ca' chaqaido' da lelamqa' naua laua' saua ise' quena' queuoquetecta', chaqai saua laviol hueesa'ñi yi'maxare. Da lelamqa' 'ec na nalataxa. ₁₄Ca' da lquesaxanaxa ñi qota'olec naqata'a ỹim quiyi'maxare, ca' ỹim shic, qam se ỹa'maxagui na iuel chaqai sachicota, qam ñi qara'gaxala' lo'qoota'a da iqai'laxat ỹovicqochigui. ₁₅Ca' sovita yi na'a' Tel Abib, hueeto'ot na lahi aso lachiugue Quebar yí'maq neeta'ño' nqohin so Israel llaalqaipi. Ca' siete saua na'xata' senta'anyi, qam se ño'uen, se sa'den cá'maq so'uet chaqai cá'maq shinac.