Qoỹaanot ñi qara'gaxala' so na'daañi 'imec quiyim lauo'
1Ca' ñi qara'gaxala' ỹalamaxachichigui so Moisés, ca 'naaco':
2—Ca 'auaxaic na'xa'a quiñi 'auaxaic shiraigo, ca 'yiriño' ma'le ca na'daañi 'imcoqui'. Ca' quecajo 'imec na'daañi, ca hua'ñi quiyim qanauane'e' aỹim. 3Ca' ñiraugui ma'le añi lahi' naua nelaataxanaxaco, ca' vite ma'le ca viqui' lapooque'. 4Qai'neeta lli'raugui ca lomala' ca pan chaqai añi ncoỹeraxanaxaqui lashi. 'Maxachichiriñi ca lomala' ca pan, ca' nocqajñiro naua lauaq llicshiguim añi ncoỹeraxanaxaqui. 5Qai'neeta pa'xañirauo ca 'oro ncopatoxonaxala' quena nichiinaxanaxat, ca ñi'ra'ñi yi naloote'oga aca lahi' na ỹaqataxaquipi. Ime, ca' viqui' ca lapooque' ca ñigo queca 'imec na'daañi. 6Ime, ca' pa'xañirauo qai'neeta aca ncopatoxonaxalate quena nachitaxanataxanaxat, ñi'ra'ñi yi ñigo quiñi 'imec na'daañi yí'maq hua'ñi quiyim qanauane'e' aỹim. 7Ime, ca ñi'rañigui na lavinñi' ca 'imec chaqai aca ncopatoxonaxalate ca quiỹoxoqui, ca' no'xataxachirigui queca huaxaỹaq. 8Ime, ca' viqui' ca lquepaqataxat yi nasoxoc quenaua lahil chaqai ca lapoxot ca ñigo quiyi nasoxoc.
9Ime, ca' coñita ca aceite cá'maq nocoraxanaxat, ca' cochirelec cajo 'imec chaqai ná'ogue ná'maq hueetaugui ca'maxare. Chaqai ỹaatqajam co'taxachite' ná'maq no'ueetqateripi ca'maxare, ca' cajo 'imec na'daañi lalamaxaret ñi qota'olec. 10Chaqai qai'neeta cochirelec queca aceite aca ncopatoxonaxalate quiyim qaỹavigaxat na nachitaxanataxanaxat chaqai ná'ogue na no'ueetqateripi. Ỹaatqajam qaico'taxateta, ca ca'maxare lalamaxaret ñi qota'olec. 11Chaqai qai'neeta cochirelec queca nocoraxanaxat ca nquiỹoxonaxaqui chaqai na pa'aañi, ca ca'maxare ỹaatqajam qaico'taxateta.
12Ime, ca viqui' ñi Aarón chaqai na llaalqaipi quiñi leseeque'ta ñi lasom quiñi na'daañi 'imcoqui'. Ca' nachile' nqai'ñi'. 13Chaqai ñi Aarón ỹañiñi cauá'maq qaỹauaapigui no'ueetaxaqui' loho. Ime, ca' ñitaxachirelec queca aceite nocoraxanaxat, qaiyi letaxaỹaxanqajnec na qomyipi quiyim retaxaỹa'pegue' aỹim. 14Ime, ca lotqai qanaueguero caua llaalqa, ca lotqai qoỹañiguilo caua loho lo'ueenataxanaxaqui'. 15Ca' cochirelgoto caua'maxare 'nejem nqai'ñi' na'le da 'ñitetegue so Aarón, qaiyi qai'neeta netaxaỹaxanqajanqa quiyim retaxaira'pegue' aỹim. Ca quiyim qaỹocorelgoto queca aceite, ca' taỹaugui quiyim netaxaỹaxanqajanqa, ca' qaica lqodoc da lo'ueenategue'.
Qaỹa'yiñi so 'imec lodegaxat na'daañi lauo' ñi qota'a
16Ca' so Moisés ỹo'uet ipacqajanchigui dá'ogue dá'maq qaỹamaxalec quiñi qara'gaxala'. 17Ca' chaqaida nqai'en, ca na' ỹovire'oga so 'auaxaic na'xa'a queso 'auaxaic shiraigo queso co'uaataxanaxaic ñaaxa na' ime qoyique'e yi Egipto, ca' qaỹa'yiñi so na'daañi 'imec lodegaxat. 18Ca' so Moisés ỹa'yiñi so 'imec na'daañi, ỹa'vii saua lacanqa, ỹa'vii saua qo'pa', ỹa'vii naua saxariguilo, ỹa'chi'iñi saua lashil. 19Ime, ca' ỹaueguelec so lapooque' so na'daañi 'imec lodegaxat. Ime, ca' lotqai pa'xanashiguim so liỹa lapooque' nqai'en na pa'aashiguim. Ca ipaquichigui nqai'en dá'maq qohinapega quiñi qara'gaxala'.
20Ca co'na' ime, ca' so Moisés ỹaconalo saua qari naneretalgoto saua nelaataxanaxaco, ca' illirañigui aso lahi'. Ime, ca ỹaando saua qo'pa' naconqa so na'maqataxanaxaqui, ca' ỹapoñigui queso lapooque'. 21Ime, ca ỹodougui na lauel so 'imec na'daañi. Ca' ỹauec so lapooque', qaiyi pojlec aso lahi' saua naqataxaco. Ca ipaquichigui dá'maq la'qaatec ñi qara'gaxala'.
22Ca' so Moisés qai'neeta pa'xanauo so lomala' na pan, ỹanaugui so na'daañi 'imec lodegaxat, pa'xana'gue da rapiguim, qam pa'xanauec queso lapoxot. 23Ca ỹa'maxachichiguiñi so pan queso lomala', qaiyi qaỹachaxanoto ñi qara'gaxala'. Ca' ipaquichigui nqohin dá'maq 'naaco' ñi qara'gaxala'.
24Pa'xanauo qai'neeta so lashi na ncoỹeraxanaxat queso 'imec, nalo'chiguit so pan lomala', pa'aata'gue nqai'en da 'guiñi quena lauel so 'imec na'daañi. 25Ca' copata'alo' na'le saua ncoỹeraxanaxaqui', ca' ỹachaxanoto ñi qara'gaxala'. Ca' ỹaatqajam ipaquichigui nqai'en dá'maq la'qaatec ñi'maxare.
26Ca' so Moisés pa'xanauo qai'neeta so 'oro ncopatoxonaxala' quena lauel, naloote'oga nqai'en yi napoxonaxat. 27Ime, ca' illaalec so nichiinaxanaxat lo'daxaraic na lahita, ca ỹavigaxat, dá'maq chaqai 'naaco' na'le ñi qara'gaxala'.
28Co'na' ime, ca' so Moisés ỹauec so lapooque' ñi ñigo quiñi 'imec lodegaxat. 29Ime, ca' ỹo'uet aso ncopatoxonaxalate quiyim qaỹavigaxat na nachitaxanataxanaxat, ỹana'ñi yi naloote'oga so lasom so 'imec lodegaxat. Ime, ca' ỹa'ue lachitaxanataxanaxat quena iseripi ỹavigaxat chaqai na lamoxoỹaxa na trigo. Ca' ipaquichigui nqai'en dá'maq 'naaco' ñi qara'gaxala'.
30Ca' so Moisés ỹa'ue qai'neeta so huaxaỹaq lahi', ỹanañigui na lavinñi quiyi naloote'oga so 'imec chaqai aso ncopatoxonaxalate. Ca ỹocorigui queso huaxaỹaq, qaiyi qanquiỹogui. 31Ca' chaqaiyi ỹachigoxota'ñi so Moisés chaqai so Aarón na nquiỹoxot, chaqai so llaalqaipi, quena' quiỹo' naua lqai'laqate' chaqai naua lichil. 32Ca saua'maxare ỹaatqajam nquiỹoote' quena' inoxondougui ca 'imec lodegaxat chaqai quena' qanqo'neu'a aso ncopatoxonaxalate, ma' chaqaido' dá'maq 'naaco' na'le ñi qara'gaxala' queso Moisés.
33Ca co'na' ime dá'ogue, ca' so Moisés ỹo'uet so lapooque', ỹapou'a so 'imec lodegaxat na'daañi chaqai aso ncopatoxonaxalate, chaqai ỹauec so lapoxot so lasom so nasoxoc.
So naueguelec hueetalec so 'imec na'daañi
Ca co'na' so Moisés ỹomat quiyim ỹa'yiñi so 'imec na'daañi quiyim qanauane'e' ñi qota'olec. 34Ca' so naueguelec pojlec nqai'en so 'imec, ca' da lauaq ñi qara'gaxala' ỹaatqajam no'xataxachichigui so'maxare. 35Ca' so Moisés se ishit inoxono queso 'imec, ma' so naueguelec ỹaatqajam nalojlec so'maxare chaqai da lauaq ñi qara'gaxala' ỹaatqajam no'xataxachichigui na lauel. 36Ca co'quena' naỹoxonshiguim so naueguelec queso 'imec, ca' so Israel llaalqaipi ca' ca'e yí'maq neeta'ñi, lotqai eec quecá'maq taỹa'gue. 37Qam no'm se naỹoxonshiguim so naueguelec, ca' so qomyipi qai'neeta se ishit lachi. Ta'ta'a quiyim nauaane'ta so naueguelec quiyim naỹoxonshiguim. 38Quedá'ogue dá'maq taỹa'gue so Israel llaalqaipi, sá'ogue idaanto'o' quen so naueguelec hueetaugui ñi qara'gaxala' hueetalec so 'imec na'daañi quiyi na'xa'a, qam co'quena' pe, ca' naviguec.
