Qaỹo'uet so nachitaxanataxanaxat queso qaỹa'daañi 'imec lodegaxat
1Ca' ñi qara'gaxala' 'naapego' so Moisés:
2—'Ñirapega ma'le na Israel llaalqaipi quiyim nodou'a aỹim na lachitaxanataxanaxat. Ca ná'ogue lapoon na lame ỹaatqajam qaica ca huapigui na lauel quiyim ỹa'ue ca lame caỹim. 3Ca ma'le, ca' nodouo' na 'oro, chaqai na plata, chaqai na cobre, 4chaqai ana lepate lo'lo naueralec da lecolaxa, chaqai na naueralec da letogaxa, chaqai ná'maq ỹaatqajam toc, chaqai na no'uen lepate nesateta, chaqai na quetaq laue, 5chaqai na qagreta loua' loshicmaxa nqo'lecsec toc nqohin, chaqai na 'alolec loshicmaxa, chaqai na qo'paq leenaxat acacia, 6chaqai aceite lavigaxat ana ncoỹeraxanaxaqui, chaqai lo'daxaraic lahita lalegue' na aceite quiyim 'ue ca qaỹocorelec, chaqai locoraxat ca nichiinaxanaxat quiyim lo'daxaraic lahita nqohin na lesalaxaripi, 7chaqai na qa' leenaxat cornalina, chaqai na liỹa qa' qaỹahotaque no'ueetaxat na nepo' leenaxat efod, chaqai ca lallaacsec ca la'gaxala' na netaxaỹaxanqajanqaipi quena' qaretaxaỹa'pegue' aỹim. 8Chaqai 'viichii ca na'daañi 'imec lodegaxat, qaiyi sentañiguilo qamiri ma'le. 9Qam cajo 'imec na'daañi cá'maq sentaugui ma'le, chaqai ca laseripi, ỹaatqajam denaxachichirigui da no'ueenataxac cá'maq sachaxanem qami' ma'le.
Aso lahi' da 'maqataxac
10Ca qaỹo'uet ma'le aca na'maqataxanaxaqui, qaỹa'data' na qo'paq leenaxat acacia. Ca un metro chaqai yi diez centímetros ladoquejlec nqohin, chaqai sesenta y cinco centímetros yi leca'gue, chaqai sesenta y cinco centímetros da lishiiquishi'megue. 11Ca 'miiñilec quena 'oro na lauel chaqai na pa'aauec. Chaqai naua lahil, ca' quelgoto nqai'ñii' na 'oro. 12Chaqai 'viichi' ma'le caua cuatro dególla chigoqchiraugui na 'oro. Ca nocqajñiro quenaua cuatro lasoguel caca'maxare, dos dególla que'óna lahi, chaqai da liỹa lahi, ca' lotqai dos. 13'Viichi' qai'neeta caua qo'paq saxarigui, chigoqchiraugui na qo'paq leenaxat acacia, ca 'miiñirelec quena 'oro. 14Ca nocqajñiro queetouguilo nqai'ñi' caua dególla neesau'e na lahi aca ro'ueenata'e', ca' chi neconqa ma' qai'xat. 15Ca chaqa'ma' tot naqachi'; leneesagui caua dególla quena lahi aca ro'ueenata'e'. 16Ca lli'ragui aca ro'ueenata'e' dá'maq ilaataxanaxaquipi saanem qami' ma'le.
17Ca 'viichi' aca lapooquete nodaachiguiñi 'oro nqai'ñi'. Un metro chaqai yi diez centímetros da ladoquejlec, chaqai sesenta y cinco centímetros da leca'gue. 18Ca ñi'ralgoto caua dos nadenqatqa piguim lase' 'vii laua' imerañi 'oro. Ma' qaỹo'ueete', ca qaỹahote'e na notogoxosoxonaxat, ca qoỹana'guita naua dos lo'lo'. 19Ca lapooquete chaqai caua nadenqatqa 'vii laua', caua'que ima'ta'. Ca 'óna quecaua'maxare hueeta'gue na lo'lo, chaqai ca liỹa queda liỹa lo'lo. 20Ca 'óna reloqota'guit ca liỹa, qam na'iisa'ña aca lapooquete. Ca' naua laua' ỹiquesauec, nalooterelec aca lapooquete, 'ec la'altalec nqai'ne'. 21Ca lli'rañigui ma'le caua nelaataxanaxaco saanema qami' ma'le, ca po'iri'ñigui ma'le aca ro'ueenata'e' caca lapooquete. 22Ca' quiyi hua'ñi ma'le, ca ñauane'e' qami'. Ca quena pa'aashiguim caca lapooquete, ca' quena lavinñi quecaua dos nadenqatqa 'vii laua', ca' sa'deenaxanaxanegue qami' na ilaataxanaxaquipi taỹaugui na Israel llaalqaipi.
(25.23—31.18 Najo, ca' ỹa'xat na' qano'xonshiguim yi lanatqa' ñi qota'olec chaqai ná'maq louenqaipi, chaqai quena' qoỹaanshiguim na netaxaỹaxanqajanqaipi, chaqai quena' qanqouagaxainot ñi qota'olec.)
