Éxodo 23

₁Sqai 'xachi' cá'maq chi na'qaataxanaxac quiyim sqai llic, chaqai sqai qoshi'relec cá'maq ỹo'uet cá'maq se no'uen.

₂Chaqai sqo quire'uegue ca 'xoic qomyipi ỹahotaque que'uegue cá'maq se no'uen.

Ca quiyim ỹovita 'xachi' ca na'qaataxanaxac, ca 'neeto' qoshi'relec cá'maq retañi' quiyim sqai llic, 'eno'm ca 'xoic qomyipi llic nqai'en. ₃Qam 'neeto' lotqai qoshi'relec cá'maq qom 'xoic le'xoric quiyim sqa taagui ca leloxoỹaxac.

₄No'm huañiterelec ca lalo na'laañi ca npa'guenaxaua'e', ñii'lola loqo'm 'ashin, ca pilaxachitem. ₅'Neeto' lotqai sqo tauañi' cá'maq qami' loquiiaxat. Chaqai no'm ca lalo 'ashin hua'ansop ca lesallaxa ca li'ỹaac, ca' tauañi' quiyim qanaqat ca li'ỹaac.

₆'Neeto' lotqai se quelollita ca 'xoraic, no'm reloqota'guit ca nashi queca ỹo'ueetetac.

₇'Neeto' lotqai 'isapegueu'a ca na'qaataxanaxac quiyim sqai llic, chaqai sqai 'ỹaañichiguit quiyim qaỹalauat cá'maq sqaica ca taỹapegueu'a chaqai quiyim sqaica ca lasauaxaset. Ma' ỹim sqai shinac sqaica ca lasauaxaset cá'maq 'ue ca ỹasauaxat.

₈'Neeto' coñichiguit aca nishivichi'i' quiyim qoshi'relec ca se no'uen, ma' ca chaqai shiuete, ca 'ec qai'laqachit ca qom, ca cá'maq qaica ca taỹapegueu'a, ca na'laxatañi cá'maq 'neeta'pegue.

₉Chaqai sqai 'ñiỹari' cá'maq ỹoqa'a ca chicqa'gue, ma' qamiri ỹoqa'a ca chicqoỹa'gue na' ñiita'gue da Egipto, ca' mashic 'yiiñii dá'maq 'neeta quiyim 'ue ca ỹoqa'a ca neeta'gue.

₁₀Saugaxañi', danaxañi', ca' lapooñi' ca qadañicshiqui' la quecaua seis ñaxari. ₁₁Qam ma' ỹovire'oga ca liỹa ñaaxa, ca' se nasauguii ca'maxare. Nco'mataxañirec, qaiyi na qom 'xoraic neetalec na na'lauahi ishit ỹa'ic ca qadañicshiguii, chaqai qaiyi ná'maq iseripi huelecna ỹa'ic ná'maq no'ueenañi. Ca' chaqaida 'ñii'tegue qai'neeta quena qadanaxanqari 'uva loma' chaqai na 'olivo loma'.

₁₂Ca' quecaua seis na'xata', ca 'viichi' cá'maq ro'ueenachiqui'. Qam queca liỹa na'xa'a, ca nco'machirec, qaiyi nco'matec qai'neeta ca qalo'e' nauegaxanaxala' ñii'lola chaqai ca qalo'e' 'ashin, qaiyi rapil ca lquesaxanaxa ca relaachiqui' chaqai cá'maq ỹoqa'a ca chicqa'gue.

₁₃Ca' pacqajñichigui dá'ogue dá'maq shinac caqamiri, chaqai quiyim sqaica ma' 'ue quet ca qara'xaỹa caqamiri ca leenaxat ca liỹa nashiilec.

₁₄Vite ca nemaqachic, tres yimaqachiñi' quiyi ñaaxa. ₁₅Vii ca lemaqachic ca pan sqaca ana lalequete pe'taxachigui. Ipaquichigui nqai'ñii dá'maq ỹa'qaatec, ca' queca ma'le, ca' 'guii cajo pan quecaua siete na'xata'. Yí'maq laloqo' nqohin cajo nemaqachic viichigui nqohin ca shiraigo leenaxat Abib, ma' quecajo shiraigo na'le quiỹa'e yi Egipto. Ca' sqaica quet cá'maq novira'a aỹim no'm sqaica ca nachiitauo lame.

₁₆Qai'neeta 'viichi' nemaqachic ma' ỹovire'oga ca laloqo' quiyim naqachi' ca ala 'auaxaic ca qadañicshiguii ca ñi'riñi quecá'maq na'laua'e'. Qaican ỹapaguec ma' qataxañi' ma' ime ca ñaaxa ma' ime naqachi' ca la cá'ogue cá'maq qadañicshiqui'.

₁₇Ná'ogue na ỹalliripi tres ỹovira'a quiyim yimaqachin quiyi ñaaxa.