Éxodo 20

₁Nauajo' nauá'maq la'qaatqa ñi qota'olec co'na' retaqa, ca 'naaco':

₂—Ỹim ná'maq ỹim ra'gaxalari qota'olec naqaterec qamiri na'le quiyi Egipto na' qamiri na'aqa.

₃Sqaico' ca liỹa rashiilliguii, chaqaỹimeta.

₄Totaxan 'viichiỹo' ca rashiilliguii re'oq chaqai vire'ta ca radenqachigui quena hueeto'ot na piguim, chaqai vire'ta quená'maq hueetalec na 'laua, chaqai vire'ta quená'maq 'ue hueetañigui ana huaaxai pa'aatañi quena 'laua. ₅Ca' se ni'iiñi quiyim 'yiỹoto naua re'cootallii na'maxare, chaqai sqai maqachiñii. Ma' ỹim ná'maq ỹim ra'gaxalari qota'olec, ma' ỹim qota'olec sqaican sa'maxaren. Ca' ỹim sa'ue ca nouaxanaxaset cá'maq se no'uen queca neta'a quiyim se nqo'chiiua', chaqai ca llaalqaipi, chaqai ca lauaripi, chaqai ca llaalqaipi ca lauaripi. ₆Qam ỹaatqajam se'xoren chaqai ỹaatqajam se neme da i'xorenataxanaxa quena llaalqaipi cá'maq yi'xoren chaqai ỹo'ueete' naua ilaataxanaxaco.

₇'Neeto' chaqai 'ñiỹa'gue quiyim 'xachii da ỹeenaxat ỹim ra'gaxalari qota'olec, ma' ỹim sqaica ma' sqaica quet ca nouaxanaxaset nqaishin cá'maq chaqai 'na'gue da ỹeenaxat.

₈'Neeto' couahi'e yi na'xa'a co'mataxaqui quiyim yimaqachiñii. ₉'Ueenataxañiiguilo yaua seis na'xata', 'ueenataxañiiguilo quecanchaqaica 'viichi'. ₁₀Qam quecajo liỹa na'xa'a, ca' chaqaica cá'maq co'mataxaqui, ca' chaqaica cá'maq viichigui quiyim yimaqachiñii ỹim ra'gaxalari qota'olec. Qaico' ca 'viichi' quecajo na'xa'a, chaqai ca qachaalqui' chaqai aca qachaalli'i', chaqai ca ra'aqui' loqo'm aca ra'a'e', chaqai caua qalohi', chaqai ca qom chicqauec neetauguilo qamiri queca ra'aari. ₁₁Ma' ỹim ra'gaxalari quecaua seis na'xata', ca so'uet na'le na piguim, na 'laua, ana huaaxai, chaqai ná'ogue nanchaqaina 'ue quena'maxare. Ca ñco'matec na' ime' saua seis na'xata'. Vichiguiño' lloyagaxat da ỹa'qaatec quesojo na'xa'a ñco'mataxaqui, ca soỹoote'oga quiyim sauaaque qayimaqachin quesojo na'xa'a.

₁₂Na'xaỹaxañita ca qataa'i' chaqai aca qachii'i', qaiyi ladoc aca rqauaxagui'i' quena 'laua ná'maq saanem qami' ỹim ra'gaxalachi' qota'olec.

₁₃Sqa lauataxañi'.

₁₄Se nanoiquiñichiguit aca se roua'e'.

₁₅Sqo cuachi'.

₁₆Se na'majñi' quiyim cuachirau'a ca 'xachi' se no'uen quecanchaqaica qom.

₁₇'Neeto' lotqai 'ue ca ripichisa'a coñita queca la'a' quecanchaqaica qom. 'Neeto' ripichisa'a aca loua, chaqai ca la'ac loqo'm aca la'a, loqo'm ca lauegaxanaxala' ñii'lola, loqo'm ca lalo 'ashin, loqo'm canchaqaica quena louenqaipi.

₁₈Ca sá'ogue so Israel llaalqaipi ỹaatqajam iuanchigui so soxonaxallipi, chaqai so nqai'legaxaripi, so lelamaxa aso npe'tellipi, chaqai aso quemaralec qa' ladocai pojlec queso nesalaxaripi. Ca' ỹaatqajam 'ue da lqolonaxa, ca' se ishit nqo'neuo. ₁₉Ca co'na'le, ca qohinapego' so Moisés:

—Qaqamite' taqaira'pegueto qomi', ca cá'maq 'ñirac, ca ña'xaỹaxanqa'ta. Qam quiyim se retaxaỹa'pegueto qomi' ñi qota'olec. ¡'Ase' no'm qareleu!

₂₀Ca' so Moisés 'naaco':

—Totaxan ro'chii. Ma' ñi qota'olec novi', qam ri'guiñi, qaiyi se neme quiyim ro'chiỹa ñi'maxare, qaiyi sqai 'viichii ca rasauaxashichii.

₂₁Ca na' ñaqai qoỹoqote'oga so qomyipi, ca' so Moisés nqo'neu'a so napalligui naueguelec só'maq hueetaugui ñi qota'olec.