Ester 9

₁Ca' so na'xa'a trece queso pa'aatec shiraigo quesaua doce shiriguiri, só'maq leenaxat Adar, ca' chaqaiso viichigui quiyim qaipacqajanchigui dá'maq dalaxaic la'qaatec so nashi, chaqai viichigui qai'neeta so na'xa'a quiyim ná'maq npa'guenaxaua so judioipi ỹahotaque doxonaxan, qam lotqai na judioipi loxonqaipi so'maxare. ₂Ca naua'que naua 'lauari reloqota'alo so nashi Asuero, na judioipi lapoota'ta' quena na'aateripi quená'maq neeta'ñi, quiyim ỹahotaque nalauate'e' ná'maq ỹahotaque nalauajñi so'maxare. Qam qaica ca ishit quiyim reloqoguit so judioipi, ma' ỹaatqajam 'xoic da lqolonaxa ná'ogue ná'maq ỹalequeta'guit ỹoreta'oguit qomyipi. ₃Ca ná'ogue na nashillipi chaqai ná'maq reloqota'alo naua 'lauari chaqai ná'maq 'xoic lecaic na loma', ỹaatqajam qoshiiteguelec na judioipi, ma' qano'cha'a so Mardoqueo. ₄Ma' chaqaiso só'maq ỹapacauec quiyi la'a' so nashi, chaqai da lichoxoric mashic huaguec quiyaua'que yaua 'lauari, chaqai nqo'neetauec da lquesaxanaxa. ₅Ca' so judioipi ỹahote'e na lecat, ca ỹaatqajam nomachichiguiñi so npa'guenaxauaripi, qaica ca no'ueenashiguim nqai'en, ca' ỹoiquentac quecá'maq 'neeta'gue. ₆Ca' qaiyiita quiyi na'a' lodegaxat Susa ỹalauato' so quinientos ỹalliripi. ₇Ỹalauato' qai'neeta so Parsandata, Dalfón, Aspata, ₈Porata, Adalía, Aridata, ₉Parmasta, Arisai, Aridai chaqai so Vaizata. ₁₀Saua'maxare chaqaisauo' saua diez llaalqa so Amán, só'maq npa'guenaxaua na judioipi. Qam qaica ca qaicona quena louenqaipi.

₁₁Ca' chaqaiso so na'xa'a, ca' so nashi ỹa'deeno' ỹorete' só'maq qaỹalauat quiyi na'a' lodegaxat Susa. ₁₂Ca 'naaco' caso nashi Ester:

—Na judioipi ỹovi' quinientos na lalauatqaipi, chaqai ỹalauate' qai'neeta yaua diez llaalqa so Amán quena na'a' lodegaxat Susa. Chaqai ¿nega'ỹo' ca liỹa ỹo'uet quenaua liỹa' 'lauari quena seloqota'a? ¡Nagui, ca 'ñirac negue' cá'maq liỹa vi'saque, ca' saañiraxarom!

₁₃Ca' aso Ester 'naaco':

—No'm 'maxariñite', qami' ỹashi, chaqai no'm ỹa'maqachiguiñi nqai'ñi' quiyim na judioipi quiyim nete'e ỹo'uet ipacqajanchigui na 'maqataxac, ca' qaicoñitoto naua lqosoochi', ca' ỹaviquishiguim cada ncoñiitaxanaxalate yaua diez llaalqa so Amán.

₁₄Ca' so nashi 'naac quiyim chaqaida qohine'tegue, ca lotqai qaiuagaxatec dajo quiyi Susa. Ca' qaicoñichishiguim saua loshicma' saua diez llaalqa so Amán.

₁₅Ca só'maq judioipi quesó'maq neeta'ñi yi Susa, lotqai liỹa lapoỹata' queso na'xa'a catorce queso shiraigo Adar, ca qaỹalauat so trescientos ỹalliripi liỹa, qam sqaica ca qaicona quena louenec. _16-17Ca' na judioipi ná'maq neetalgoto naua liỹa' 'lauari, lapoỹata' queso na'xa'a trece quesojo shiraigo, ma' ỹahotaque quiyim reloquilec dá'maq chi nachaalataxac, qaiyi qoỹaxanñi quena npa'guenaxauaripi, ca' ỹalauato' so setenta y cinco mil queso'maxare. Qam sqaica ca icona quena louenqaipi. Ca' queso na'xa'a catorce, ca nco'matec, ca qaỹo'uet so nqui'ỹaxac, ma' 'xoic da toonaxac.

₁₈Qam ma' so judioipi só'maq neeta'ñi yi Susa lapoota'ta' queso na'xa'a trece chaqai so catorce, ca' nco'matec queso na'xa'a quince. Qam qai'neeta ỹo'uet so nqui'ỹaxac chaqai 'xoic da na'maxa. ₁₉Qam na judioipi quená'maq na'aate' leta'al chaqai quenaua na'aaterolqai' quená'maq sqaica ca lquepaxaset, ca ỹo'ueeto' quen ca lemaqachic, illiichigui yi na'xa'a catorce quiyi shiraigo Adar, ca 'xoico' quen da toonaxac queso nemaqachic, ca' quiñi 'óna ỹa'ue ca lame queca liỹa.

₂₀Ca' so Mardoqueo ỹeretañi dá'ogue dajo, ca ila' ana lelaata quesá'ogue so judioipi quená'maq neetalgoto naua 'lauari reloqota'alo so Asuero, quenauá'maq sqoỹoqapigui chaqai quenauá'maq qoỹore'talo. ₂₁Qohinapega quiyim ỹo'uet sojo nemaqachic quena' ỹovire'ogalo saua na'xata' catorce chaqai quince queso shiraigo Adar quena' ỹovirec yi ñaaxa. ₂₂Ma' sojo na'xa'a viichigui na' so judioipi ỹoỹoote'oga so npa'guenaxauaripi, chaqai ma' sojo shiraigo viichigui so chalego lecaic nachicoxo chaqai so naualaxaquipi queda nqui'ic, ca' ñigui queso judioipi toonaxac chaqai nemaqachic. Ca' quesauajo na'xata', ca' qaỹo'uet ca nqui'ỹaxac chaqai ca toonaxac, chaqai nachijta', chaqai ỹa'ue na lame quena 'xoraiquipi. ₂₃Ca' so judioipi ñigui nemaqachic na'xa'a nqai'en dajo chaqai dá'maq ỹiriño' na'le so Mardoqueo. ₂₄Ma' so Amán só'maq npa'guenaxaua sá'ogue so judioipi 'uo' da la'deenataxanaxac quiyim nomachichiguiñi, ca ỹa'uo' da llitaxac quiyim nalauajñi chaqai nopoxoỹaxajñi. ₂₅Qam co'na' aso Ester ỹovira'a so nashi, ca so'maxare chilnataxanegue quiyim qoỹeretañi dá'ogue dá'maq se no'uen la'deenataxanaxaco' na'le so Amán queso judioipi, ca pa'aalec nqohin so'maxare. Ca chaqaido' da 'neeto' na'le na' so Amán chaqai so llaalqaipi qaicoñirerashiguim. ₂₆Ca vichiguiño' quedajo, ca sauajo na'xata' qaỹamata'que purim, ca' dajo dá'maq pilac na'qaatec pur.

Ca' chaqaido' dá'maq 'neeto' na' ipaquichigui nqohin aso lelaata so Mardoqueo quedá'maq qaiuanchigui chaqai dá'maq 'neesari'o' na'le, ₂₇ca' so judioipi ỹo'viijño' na'le quiyim chi lemaqachic chaqai queso llaalqaipi, chaqai quesá'ogue só'maq nanerouquio' na'le so judioipi: ca ỹo'uet quiyim lemaqachic quenaua'que naua ñaxari, se coua'ahi sauajo na'xata', ipaquichigui nqai'en dá'maq qohinaco' na'le; ₂₈chaqai quiyim no'leentaqate' sauajo na'xata' viichigui nqohin da nemaqachic ỹocane' naua'que naua ñaxari quena llaalqaipi quiñi 'óna quena 'laua chaqai queca na'a' lodegaxat, qaiyi se na'laañi da no'leentaxa quena judioipi chaqai quena llaalqaipi. ₂₉Ca' aso nashi Ester asó'maq llaale so Abihail, chaqai so Mardoqueo só'maq judío le'ec, ỹichiñi aso liỹa lere, ma' mashic 'ue da 'netegue ỹiquesapigui so nemaqachic leenaxat Purim, ca' qai'taxajñi asó'maq 'auaxai nelaata. ₃₀Ca' qailata na judioipi ná'maq neetalgoto yaua ciento veintisiete 'lauari reloqota'alo so nashi Asuero, qaỹa'maxate'teguelo naua na'qaatqa. ₃₁Ca' qarelaataxanlec quiyim qaỹo'uet sojo nemaqachic qaỹamata'gue Purim quesó'maq qoỹicagui na'xa'a, qaipacqajanchigui dá'maq 'nerac saua Mardoqueo chaqai aso nashi Ester, taỹaugui so'maxare chaqai na llaalqaipi. Chaqai chaqa'ma' qaỹoqotero dauá'maq liỹa' naqataxaco da nqopaaqachitaxac chaqai da oỹenaxac. ₃₂Ca' da lelaataxanaxac aso Ester, ca chaqa'ma' qai'taxajñi llicyaxac quiyim qaỹa'ue ca nemaqachic Purim. Ca sá'ogue sojo qoỹeretañi caso lere.