Deuteronomio 21

₁₅Ca no'm 'ue ca ỹale dos caua loua', qam 'ue acá'maq paguec lqo'itqate, qam caua'que co'oone', ca no'm cá'maq 'auaxaic llaalec late'e acá'maq sqailligueme' nqo'ta, ₁₆ca ma' ỹovita ca na'xa'a quiyim cajo ỹale ỹasectaxachigui ca louenqaipi queca llaalqaipi, mesqai 'ec ỹi llaalec nqai'en cá'maq llaalec acá'maq paguec nqo'ta loua, ma' na'axat ma'le cá'maq llaalec acá'maq loua se nqo'ta, ma' chaqaica cá'maq ỹaatqajam la'auaxanec llaalec. ₁₇Ca' ipacqajanchigui quiyim chaqaica cá'maq ỹaatqajam ỹi llaalec, ca' ỹapacauec cá'maq ỹaanem quecá'maq lesallaxa, ma' chaqaica cá'maq 'auaxaic llaalec chicqochigui dá'maq lquesaxanaxa. Ca' chaqaica cá'maq ỹaatqajam taalec nqohin ca nesallaxa, ma' chaqaica cá'maq ỹi ñaalec.

₁₈No'm 'ue ca qom 'ue ca llaalec se na'xaỹaxan chaqai taxaỹaxai quiyim ỹaatqajam se na'xaỹaxanalo caua leta'al, ỹovire'ta quiyim qaỹouaxan, qam qaiyiita se na'xaỹaxan, ₁₉ca' caua leta'al ỹaueguera'a cá'maq letaxaỹaqa' na qo'xoiquipi neeta'ñi ca na'a'. ₂₀Ca 'nerac: Ñi qochaalec ỹaatqajam se na'xaỹaxanalo qomi', chaqai ỹaatqajam iualaxain ana lam, chaqai ne'taaxai. ₂₁Ca cá'ogue cá'maq qomyipi na'ñi cajo na'a' ỹalauat ca'maxare, ỹodoota'a na qa'. Ca' 'eda qohine'tegue, qaiyi qanaqat ná'ogue ná'maq se no'uen hueetaugui na qomyipi. Ca ma' ỹa'den na llaalqaipi so Israel, ca' no'chi.

₂₂Ca no'm 'ue ca ỹale qoỹañiguit ca lelauaxa, ca' qaicoñirashiguim caca qo'paq quiyim chalego lecaic ca lasauaxaset, ₂₃ca' ca loshicmaxa sqai neetashiguim nqohin quecá'ogue ca pe. Ta'ta'a quiyim qaishinñi queca na'xa'a, ma' chicqo'ot ñi qota'olec ca nouaxanaxaset cá'maq qaicoñirashiguim caca qo'paq. Ca' se napio'o nqai'ñii ca 'laua ỹaanema qamiri ñi qara'gaxala' qota'olec, ỹauaaque quiyim ralamaxarichii ra'aari.