Deuteronomio 18

₉Ca ma' noxoñiu'a ca 'laua cá'maq ỹaanema qamiri ma'le ñi qara'gaxala' qota'olec caqamiri, 'neeto' denaxachii da qanaqaica'a no'ueenataxac na ỹoqa'a qomyipi. ₁₀Quiyim qaica ca 'oonoqui' qom caqamiri quiyim ỹaanot ca llaalec ca nqolac quiyim qaỹavigaxat qainaxañigui ca norec, chaqai se napaxaguiñiỹa quiyim nachiñichigui ca 'neetari' ca liỹa, chaqai 'neeto' 'xachi'sac ca ñaqa naataho, chaqai 'neeto' qami' 'naxanaxai ₁₁chaqai da npachoxonaxac, chaqai sqai nachi' cá'maq nachinchigui quiyim 'ue ca ỹa'xat chaqai ná'maq retaxaỹa'pegue' na nqui'illipi, chaqai sqai taxaỹa'pegue' na leuaxaiquipi. ₁₂Ma' ñi qara'gaxala' ỹaatqajam naqaica'a cá'maq ỹo'ueetetac dajo. Chaqai no'm ñi qara'gaxala' qota'olec caqamiri ỹo'daauec na qomyipi neetalec najo 'laua, ma' chaqaida dá'maq 'neeta quiyim naqaica'a da lanatec. ₁₃Ca' qamiri no'uen quiyim na'maxachita quedá'maq 'ñiitari' quiñi qota'olec. ₁₄Yi qomyipi yí'maq neetalec yijo 'laua ñiỹalec ma'le qamiri, yi'maxare ỹaatqajam huelec ná'maq ỹa'xateta'guita naua se re'xoguilo chaqai ná'maq idaanau'alo naua 'ueenataxaco. Qam caqamiri ñi qara'gaxala' qota'olec se ỹasenema qamiri cá'maq 'nejem dajo.

₁₅Ñi qara'gaxala' qota'olec ỹo'uet ma'le quiyim chicqotouguilo qamiri ca letaxaỹaxaqui 'nejem aỹim, ca' na'xaỹaxañiỹa ca'maxare ma'le. ₁₆Ca' quedajo, ca' ỹaatqajam lliqueta ipaquichigui dá'maq rashiilaxanaxaguii quiñi qara'gaxala' qota'olec cada qa' ladocai leenaxat Horeb queca na'xa'a na' qamiá'ogue lapohita'ta' quiyi'maxare. Ca' 'ñiỹac: Tot sa'maxarenaq liỹa sa'xaỹaxa ca lavilshaxac ñi qara'gaxala' qota'olec chaqai quiyim seuanaxa najo chalego lecaic norec, qaiyi se qareleu. ₁₇Ca na'le, ca' ñi qara'gaxala' 'naac caỹim: Ỹa'maqachiguiñi dá'maq 'ñiỹac na'le. ₁₈Ca' ỹim so'uet ma'le ca itaxaỹaxaqui sachigoxotetougui najo qomyipi 'nejem qami'. Ca'maxare chi lauo' le'ec na'maxare. Ca ca'maxare 'naapega ma'le quedá'maq selarelec quiyim ỹa'xat, ca lotqai liỹa pilalec ỹa'xat dá'maq selarelec. ₁₉Ca ná'ogue ná'maq se na'xaỹaxana cajo itaxaỹaxaqui, ca 'ue ca na'xa'a, ca' semit. ₂₀Qam ca netaxaỹaxaqui 'naac quiyim ỹa'xat ca ỹa'qaatec, qam ỹa'xat cá'maq sqai shinapega quiyim ỹa'xat, loqo'm ỹa'xat ca la'qaatec ca liỹa nashiilec, ca ca'maxare qaỹalauat. ₂₁Ca no'm qamiri 'deenataxañitac 'ñiỹacsa': ¿Negue' quet cá'maq 'neeta quiyim sa'deenaq dá'maq qaỹa'xatetac quiyim se la'qaatec ñi qara'gaxala'? Ca' qamiri se couahi'e dajo: ₂₂No'm ca la'qaatec ca netaxaỹaxaqui 'naac quiyim la'qaatec ñi qara'gaxala', qam se ipaguigui cá'maq ỹa'xat, ca' chaqaida retañiguii quiyim ñi qara'gaxala' se ra'qaataxan nqai'en ca'maxare. Ca ca'maxare 'ue da nemaqajnaxac, ca' chi iconejlec quiyim ra'qaataxan. Ca' ca'maxare qamiri se ro'chiỹa.