Hechos 22

₁—Qamiri ỹaqaỹarolqa, chaqai qamiri ita'alolqa, ñaq na'xaỹaxañiua' quedá'maq shim sa'xat caqamiri quedá'maq ño'ueenataxac.

₂Ca co'na' qara'xaỹa quiyim ỹa'xate' naua chi la'qaatqa, ca paguec qana'xaỹaxane'ta. Ca' so Pablo 'naaco':

₃—Aỹim judío le'ec. Ñi'xaỹoqsoqo' yi Tarso huaugui yi 'laua Cilicia. Qam seỹa'ñi najo Jerusalén, chaqai ñapaxaguinqo' so Gamaliel, ỹapaxaguinegue aỹim ná'ogue na nelaataxanaxaquipi nachiñi'chiguit quesaua 'auaxaqa sachigoxosqauguilo. Vichiguiño' 'ue da iuogoxo quiyim so'ueenataxanot ñi qota'olec quiyim ỹaatqajam somato'ot añi i'taxanata, chaqai 'nejem qamiri nagui quenajo na'xa'a. ₄Ỹim quesom ỹaatqajam se seuoten ná'maq mashic icoñiguit da na'qaatec, vire'ta salauat chaqai sauegueu'a añi ncoñiitaxanaxaqui na ỹale chaqai ana 'aalo quiyim qaicoñi'. ₅So lashi na netaxaỹaxanqajanqaipi chaqai ná'ogue na na'gaxalateripi ỹa'deenta quiyim chaqaiso so sachigoxotaugui aso lere nañaañim tai'a yi qarqaỹaripi judío laseripi neeta'ñi yi na'a' leenaxat Damasco. Ca' ỹim shicpegue' yijo, sedaantaque na mashic icoñiguit da na'qaatec, ca ñauegueu'a na Jerusalén. Ca' quiyi, ca' qaỹouaxan.

₆Qam na' ỹim shiqueta'gue so nayic, mashic sepalatau'a yi Damasco, 'uo' ca na'xa'a lavinñi, ca ne'laqataxanchiguiñi so 'ec lauaq quiyí'maq seueta'ñi, ỹaatqajam quesaxan so lauaq chicqo'ot na piguim. ₇Ca sanajñi. Ime, ca' sa'xaỹaque so na'qaatec, 'naac: “Qami' Saulo, ¿chi'neco' ma' yocañi'sac?” ₈Ca' quiyi, ca senataxan, shinac: “Qami', ¿negue' aqami'?” Ca' só'maq retaqa 'naac: “Aỹim Jesús, Nazaret le'ec, chaqaỹim ná'maq yocañi'sac.” ₉Qam saua ỹale' iỹaata'pe ỹauanchirigui so nqai'legaxa, ca no'chi'. Qam sqa 'xaita só'maq na'qaatec qohinapiguiỹa'. ₁₀Ca' shinac da ỹa'qaatec: “Qami' ỹa'gaxala', ¿nega'ỹo' ca so'uet ma'le?” Ca so'maxare 'naac: “Ne'laxachirishiguim, ca' qui', repaquirau'a yi Damasco. Ca hua'ñi ma'le, ca qohiñirapegaxaua' quecá'ogue cá'maq 'viichi' ma'le.” ₁₁Ca ma' so lauaq ỹo'mate' naua ñqote', ca saua ñauegaxaua' iconalo naua ỹaqai'laqate', ca yaueguera'a yi Damasco.

₁₂Ca' yí neeta'ño' so ỹale, leenaxat Ananías. So'maxare ỹaatqajam na'xaỹaxane'ta na naqataxaquipi chicqo'ot nqohin so Moisés. Chaqai ná'ogue na judioipi neeta'ñi yi Damasco ỹaatqajam 'maxaraic nqai'en da no'ueenataxac so'maxare. ₁₃So Ananías nacpegue' aỹim, ca na' noviriri', ca' 'naac: “Qami' ỹaqaỹa Saulo, lotqai liỹa neuañiriñi.” Ca chaqa'ma' naviguerec naua ñqote', ca seuana so'maxare. ₁₄Ca' 'naapiguiỹa': “Ñi qota'olec quesaua 'auaxaqa sachigoxosqauguilo qareta'allipi qami' lca'acsec, ma' shi'gue ỹahotaque quiyim 'yiiñi' da 'neeta'pegue, chaqai quiyim nauañire'e' só'maq lelaatec qamaxaraic, chaqai 'qa'ita cá'maq 'naac. ₁₅Ma' qami' 'xachi' ma'le dá'maq 'neeta queso'maxare quená'ogue na qomyipi dá'maq huañichirigui chaqai da 'qa'ichirigui. ₁₆Ca' nagui ¿negue' ca qalañisapega? Ne'laxachirishiguim, qanachilaxan qami', pi'iro'o' da leenaxat so qara'gaxala', qaiyi nco'chiñi qami' quena rasauaxashichi'.”

₁₇Ca na' ime dajo, ca yapila na Jerusalén. Ca shicpegue' añi no'ueenaxanaxaqui, ca ñqouagaxain, ca' 'ue so iuanaxanaxac. ₁₈Ca seuana so qara'gaxala' Jesús, 'naapiguiỹa': “Riỹalli'sac, quire'e na Jerusalén, ma' na neeta'ñi najo qomyipi qaica ca na'xaỹaxana qami' queda 'xachisac caỹim.” ₁₉Ca' shinapega: “Qami' ỹa'gaxala', najo qomyipi ỹa'deenta quiyim aỹim shiquetagui quen ana lapoxoqui na qouo' laseripi, semitetaque ná'maq huelec qami', ca scoñi', chaqai souaxantac. ₂₀Chaqai na' qaỹalauat yi ra'qaataxanqajanqui' Esteban qai'neeta salequetaho, sa'maxarenta quiyim qaỹalauat, vire'ta seloqota'alo saua loho sauá'maq ralauataxane'.” ₂₁Qam só'maq qara'gaxala' 'naapega aỹim: “Mo'e' ma'le, qui', ma' ỹaatqajam selachitegue qami' da qoỹoqo'tegue, 'irougui na mesqai judioipi.”

₂₂Ca' quiyi, ñaq qana'xaỹaxantapega so Pablo. Qam na'le, ca' ỹaualqagui so qomyipi, ca 'naaco':

—¡'Maxaraic qaỹalauat da ỹale! ¡Se ỹa'maxañi quiyim nca'leetauec!

₂₃Ca ma' queetalec da laualaxac so qomyipi, chaqai naqate' naua loho ỹochigoxoi', chaqai 'ue na ỹaconougui na 'laua nimiishiguim, ₂₄ca' so lashi na nouaataxanaq relaataxanlec so Pablo quiyim qainoxonaxato quiyi la'a' so nouaataxanaq, chaqai relaataxanlec quiyim qaỹouaxan, qaiyi ỹa'xat cá'maq 'neeta quiyim qaỹaualqatalec, qanoquiaatapega. ₂₅Qam co'na' ime qaicoñireta qaỹahotaque quiyim qaỹouaxan, ca' so Pablo 'naaco' queso lotaua so nouaataxanaq lashi hueete'eyi:

—¿Ỹa'maqachiguiño' quiyim huaxañitac ca romano le'ec, quiyim saqa' 'yiiñii ca lasauaxaset?

₂₆Ca co'na' 'xaỹa dajo so lotaua so nouaataxanaq lashi, ca quepegue' so lashi, ca 'naaco':

—Rovichirari'o' queda sham 'viichi', ma' ñijo ỹale romano le'ec.

₂₇Ca' so nouaataxanaq lashi nqo'neu'a so Pablo. Ca' inat:

—¿Ỹaatqajam llic qami' romano le'ec?

Ca' so Pablo saato', 'naaco':

—Ajá'a.

₂₈Ca' so nashi 'naaco':

—Aỹim ỹaatqajam 'xoic da ishiuetenaxanaxac na' sahotaque quiyim aỹim romano le'ec.

Ca' so Pablo 'naaco':

—Aỹim, qam ỹaatqajam ña'xaỹoqsoqo'.

₂₉Ca só'maq ỹahotaque ỹouaxan so Pablo, sá'ogue chi noỹootetec queso'maxare. Vire'ta só'maq ỹaatqajam nashi 'uo' da lqolonaxa, na' ỹa'den quiyim romano le'ec so lcoñiiteguesec.

₃₀Ca' queso liỹa na'xa'a, ma' so nouaataxanaq lashi ỹahotaque ỹa'den cá'maq 'neeta quiyim na judioipi noquiaatapega so Pablo, ca' naqate' saua caréna queso'maxare. Ca lapoonta' sá'ogue so nashillipi ỹo'ueetegueñi na leloxoỹaxaquipi, ca qaỹaueguec so Pablo quiyí'maq hueesa'ñi saua'maxare.