So Pablo taata'gue da Macedonia chaqai da Grecia
1Ca co'na' ime so co'uaxac, ca' so Pablo roỹaxanougui so mashic icoñiguit da na'qaatec, ỹahotaque ỹaanouguilo naua laqataxaco. Ca ỹa'ue la'xaỹaxac quiyim eec, ca' nqa'aalguita, ca' eec, taigue da Macedonia. 2Nomachishiguim queetagui ana no'ueenaxanaxaquiripi quiyi ỹovita 'laua, 'xoic la'ñaaqataxanaxac quena lqaỹaripi quena' retaqa, chi ỹovireta'a yi 'laua Grecia. 3Ca neeta'anyi tres shiriguiri, ca co'na' sham renoto caca qom lahi' huaxaỹaqse, ma' ỹahotaque taigue da Siria. Qam 'uo' da la'xaỹaxac quiyim ca judioipi na'maxateta'guit quiyim 'ue ca qohine'tegue. Vichiguiño' lotqai pile'tegue da chigoxogue, liỹa que'tegue yi Macedonia. 4Liỹareta'pe saua Sópater, Berea le'ec, Aristarco chaqai Segundo, Tesalónica lase', Gayo, Derbe le'ec, Timoteo chaqai so Tíquico chaqai so Trófimo, Asia lase'. 5Ca' sauajo qarqaỹa' 'aue', ca nauaana'piguita qomi' quiyi na'a' Troas. 6Ma' qomi', qam ñauaanqata'a quiyim ime so lapoxoc quena' qaỹa'ic na pan se qaỹa'ue aca lalequete pi'chigui nqai'en. Ime, ca' lotqai qolaq, sachigoxosqochi'ñi yi Filipos, senqatañigui aso qom lahi' huaxaỹaqse. Quesaua cinco na'xata', ca soviraqalgoto saua qariỹa' quiyi Troas. Ca senqa'anyi siete na'xata'.
So Pablo hueetau'a yi Troas
7Ca' queso 'auaxaic na'xa'a caso semana, llapoxota', ma' qaỹahotaque quiyim qaỹa'ic so pan. Ca' so Pablo rapaxaguinataxantac quesó'maq mashic icoñiguit da na'qaatec. Qam ma' ỹahotaque eec na' richiguiñi, ca queetalec da letaxaỹaxac chi ỹovireta'a pe lauel. 8Qam cá'maq senqataugui 'imec qoỹoqoshi'ma, 'xoic ana ncoỹeraxanaxaqui ỹaviquetaugui. 9Qam 'uo' so ne'necoqui', leenaxat Eutico, nqa'xantaño' cañi nqote ca 'imec. Ca co'na' so Pablo queeta da letaxaỹaxac, ca 'xoic na lelaxac so ne'necoqui', vire'to' na' 'te'tegue ca lelaxac. Ca najño', chicqashi'ma ñi pa'aashiguim 'imec. Ca co'na' qaiconot, qam mashic ileu. 10Ca so Pablo nenojñi. Ca co'na' ỹoviri'ña, ca nqa'paxanegue, qa'aalegue so ne'nec. Ca 'naapega so nqaỹaripi:
—Totaxan ro'chii; ñaq nca'leetauec.
11Ca' so Pablo liỹa pilshiguim, ca' ỹasectaqchigui so pan, ca' que'e. Ime, ca' queetalec da letaxaỹaxac, chi ỹovireta'a quiyim richiguiñi. Ca co'na' eec. 12Qam queso ne'necoqui' qaỹauegue'ga ca la'a', nca'leetauec. Ca sá'ogue ỹaatqajam ỹa'maqachigui lauel.
So Pablo chicqochi'ñi yi Troas, ca taigue da Mileto
13Ca qomi' ñoqotqau'a aso qom lahi' huaxaỹaqse, sa'auqata'a yi Asón, ma' sahoqotaque ñiconaxashiguim so Pablo. Ma' chaqaida dá'maq qana'deenaxac, ma' so'maxare ỹahotaque co'ueetañi. 14Ca na' ñaqataxaguit so'maxare quiyi Asón, ca ñoqotqa'e' caso qarahi', ca saxague da Mitilene. 15Ca na' qolqa'iyi, ca queso liỹa nete'e, ca seuqa'ñi yi naloote'oga yi Quío. Ca' queso liỹa nete'e, ca sovitaxa yi ñigaxasom leenaxat Samos, ca ñco'mataxauec quiyi Trogilio. Ca' queso liỹa nete'e, ca sovitaxa yi Mileto. 16Ca' dá qohine'tegue, ma' so Pablo se ỹa'maxaren shi'gom neeta'ñi yi 'laua Asia, vichiguiño' sqa taigue da na'a' Efeso; ma' ỹahotaque qaỹaloq ỹovi' queda Jerusalén, sha'apiguito' ishit ỹalequetaho ma' noviro so na'xa'a nemaqachic leenaxat Pentecostés.
So Pablo ra'qaataxanem so la'gaxalateripi añi no'ueenaxanaxaqui quiyi Efeso
17Ca na' ñaqai seuqate'e yi Mileto, ca so Pablo relaataxane'oga so la'gaxalateripi añi no'ueenaxanaxaqui quiyi Efeso. 18Ca co'na' sá'ogue noviro, ca 'naapego':
—Qamiri 'yiiñita da shintari' chicqotau'a so 'auaxaic na'xa'a na' ñovira'a na Asia. 19Quesaua'que saua na'xata' quiyim salequetauguilo qamiri so'ueetetac da lo'ueenataxanaxac ñi qara'gaxala' Jesús, ỹaatqajam 'xoic da ñineequesenaxac, chaqai 'xoic da ñoỹenaxac, chaqai seuetañigui na 'xoic ñi'guenaxaquipi ỹoviraỹot quedá'maq ỹahotaque 'ñiichic na judioipi. 20Qam sqai saxanñi quiyim sa'qaataxantapeguema qamiri quedá'maq ỹo'uet ca ra'maxahi. Sapaxaguiñitac, ñichoxoteta, shiquetaguilo naua ra'aachiri. 21Quená'maq judío chaqai quena sqai judío shinapega quiyim ca'ahi naua no'ueenataxaco se no'viiñi, ca' quegue ñi qota'olec, chaqai huelec so qara'gaxala' Jesucristo. 22Ca' nagui saata'gue da Jerusalén, ỹaatqajam ipacaỹa' yauec ñi Espíritu Santo, qam se sa'den nega'ỹo' ca shinta ma' sovi'. 23Qam qaidaata sa'den quiyim ñi Espíritu Santo quecanchi sovita na'a', 'neetapiguiỹa' quiyim nauaantapiguit aca ncoñiitaxanaxaqui chaqai 'xoic i'xoric. 24Qam quedajo qaica ca ñqovilga; vire'ta da chi ñachaalataxac qaica ca 'negue nqaishin caỹim. Qaidaata yishiitaque quiyim 'xoic ca ñitoonaxac quiyim somateta da ỹo'ueenataxanaxac, chaqai yipaquejlec da laqataxac nañaañim ñi qara'gaxala' Jesús, quiyim saanec da no'uen na'xaỹaxac queda le'xorenataxanaxa ñi qota'a.
25Ca' nagui, ca ỹaatqajam se'taxachichiguiñi quiyim tot qaica ca iuañiua', quená'maq shi'gue sapaxaguinta'pegue da lo'ueenataxanaxac ñi qota'a ma' ỹoiquentac ná'ogue najo. 26Vichiguiño' sahotaque shiñiỹapegaxaua' quiyim nagui taachi'ñi quiyim qaica ca ỹasauaxaset queda 'ñiita. 27Ma' ỹaatqajam sa'xateta dá'ogue da ỹahotaque ỹo'uet ñi qota'a. Qaica ca soxotetañi. 28Ca' nagui, ca ncochiỹalta', chaqai cochiỹa ná'ogue ná'maq mashic ỹacoñiguit da na'qaatec, quiyim so Espíritu Santo pataxalgoto qamiri quiyim loxoi'a chaqai cochiỹa, ma' na'maxare lalamqate' ñi qara'gaxala' Jesús, ma' ñi'maxare lishiujnaxanqate, rishiuetenaxanalo saua chi leuo' na' qaỹalauat. 29Ma' sa'den quiyim ma' ime sqoshiilec najo, ca novite' caua liỹa', ỹahosaque iuagaxaterac na mashic icoñiguit da na'qaatec, 'nejem ca ỹa'cac ana qagreta quiyim ỹovirougui ca qagretaipi se ỹa'maxatac, ca retoxoñigui. 30Qam ma'le, ca chaqaqamiri chicqochiguinguilo ca ne'laxashiguim rapaxaguiñiigue da la'maachic, se ỹa'xat ca lliqueta, ma' ỹahotaque qoyiguegue quená'ogue ná'maq mashic icoñiguit da na'qaatec. 31Vichiguiño' ỹaatqajam rovichiỹari'o'; no'viñita'gue quecaua tres ñaxari, quiyi na'xa'a chaqai yi pe, qaica lqodoc quiyim sapaxaguinta'pe qamiri, saqatetapegalo qamiri, ñoỹentalec quiñi 'óna caqamiri.
32Ca' nagui qamiri ỹaqaỹa', spa'xana'guita qamiri ñi qota'olec chaqai da la'qaatec chicqochigui quiyim sa'deenaq da le'xorenataxanaxa. Ma' ñí 'ue da lquesaxanaxa quiyim ỹa'ñaxate' qamiri, chaqai ỹa'ue ca romari, lliguitaugui ná'ogue ná'maq lalamaxat ñi'maxare. 33Se ñaquita'a aca lam chaqai ca looỹac canchaqaica qom, 34qam qamiri 'yiiñita quiyim so'ueenataxanalo na'le naua ỹaqai'laqate', ca 'ue ca souentaque chaqai caua ñauegaxaua'. 35'Eda da chaqai'en ỹapaxaguinataxanaxac caqamiri quiyim 'ueenataxañii chaqai tauañii na 'ue ca louenaxanaxa. Sqai 'laxachii da la'qaatec so qara'gaxala' Jesús, na' 'naac: “Paguec la'maxa quecá'maq rachitaxanataxan, quecá'maq 'ue ca icoñiguit.”
36Ca co'na' ime dajo, ca' so Pablo ỹa'yi'iñi naua le'cootal, ca sá'ogue nqouagaxain. 37Sá'ogue noỹentagui, chaqai qa'aalegue so Pablo, chaqai nqo'goq. 38Ca ỹaatqajam 'xoic na lachicoxo, ma' so'maxare 'naaco' quiyim tot liỹa neuañiguit. Ime, ca' qaicoỹarauec, qaỹoviraqta'oga aso qom lahi' huaxaỹaqse.
