So Timoteo liỹaata'pe so Pablo chaqai so Silas
1So Pablo chaqai so Silas co'na' ỹovijta yaua na'aate' Derbe chaqai yi Listra, ca iuanterelco' so huelec ñi qara'gaxala', leenaxat Timoteo, llaalec aso 'aalo judío lase qai'neeta huelec ñi qara'gaxala', qam so leta'a griego le'ec. 2Ca' so nqaỹaripi na'ñi yi Listra chaqai yi Iconio ỹaatqajam imaqachintac so'maxare. 3Ca' so Pablo ỹahotaque liỹa so Timoteo, vichiguiño' ỹa'ue so netanec na loshicmaxa, qaiyi qaica ca qohinegue quena judioipi quená'maq na'ñi yi'maxare, ma' sá'ogue ỹa'deenta quiyim so leta'a griego le'ec. 4Ca quená'ogue ná'maq na'aateripi quecá'maq queetetegue, ỹa'xatesapeguem na nqaỹaripi naua lapaxaguinataxanaxaco saua lelaatqa so Jesús chaqai ná'maq na'gaxalateripi na'ñi yi Jerusalén. 5Ca vichiguiño' ná'maq mashic ỹacoñiguit da na'qaatec ỹaatqajam paguec na'ñaxate'tegue da lpi'ỹaxac. Ca' quiyi, ca naua'que naua na'xata' nqo'neetauec ná'maq ỹacoñiguit da na'qaatec.
Da leuanaxanaxac so Pablo queso ỹale na'ñi yi Macedonia
6So Espíritu Santo se ỹa'maxaren ỹa'xate' da na'qaatec quiyi 'laua Asia. Ca' vichiguiño' ỹapaquera'ta quiyi Frigia chaqai yi Galacia, 7chi ỹoviresa'a ca lqodoc yi 'laua Misia. Ca' quiyi, ca ỹahosaque tarou'a yi 'laua Bitinia. Qam so Espíritu chicqo'ot so Jesús se ỹasene' tarou'a yi'maxare. 8Ca vichiguiño' ỹa'iisauec quiyi Misia, ca ỹovirera'oga so ñigaxasom, leenaxat Troas. 9Ca' quiyi, ca' so Pablo 'uo' so leuanaxanaxac queso pe. Iuano' so ỹale na'ñi yi 'laua Macedonia, nachaatetañi, ne'xoresentac, 'naaco': “Na'itegue na Macedonia, qarotauañi'.” 10Ca co'na' so Pablo 'ue so leuanaxanaxac, ca na'maxachiñi quiyim taategue da Macedonia, ỹaatqajam i'taxachiriñi quiyim ñi qota'olec roỹaxantapegalo quiyim ỹa'xate' queca qomyipi da na'qaatec chicqaugui da nca'laxa.
So Pablo chaqai so Silas hueesau'a yi Filipos
11Ca' yinotaxaugui aso qom lahi' huaxaỹaqse, sachigoxosqochi'ñi yi Troas, ca salamaxataqa'gue ada delec leenaxat Samotracia. Ca' queso liỹa na'xa'a, ca sovitaxa yi ñigaxasom leenaxat Neápolis. 12Ca' quiyi, ca saxague da na'a' Filipos. Yi'maxare nodaachiguiñi na romano laseripi na reloqota'a; ỹaatqajam paguec lecaguiñi quiyá'ogue yi liỹa na'aateripi quiyi 'laua Macedonia. Ca' 'vii saua na'xata' senqata'anyi. 13Ca na' ỹovire'ga so na'xa'a co'mataxaqui, ca saxai'ogue da lahi yi na'a', ca qolaqpegue' na lahi aso lachiugue, ma' 'uo' yi napooqo' qouagaxainqa'. Na' sovitaxa, ca ñqa'xanaxañi, ca saanqaem da na'qaatec so 'aallipi hueeta'anyi, lapoota'ta'. 14Ca 'uo' aso 'aalo leenaxat Lidia chicqa'gue da na'a' Tiatira. So'maxare imeenac na lo'yaxanec lo'lo loqquiric, naueralec da letogaxa. Aso 'aalo ỹaatqajam queetalec ñi qota'a, ca na'xaỹaxantac. Ca' ñi qara'gaxala' ỹauachigui añi le'taxanata, qaiyi na'xaỹaxane'ta da la'qaatec so Pablo. 15Ime, ca' qanachilaxan chaqai sá'ogue so llaalqaipi. Ime, ca' ne'xoresene'toto qomi', ca 'naac:
—No'm chaqaida nqai'ñii quiyim ya'yiiñii quiyim ỹaatqajam seuelec ñi qara'gaxala' Jesús, ca ñaqai cocho'qui' ñiỹa'ñi yi ỹa'a' la'xasqori.
Ca' ỹaatqajam ipacoxoua', ca seuqa'anyi.
16Ca 'uo' so liỹa na'xa'a na' qolaqpegue' yi qouagaxainqa', ca ñatenqa'chiguit aso nequetegaxai 'uo' so le'ec idaanau'alo naua 'ueenataxaco. Chaqaso' aso rauegaxantapigui so na'cororipi, ma' na'á aso'maxare, rauegaxañigui quiyim ra'ỹaauec nanchaqaina. 17Ca' asojo nequetegaxai coỹaretalgoto qomi' queso Pablo, ỹaualqata'guit, 'neetapogoxoua':
—Nauajo ỹale' nauá'maq ỹaatqajam lelaatqa ñi qota'olec ñí'maq ỹaatqajam lodegaxat, ỹa'xatetapeguema qamiri da llicyaxac da nca'laxa.
18Mashic 'vio' saua na'xata' queda 'neetari', vire'to' na' so Pablo se ỹa'maxaren da 'neetari', ca nqovilque'te, ca nelaxa so le'ec, 'naaco':
—Qami' soda'a nagui da leenaxat so Jesucristo, noxoñi'uec cana'maxare.
Ca so ne'ec chaqa'ma' eec, ca'e aso'maxare.
19Qam so na'cororipi aso nequetegaxai co'na' ỹa'den quiyim totqai neetagui so lauegaxanaxaqui no'ueenataxac aso'maxare, ca qaiconlgoto so Pablo chaqai so Silas. Ca qaỹaueguera'a ca nashillipi neeta'ñi yi nouooqo' quena lavinñi yi na'a'. 20Ca co'na' qaỹoviraqteu'alo saua nimiitaxana' quena nasauaxaset, ca 'neraco':
—Nauajo ỹale' judío lase' ỹasauaxatetecta' ná'ogue na senqata'ñi na'a'. 21Rapaxaguinataxanta'pegue na ỹoqa'a 'ueenataxac. Qam qomi' se seshitaq seconaxaguit chaqai se so'ueetaq, ma' qomi' romano lase'.
22Co'na'le, ca sá'ogue so qomyipi noquii'alo saua'maxare. Ca' saua nimiitaxana' queca nasauaxaset relaataxanlgoto quiyim qanaqate' saua loho, ca qaỹouaxane', qaỹodoosa'a na qo'paq. 23Ca co'na' ime 'xoic da nouaxanaxague', ca qaỹapou'alo cañi ncoñiitaxanaxaqui late'ogue'. Ca' qohinapega so neloxoỹaq quiyim ỹaatqajam reloxoỹa'alo saua'maxare. 24Ca co'na' 'ue so na'qaatec na' qaraqata so neloxoỹaq cañi ncoñiitaxanaxaqui, ca' ỹaatqajam pa'xanda'ta, ca' ỹa'gaxanaxanguilo naua lichil ca lcoñiitaxanaxaqui' qo'pa'.
25Qam co'na' pe lauel, co'na' so Pablo chaqai so Silas nqouagaxainta'pe chaqai ỹo'ueensac ñi qota'olec, ca' so liỹa ncoñiitecseripi na'xaỹaxantapegalo saua'maxare. 26Ca ne'laqataxanchiguiñi quiyim 'ue so nquesaxanaxa lodegaxat, ca' i'loxol nqai'en, vire'ta na pa'aañi cañi ncoñiitaxanaxaqui. Ca' quiyi, ca huachiguilo' naua'que naua lasomi', chaqai souec ná'ogue na lequet na ncoñiitecseripi. 27Qam co'na' nelouec so neloxoỹaq, ca iuana quiyim nauatetagui na lasomyipi añi ncoñiitaxanaxaqui. Ca no'icshiguim so chi lecat, ỹahotaque nalauatalta', ma' 'neetapigui lauel quiyim nemootauec sá'ogue so ncoñiitecseripi. 28Qam so Pablo ỹaualaxalec, ca 'naaco':
—Se na'yiralta', ma' qomá'ogue seuqate'e najo.
29Ca só'maq neloxoỹaq cañi ncoñiitaxanaxaqui rashiilaxanaque aca ncoỹeraxanaxaqui. Ca inoxono, ne'guentaho, qam i'loxolta'pegue' quena lqolonaxa. Ca co'na' ỹovire'ogalo saua Pablo chaqai so Silas, ca ỹa'dooto naua le'cootal. 30Ime, ca' ỹaueguere'oguiyi, ca inate':
—Qamiri ỹaqaỹa', ¿negue' ca shinta'co' quiyim sahotaque yca'leuec?
31Ca saua'maxare 'neraco':
—Vi'relec ñi qara'gaxala' Jesucristo, ca rca'lli'rec qami' chaqai yi qauochi'.
32Ca' saua'maxare ra'qaataxantem queda la'qaatec ñi qota'a chaqai sá'ogue só'maq neeta'ñi yi la'a'. 33Ca' queso pe so neloxoỹaq cañi ncoñiitaxanaxaqui quiỹota'pe saua lcoñiraxa'. Ca' quiyi so'maxare qanachilaxan chaqai sá'ogue so llaalqaipi. 34Ca co'na' ime, ca ỹauega'a ca la'a', ca qui'ỹaxan. Ca' so'maxare chaqai so lauo' ỹaatqajam 'xoic da netoonaxac, ma' huelec ñi qota'olec.
35Ca co'na' richiguiñi, ca' saua nimiitaxana' quena nasauaxaset ỹa'vii saua lelaatqa nouaataxanaq lase' quiyim querepegue' so neloxoỹaq cañi ncoñiitaxanaxaqui, 'nerapega quiyim ỹosoorec so Pablo chaqai so Silas. 36Ca' so neloxoỹaq cañi ncoñiitaxanaxaqui 'naapego' so Pablo:
—'Ue da la'qaatec na nimiitaxanaq queca nasauaxaset quiyim sosoorec qamiri. Vichiguiño' nagui, ca noxoñiuec, qaicanqaida.
37Qam so Pablo 'naapegalo' saua nouaataxanaq lase':
—Ma' qomi' romano lase', ¿chi'neco' ma' qaỹaconejlgoto quiyim qaỹouaxane' qomi', qaỹauanchiguilo, ime, ca' qaỹapou'alo qomi' cana ncoñiitaxanaxaqui? Ma' saqa' qaỹa'den ca qarasauaxaset. Ca' nagui qaỹahotaco' quiyim qanemootaxanterec, qaỹosoorec qomi'. 'E', se ỹa'maxañi, ta'ta'am quiyim caua'maxare ỹosoorec qomi'.
38Ca' saua nouaataxanaq lase' ỹa'xate' da la'qaatqaipi so Pablo, ra'qaataxantem saua nimiitaxana' quena nasauaxaset. Ca' saua'maxare co'na' ỹa'deene' dajo quiyim so Pablo chaqai so Silas romano lase', ca' 'ue da lqolonqa'. 39Ca' saua'maxare querepegueto saua Pablo chaqai so Silas, rashiilaxane' quiyim qai'xorene', ma' 'uo' da lasauaxasete'. Ca co'na' ime, ca qaỹosoorec so Pablo chaqai so Silas, qam qohinapegalo quiyim quere'e yi na'a'. 40Ca co'na' chicqoterougui aca ncoñiitaxanaxaqui, ca que', querepegue' ca la'a' aca Lidia. Ca' quiyi, ca nauande'e' cá'ogue ca nqaỹaripi. Ca' cá'ogue ỹa'ñaxatesac. Ca co'na' ime, ca' que'.
