Qaỹachaxantac so Espíritu Santo
1Qami' ñauochaxaua ỹaqaỹa Teófilo. Aso 'auñi ñilere ỹerecse hueetaugui ná'ogue na lo'ueenataxanaxac so Jesús chaqai na lapaxaguinataxanaxac co'na' ñaqai chita'gue taañi ro'ueenataxan, 2chi ỹovireta'a so na'xa'a taigue da piguim. Ca na' saqa' eec queda piguim, ca ỹa'vio' saua lca'acse' lelaatqa, chaqai ỹapaxaguinque cá'maq lo'ueenataxanaxague' chicqo'ot nqai'en so Espíritu Santo. 3Co'na' ime da lelauaxa so Jesús, ca' lotqai nachaxanalo saua lelaatqa. Cuarenta na'xata' queeta da nachaxanaxac, ca' queda, ca ỹaatqajam i'taxajñi quiyim ỹaatqajam llic nca'leuec. Chaqai ỹa'xatetac da lo'ueenataxanaxac ñi qota'a ma' ỹoiquentac ná'ogue najo.
4Ca co'na' ñaq liỹaata'pe so Jesús saua lelaatqa, ca' qatalo quiyim sqai quere'e yi na'a' lodegaxat Jerusalén. Ca 'naapegalo':
—Ñaq nauaañi'a quiyim ipaquichigui dá'maq sham ỹaañiỹaxaroma ñi ita'a, dá'maq mashic shi'gue sa'xatema qamiri. 5Ỹaatqajam llic queso Juan rachilaxanataxañigui na huaxaỹaq, qam qai'neete' qamiri quenaua na'xatarolqai' qanachilaxanguilo qamiri ca Espíritu Santo.
So Jesús taigue da piguim
6Co'na' ñaq liỹareta'pe saua lelaatqa so Jesús, ca' qainat:
—Qami' qara'gaxala', ¿chaqaino' na na'xa'a quiyim lotqai noỹootec nqai'ñi' na qouo', ná'maq llaalqaipi so 'auaxaic qareta'a Israel?
7Ca' so Jesús 'naapegalo':
—Qamiri sqa taiguit 'yiiñii lagui, loqo'm negue' ca na'xa'a 'ue ca ỹo'uet ñi qota'a, ma' chaqaiñiita ñi'maxare ỹo'viijñi ma'le quiyim ỹo'uet. 8Qam ma' novitalo qamiri ca Espíritu Santo, ca' coñiguit ca nquesaxanaxa. Ca' oquii, 'xachitac aỹim, ca 'qaataxañiỹougui yi Jerusalén, chaqai yá'ogue yi 'laua quiyi Judea, chaqai yi Samaria, chaqai ỹovireta'ogalo naua'que naua lahil na 'laua.
9Ca co'na' ime ỹa'xat dajo so Jesús, ca qananojshiguim, ca qai'xategue da piguim. Ca' saua reloqota'guita, ca chi ra'iishire'megue. Ca naco' so naueguelec, ca 'eco' homougui, ca tot qaiuanegue. 10Ca ñaq ra'iisashiguim saua'maxare co'na' nqo'neetashiguim so Jesús, co'na' chaqai huaqatero saua dos ỹale', imerañi lalagaxaqa naua loho, huaqatero quesaua'maxare. 11Ca 'neraco':
—Ỹale', qamiri lase' yi Galilea, ¿chi'negue ma' ra'iitashiguim quena piguim? Sojo Jesús taigue da piguim, chicqochiguinguilo qamiri, chaqaiso so'maxare ma'le liỹa rapil, chaqai 'nejem da 'neeta quiyim nagui ra'iita'pegue' eec.
Qanca'au'a so Matías quiyim qoỹana'ñi yi loma' so Judas
12Ca' saua lelaatqa so Jesús co'na' quere'e aso qoỹoqoshi'megue 'laua leenaxat olivo loma', ca pilda'a yi na'a' lodegaxat Jerusalén. Sqoỹoxolec yi louooqote', ma' chaqaiyi yí'maq naloqojnec nouooqo' quiyi na'xa'a co'mataxaqui. 13Ca co'na' ỹovirera'a yi na'a' lodegaxat, ca tarishi'ma ca pa'aashiguim 'imec cá'maq chaqai'eno' quen neesaugui. Ca quesaua'maxare ỹalequesaho' saua Pedro, Jacobo, Juan, Andrés, Felipe, Tomás, Bartolomé, Mateo, chaqai so Jacobo, Alfeo llaalec, chaqai so Simón só'maq ỹalequetaugui na cananistaipi, chaqai so Judas, Jacobo lqaỹa. 14Sá'ogue lapoỹato'o' quen, ca' nqouagaxain, ỹalequesaho saua lqaỹa' so Jesús, chaqai aso late'e María, chaqai so liỹa 'aallipi.
15Ca 'uo' so na'xa'a, co'na' lapoota'ta', ca' so Pedro nachajñi quena lavinñi so nqaỹaripi, 'uo' ca ciento veinte so qomyipi, ca 'naaco':
16—Qamiri ỹaqaỹa', nagui ỹovita quiyim qaipacqajanchiguilo naua nerecse' hueetaugui yi la'qaatec, so Espíritu Santo co'na' ỹa'qaataxanaxan so nashi David queda 'neeta so Judas. Ma' chaqaiso só'maq ỹauec na'le so coñi' so Jesús. 17Ma' so Judas chaqai qariỹa, chaqai qarotaua queda qaro'ueenataxanaxac. 18Qam so'maxare mashic eec, chaqai reshiujnaxana ca 'laua, reshiuetenaxana aso laseuete so Jesús co'na' imen. Qam na'le, ca najñi, ỹadoochiguiñi na lqahic, ca' rachipigui, ca nemerauec naua lauelese'. 19Ca só'maq qomyipi neeta'ñi yi Jerusalén co'na' ỹa'den dajo, ca ỹanegue da leenaxat yijo 'laua Acéldama, ma' quenaua chi la'qaatqa dajo 'naac: no'ueenaxa laseue' so neuoripi. 20Ma' caso no'ueenaxanaxalate leenaxat Salmos hueetaugui yi na'qaatec, 'naac:
Chaqaiyiita 'neetari' ca la'a' co'tejlec,
chaqai qaica naugui ca'maxare.
Chaqai qai'neeta 'naac:
'Uo' ca liỹa ỹo'uet da lo'ueenatec.
21Ca' nagui 'vio' naua ỹalequetauguilo qomi' ỹale' sqoỹoxe'ogalo coqomi' quesaua'que saua na'xata' na' llaqai so qara'gaxala' Jesús ỹalequetauguilo qomi'. 22Naua'maxare ỹalequesaho na' qanachilaxan so Jesús queso Juan, chaqai chi ỹovireta'a na' taashiguim quena piguim. Ca' nagui ỹouen quiyim 'ue ca quenaua'maxare qanca'au'a, ca' qaỹalecqajnouguilo qomi', ca' qai'neeta na'qaataxanqajnec quiyim ỹa'xat so Jesús liỹa nca'leuec.
23Ca' qaỹa'vio' saua qanca'au'alo dos quesaua'maxare: So Matías chaqai so José. So José 'vio' daua liỹa' leenqate': Barsabás chaqai Justo. 24Ca' 'neetetegueyi da nqouagaxainaxague':
—Qami' qara'gaxala' ma' qami' 'yiiñi' ná'ogue ana ne'taxanata, choxochi' coqomi' cá'maq rca'acshiqui' quenauajo. 25Ca' qoỹanagui da na'laxatañi na'le lo'ueenatec so relaachiqui' Judas, ma' 'ue da lasauaxaset, ca re'oq dá'maq ỹaatqajam taigue nqohin.
26Ca' qanallichiguilo, ca' so llitaxac tajlec so Matías. Ca' quiyi, chaqa'ma' qaỹalecqajnouguilo saua once lelaatqa so Jesús.
