2 Tesalonicenses 3

₁Ca dá'maq pa'aatec qara'qaatec caqamiri qarqaỹa' quiyim qouagaxaiñitalgoto qomi', qaiyi da la'qaatec so qara'gaxala' sqaỹaloq ỹovire'oga ná'ogue na qomyipi quiyim imaqachin icoñiguit, qaican ỹapaguec na'le caqamiri. ₂Qai'neeta nqouagaxaiñitalgoto qomi', qaiyi qaica nqai 'negue coqomi' na qomyipi hualoxonyipi, ma' mesqai ná'ogue 'ue ca lpi'ỹaxac. ₃Qam so qara'gaxala', ma' se napacalec da la'qaatec, ỹaatqajam nolliichiriñi qamiri, chaqai ro'ootaxanlgoto qamiri quena se no'uen. ₄'Ue qanaquitaxac queso qara'gaxala' quedá'maq 'viichitac chaqai quiyim quiitalec 'viichitac dá'maq selaataxanaxalec caqamiri. ₅Ca' so qara'gaxala' ỹotauane' qamiri quiyim nauachiỹa'guit da lqo'iichi ñi qota'a, chaqai quiyim 'ue ca reualaxaviguii 'nejem da leualaxavic so Cristo.

₆Qamiri qarqaỹa', saqataxalo qamiri quiyim noỹoochiuec quecanchaqaica qarqaỹa quiyim se nqo'ta ro'ueenataxan, chaqai quecá'maq sqai quelec da qarapaxaguinataxanaxac saanqaima qamiri. ₇Ma' qamiri 'yiiñita dá'maq 'ñiitari' quiyim quiitalec da leloxoỹaxac da shinqatari' na' salecqatauguilo qamiri. Ma' qomi' ỹaatqajam so'ueenataxanaq na'le, ₈chaqai sqaica ca sa'guinaq ca loq quiyim se seshiuetenaq. Ta'ta'a quiyim ỹaatqajam so'ueenataxanaq, 'xoic na qaresoochi quenaua na'xata' chaqai quenaua piri. Ma' sahoqotaque quiyim sqaica ca 'ec nesallaxainta'pegueto qomi' caqamiri. ₉Mesqaida quiyim sque'guenqateguelgoto qamiri quiyim qarotauañii. Qaidaata quiyim so'ueenataxanaq, ma' sahoqotaque quiyim quiijlec dá'maq qano'ueenataxac. ₁₀Ma' na' seuqatauguilo qamiri, saanaxauec da qara'qaatec quiyim shinqac: ¿Qa' que'o' cá'maq se ro'ueenataxan? ₁₁Ma' qomi' 'ue na sa'xaiqateguelec quiyim 'uo' na se ro'ueenataxan caqamiri. Ta'ta'a ỹalamqajlec quiyim qaica ca icona'pegue'. ₁₂Ca' ma' qomi' lelaatqa so qara'gaxala' Jesucristo, ca' selaraxalec cajo qom chaqai saqataxa quiyim ỹaatqajam ro'ueenataxan, qaica ca taỹapigui lauel, qaiyi nauec cá'maq louenec.

₁₃Qamiri qarqaỹa', se neme quiyim 'viichitac ca ỹa'maqachiguiñi. ₁₄No'm 'ue ca se na'xaỹaxana da qara'qaatec hueetalec najo qoderecse lere, ca ỹaatqajam na'ijñii'tegue ca'maxare. Ca' ime, ca se naqachiiguit, qaiyi nayiloxon ca'maxare ma'le. ₁₅Qam sqai 'ñiita'gue ca npa'guenaxauahi, ta'ta'a quiyim qachiỹa 'maxachii'tegue, 'ñiita'gue ca rqaỹahi.

₁₆Ca' so qara'gaxala' Jesús, só'maq hueeto'ot da na'maxa, so'maxare ỹaanema qamiri ca ra'maxahi naua'que naua na'xata' chaqai quená'ogue nanchaqaina caqamiri. Ca so qara'gaxala' ỹalequetauguilo qamiri.

₁₇Ỹim Pablo ỹaatqajam shiriñi najo iquinaxanaxac, sahote'e ana ñapoquena chaqai na ỹerec. Ca 'eda da shinta'gue ná'ogue ana ilaatallipi quena' seraxan. ₁₈Ca' so qara'gaxala' Jesucristo ỹaanema qamiri ca no'uen qayicyaxaguii. Ajá'a, ca' chaqaida 'neeta dajo.