2 Tesalonicenses 1

₁Aỹim Pablo chaqai Silvano chaqai Timoteo, ca' nagui qamiri ỹaqaỹa' selatalo qamiri ana lere ma' mashic coñiguit da na'qaatec ñiita'ñi na na'a' Tesalónica. Ma' qamiri mashic na'yiitau'a ñi qota'olec chaqai so qara'gaxala' Jesucristo. ₂Ma' sahotaque quiyim coñiguit da qouagaxa chaqai da na'maxa chicqo'ot ñi qota'olec chaqai so qara'gaxala' Jesucristo.

₃Qamiri qarqaỹa', qomi' se neme saanqatacot da qana'aachic ñi qota'a caqamiri. Dá'maq 'maxaraic shinqata'gue caqamiri, ma' noquiiquetauec da rpi'ỹaxaguii chaqai nqo'neetauec quiyim ne'xoriñiỹata'. ₄Ca' vichiguiño' qomi' ỹaatqajam 'xoic da qaremaqajnataxanaxa caqamiri quena' sa'qaataxanqatapeguem ná'maq mashic icoñiguit da la'qaatec ñi qota'a, quedá'maq reualaxaviguii chaqai da rpi'ỹaxaguii re'oq caqamiri, 'eno'm viitaugui da nocanaxaguii chaqai da ne'guenaxaguii. ₅Ca' quedajo, ca ichoxot ñi qota'a quiyim se ỹo'maac quiyim imit na qomyipi, ma' ỹahotaque quiyim noxoñiu'a qamiri cá'maq ñaqa naataho lo'ueenataxanaxac, dá'maq 'em 'uo' nagui da ne'guenaxaguii.

₆Ca' chaqaida dá'maq 'neeta quiyim ñi qota'a ỹo'uet ca le'xoric ná'maq ỹahotaque na re'xoriguii, ₇chaqai nco'mataxandec qamiri queda ne'guenaxaguii, chaqai qomi' qai'neeta queca na'xa'a ma' novi' so qara'gaxala' Jesús, ma' nachaxan chicqo'ot na piguim, naquetaugui na 'ec norec lauaq chaqai liỹaatac ná'maq chicqashiguim quesaxanaxaiquipi qota'a lelaatqaipi. ₈Ma' novi' so'maxare, ca' ỹa'ue ca nouaxanaxaset ná'maq se ỹa'deenapega ñi qota'a chaqai se na'xaỹaxana da na'qaataxac so qara'gaxala' Jesucristo. ₉Na'maxare ỹaatqajam chalego lecaic da nouaxanaxaset chaqai sqaica lqodoc. Qaỹo'daauec ỹaatqajam qoỹoqote'oga nqohin, qaiyi se iuana ca lauaq chaqai da lquesaxanaxa so qara'gaxala', ₁₀quecajo na'xa'a ma' novi' so qara'gaxala' quiyim qaimaqachin quená'maq lalamqateripi chaqai qaimaqachin quená'ogue ná'maq mashic icoñiguit da na'qaatec. Ma' mashic qamiri viilec dá'maq qomi' sa'xataq caqamiri.

₁₁Ca' chaqaida dá'maq 'em quiyim qomi' ñqouagaxainqatalgoto qamiri, sashiilqatac ñi qota'a quiyim ỹa'maxate'teque qamiri mashic qamiri loỹaxanqate'. Chaqai sashiilqatac ñi qota'a, ma' ñí quesaxanaxaic quiyim ipacqajanchigui ná'ogue ná'maq no'uen viitaque qamiri, chaqai ná'maq 'viichitac queda rpi'ỹaxaguii. ₁₂Ca' quedajo, ca qaimaqachin da leenaxat so qara'gaxala' Jesucristo queda nachaalataxaguii qamiri, chaqai so'maxare imaqachine' qamiri queda lqouagaxa ñi qota'olec chaqai ñi qara'gaxala' Jesucristo.