2 Samuel 12

₁Ca' ñi qara'gaxala' ila' so letaxaỹaxaqui, leenaxat Natán, quiyim quepegue' so David. Ca' so Natán na' ỹovira'a so David, ca 'naaco':

—'Uo' so na'a' nera'ño' saua dos ỹale', 'óno' so nesallaxanec chaqai so liỹa 'xoraic. ₂Ca' so nesallaxanec ỹaatqajam 'xoico' aso lalo qagreta chaqai ana huaca. ₃Qam so 'xoraic 'oono'lli'o' aso lalo qagreta lishiujnaxanqate, ca' chaqaiso só'maq iỹaxat. Ca' aso qagreta chi niỹitashiguim neeto'ot so'maxare chaqai quesaua llaalqa. Nouante'o' quena' que'e chaqai ne'taxauo' quena' ne'et. Chaqai co'quena' laq, ca' hueetalec ana lotogue. ¡Ca so'maxare ỹaatqajam lqo'itqate, 'neeta'gue aca ỹaatqajam llaale! ₄Ca 'uo' so na'xa'a, ca 'uo' so nouoq ỹovira'a ca la'a' so nesallaxanec. Qam so'maxare sqaca aca icona'a casó'maq chi lalo qagreta loqo'm huaca quiyim ỹo'uet ca loq so nouoq. Ta'ta'a quiyim nouo' caso lalo qagreto'lli' só'maq 'xoraic, ca' ỹo'uet ca loq so nouoq ỹovira'a ca la'a'.

₅Ca' so David ỹaatqajam ro'o' na'le quedá'maq 'neeto' na'le so ỹale. Ca 'naaco' queso Natán:

—¡Ỹim saanec da ỹa'qaatec, 'qaachigui ñi qota'olec, quiyim cajo ỹale ỹo'ueeto' na'le dajo ỹa'maqachiguiñi qaỹalauat! ₆Chaqai ¡ỹaatqajam ỹapacauec aca laseuete quiyim ishiueten nqohin aso qagreto'lli', ma' se re'xorenataxan na' 'ne'tegue dajo!

₇Co'na'le, ca 'naaco' so Natán:

—¡Sojo ỹale, chaqaiqami'! Ca' dajo dá'maq la'qaatec ñi qara'gaxala' ñí'maq qota'olec quena Israel: Ỹim ñca'au'a quiyim qami' lashi na llaalqaipi so Israel chaqai ñca'laxatec qami' na'le queso nashi Saúl; ₈chaqai saanem qami' na lauo' lodegaxat chaqai ana louaaripi, chaqai quiyim loqoira'a na llaalqaipi so Israel chaqai so Judá. Ca no'm 'ec sqaica ca nishaaque, ca' 'xoic quet cá'maq liỹa saanem qami'. ₉¿Chi'negue ma' liỹoqoira'piguit da ỹa'qaatec, ca 'viichi' dá'maq se yqo'ta? Ca' lauachi' so Urías so hitita le'ec na' 'ỹaañiro quiyim qaỹalauat queso llaalqaipi so Amón, ca' loqoichiguit añi loua. ₁₀Ma' qami' se na'xaỹaxañiriua' na' huootaxañira'gue añi loua so Urías hitita le'ec quiyim coñita roua'e', vichiguiño' na nalauataxaua'e'ipi sqai ỹaxanec ma'le quiyim co'ueeteguelec na qachaalaxai'ipi. ₁₁Ca' ỹim, ma' ỹim na'gaxala', ca da ỹa'qaatec 'neetasa': Ỹim so'uet ca se no'uen hueetougui nqaishin na qachaalaxai'ipi, ca' huañichirigui ma'le na rouachi'ipi ma' saanem cá'maq chi qauochi' le'ec, ca' quecajo na'xa'a, ca lapa'ñi' ma'le iuanchigui ná'ogue na qomyipi. ₁₂No'm qami' 'xochisañi ca ro'ueenataxanaxaqui', qam ỹim iuanchigui nqaishin ma'le ná'ogue na Israel cá'maq ỹo'ueenataxanaxac.

₁₃Ca' so David 'naaco' queso Natán:

—Ỹim ỹaatqajam 'ue da ỹasauaxaset hueeto'ot ñi qara'gaxala'.

Ca' so Natán 'naaco' queso'maxare:

—Ñi qara'gaxala' se ỹo'uet ca nouaxanaxashichi' quedajo rasauaxashichi' chaqai se rillivi'. ₁₄Qam qami', ma' ỹaatqajam 'ooqochichi' ñi qara'gaxala' quedá'maq 'ñitetegue, ca ñí'maq dalaxaic ne'qaañi qachaalqui', ñi'maxare ileu ma'le.

₁₅Ca co'na' so Natán pil queca la'a', ca' ñi qara'gaxala' ỹaatqajam ralola nqai'en so noctoqui' só'maq dalaxaico' llaalec so David caso loua so Urías. ₁₆Ca' so David nqouagaxaintacot ñi qota'a, rashiilaxanteguelec so noctoqui', chaqai nqopaaqachit chaqai nenantañi quena 'laua quesaua piri. ₁₇Ca' so qo'xoiquipi quesó'maq neetaugui so 'imec lodegaxat, quepegue' quiyim ne'xoresene'tot quiyim ne'laxashiguim quiyi 'laua, qam so'maxare se na'xaỹaxan chaqai se lqui'ỹaxaua na'le so qomyipi.

₁₈Ca na' ỹovirerec saua siete na'xata', ca' ileu so noctoqui'. Qam so nashillipi queso nalliripi so David se ỹa'xat, ma' no'cha'a so'maxare, ma' 'neesapiquio' quen lavilli': Na' ñaqa 'ue quen yi noctoqui', quena' 'ue da shinqac, se na'xaỹaxanoxoua' quen. Ca ¿negue' quet cá'maq 'neeta queta' shinqac quiyim ileu yi noctoqui'? ¡Sqoue quiyim chalego lecaic ca ỹo'uet se ỹa'maxañi!

₁₉Qam so David co'na' iuana so lotauaripi nashillipi chi nemootetecta'. Ca so'maxare chaqa'ma' ipeeta'a quiyim tot qaica so noctoqui'. Ca so'maxare inat so qomyipi, 'naaco':

—¿Mashic ileu ca noctoqui'?

—Ajá'a, mashic shi'gue ileu —'neraco' saua'maxare.

₂₀Ca co'na'le, ca' so David ne'laxashiguim queso nenantañigui 'laua, ca' nachil, chaqai nocorigui so nocoraxat, chaqai ỹadalaxate' saua loho, ca' inoxonougui so 'imec lodegaxat, ca nqouagaxainot ñi qota'a. Ca co'na' ime, ca' quepegue' ca la'a', ca' roỹaxanaque ca loq, ca' que'e. ₂₁Ca co'na'le, ca' qainato' quesaua lotaua' nashil, qohinaco':

—¿Negue' cá'maq leloxoỹaxac dá'maq 'viichisac, qami' qarashi? Ma' na' ñaqa 'ue so noctoqui', ca' qami' noỹiñi'sac chaqai nqopaaqachichi'sac. Qam nagui quiyim mashic tot qaica so noctoqui', ca' qami' ne'laxachirishiguim, ca' qui'i'.

₂₂Ca' so David 'naaco':

—Na' ñaqa 'ue so noctoqui', ca ñqopaaqachit chaqai ñoỹentac, ma' sahotaque quiyim ñi qara'gaxala' yi'xoren, ca' nca'laxatec yi noctoqui'. ₂₃Qam nagui ma' mashic ileu yi noctoqui', ¿negue' quet ca 'negue quiyim ñqopaaqachit? ma' se seshit quiyim liỹa ñca'laxatec. Ca' ỹim shicpegue' ma'le so'maxare, qam so'maxare tot ishit rapila ỹim.

₂₄Ca co'na' ime dajo, ca' so David lo'daxachigui lauel aso loua Betsabé. Ca' quepegue' aso'maxare, ca lotqai lapaatapi'ñi' aso'maxare, ca aso'maxare lotqai ne'qaañi so liỹa llaalec. Ca' so David ỹanegue leenaxat Salomón. Ca' ñi qara'gaxala' nqo'ta so noctoqui'. ₂₅Ca co'na'le, ca' ỹa'deenaxanaxanegue so David, chicqochigui nqai'en so letaxaỹaxaqui Natán. Ca co'na'le, ca' so David, ma' na'xaỹaxana ñi qara'gaxala', ca' so noctoqui' ỹanegue leenaxat Jedidías, loqo'm qota'olec le'xorenatec.