Ná'maq rapaxaguinataxanta'pegue da mesqai llic
1Qam queso llaalqaipi so Israel qai'neeta 'uo' quen na 'naac letaxaỹaxanqajnec ñi qota'a, qam na'majantac. Ca' chaqaida 'neeta nagui caqamiri 'ue ná'maq napaxaguinataxanaq 'maatqaic ỹalequetauguilo qamiri. Na'maxare ỹoxotesañi naua lapaxaguinataxanaxaco se no'viiñi, vire'ta quiyim noqollicte'e' so qara'gaxala' só'maq nca'laxatec na'maxare na'le. Ca na'maxare chi ỹo'uet quiyim sqaỹaloq qaỹo'uet ca nouaxanaxaset. 2Ca 'xoic ma'le na que'uegue dá'maq se no'uen llicyaxac na'maxare. Ca' chaqaina ná'maq sauaxat ma'le quiyim se no'uen ca qaỹa'xat quedá'maq ỹaatqajam no'uen ñicyaxac queda na'qaatec chicqaugui da nca'laxa. 3Ca' quedá'maq lqo'iichi quiyim qaishiuetentac, ca' ỹa'vii naua lapaxaguinataxanaxaco ỹodolgoto qamiri, qaiyi naqat aca qadamii. Qam se qohit quedá'maq nouaxanaxaset na'maxare, ma' mashic shi'gom qaỹa'maxatetañi dá'maq nouaxanaxaset na'maxare.
4Ma' ñi qota'a se ishit i'xoren só'maq lelaatqaipi piguim laseripi co'na' 'ue da lasauaxaset. Ta'ta'a quiyim inaxa'ña yi ncopatqo' na sauaqhuaiquipi, chaqai coñirañi queca napalaxa loma', ca' nauaanta'guit nqai'en ca na'xa'a quiyim qaimit ná'ogue najo. 5Qai'neeta ñi qota'a se i'xoren so 'auaxaic qomyipi. Ta'ta'a quiyim i'paxanlec nqai'en queso huaxaỹaq so qomyipi hualoxonyipi. Qam qaisoota so Noé nca'laxatec chaqai saua liỹa' siete qomi', ma' so'maxare rapaxaguinataxanta'pegue da co'teeta chaalataxac. 6Ñi qota'a qai'neeta ỹa'ue da nouaxanaxasete' saua dos na'aate' Sodoma chaqai Gomorra, copata'alo nasoochiriñi nqai'ne', vire'ta quiyim sá'ogue lo nqai'en. Ma' ỹahotaque laloqojnaxanaxat quená'maq qomyipi hualoxonyipi quená'maq no'ueenalec ma'le na 'laua. 7Qam nca'laxatec na'le so Lot, ma' so'maxare ỹaatqajam huagaxaraic ỹale, chaqai 'xoico' quen na nqui'ic quena' ỹa'ajantac dá'maq se no'uen loic so qomyipi hualoxonyipi. 8Naua'que naua na'xata' sojo huagaxaraic ỹale ỹalequetaugui so'maxare ỹaatqajam 'ue da lqui'ic añi le'taxanata quena' ỹa'ajantac chaqai 'qaatapega ná'maq se no'uen ỹo'ueetetac so qomyipi. 9Ca' chaqaida dá'maq 'neeta ñi qara'gaxala' quiyim ishit nca'laxatec queca ne'guenaxac cá'maq ỹaatqajam nañaanot ñi'maxare, chaqai ná'maq hualoxonyipi tai'a nqai'en da nouaxanaxaset ma' qaimit ná'ogue najo.
10Ñi qota'a paguec ma'le ca nouaxanaxaset nqai'en ná'maq queeta'pegue' na se no'uen lamaanaxanqachic quená'maq rapio'qotaxan chaqai liỹoqa'piguit da lelaataxanaxac so qara'gaxala'. Na'maxare ỹaatqajam se na'xaỹaxan, chaqai qaica ca huapigui lauel, chaqai se no'chi quiyim retaxaỹa'guit ná'maq paguec da lquesaxanaxa se re'xogui. 11Qam vire'ta na nelaatqaipi piguim laseripi, quiyim na'maxare paguec da lquesaxanaxa quiyim relaataxan, qam se ishit quiyim 'ue quet ca ỹadeneguelec queca nouaxanaxaset najo nquesaxanaxa quiyim ỹauanchigui ñi qara'gaxala'.
12Qam najo qomyipi ỹaatqajam 'nejem na iseripi, ma' qaica ca la'deenataxanaxac chaqai queeta'pegue' da chi la'ajnaxanaxac; chaqai quiyim ne'qaañi, qam tai'a quiyim qaiconlec, ca' qaỹalauat. Chaqai se ichirac quiyim ỹa'xat cá'maq se ỹa'den, qam na'maxare ma' ileu 'nejem ma'le na isecỹac ca lelauaxa. 13'Xoic ma'le ca le'xoric, ma' ỹahotaque da le'xoric na liỹaripi. 'Neetapega ỹa'maqachiguiñi quiyim queetalec da lamaanaxanqachic, qam se ladoguec. Ỹaatqajam nayiloxo lahi' ma' chalego da laỹaac quena' ỹalequetauguilo qamiri quena' lapoiỹata'. Raỹaacotalec da layinaxanaxac caqamiri.
14Se ishit quiyim se nisha'a quet quiyim ra'ỹa'a aca 'aalo. Se nco'te'guesop na lasauaxaset. Chaqai ỹayinec ca qom quiyim qaica ca la'ñaxac, chaqai ỹaatqajam ỹa'den quiyim naqata'a aca lam ca liỹa. Najo qomyipi ỹaatqajam chalego lecaic da nouaxanaxaset hueetalec. 15Na'maxare ỹo'meetajlec, ma' ỹaxanec dá'maq ỹaatqajam 'maxaraic ñicyaxac, ma' ỹadenaxat da llicyaxac so letaxaỹaxanqajnec ñi qota'a, leenaxat Balaam, llaalec so Beor. Ỹo'uet ca se no'uen, ma' ỹahotaque 'ue aca lauegue. 16Na' ỹo'uet da lasauaxaset, ca' qanelaxa caso 'ashina sqaicaua la'qaatqa, qam na' retaqa, ca ỹahota'ahi naua qom la'qaatqa. Ca' se ỹasenegue quiyim queetalec da leualoxonqaishic so'maxare.
17Najo qomyipi 'ec aca ni'ỹa rashivigui tot qaica ca le'ec huaxaỹaq, chaqai 'ec ca naueguelec chi qaỹaỹoxonaxateta quena nonot. Chaqai taata'a nqohin quiyim qaillaugui cá'maq ỹaatqajam napalaxa sqaica lqodoc. 18Ma' nemaqajnaxai quena' retaqa, qam qaica ca 'netegue naua la'qaatqa. Ma' ỹachigoxochichigui da lamaanaxanqachic quenanchaqaina chaqai na se no'uen lamaanec na qom loshicmaxa, ca' ỹashaxanec ná'maq mashic qohitauec quená'maq ñaqai hueetaugui da no'maxac. 19Na'maxare ỹachaxantac dá'maq chaalataxac sqaicanqaida. Qam na'maxare, ca' na'ac quená'maq 'ueenataxac se no'uen, ma' ca qom na'ac quecá'maq ỹapacqajnauec que'uegue. 20Ma' ná'maq mashic iuana so qara'gaxala' chaqai qarca'laxaqui Jesucristo, ca' chaqaida ñiichigui quiyim qohitauec quena se no'uen quena 'laua, ime, ca no'm liỹa lepateta'piguita naua se no'viiñi, ca no'm liỹa ỹapacqajandauec que'ueque, ca' da no'ueenataxac ca'maxare paguec la'aaxa quecá'maq 'auaxaic. 21Ca' paguec la'maxa quet quesaua'maxare quiyim se ỹa'deene' dá'maq no'uen ñicyaxac, mesqaida quiyim mashic ime ỹa'den, ca lotqai ỹaxanñi dá'maq ỹaatqajam qoỹaanem naqataxac chicqo'ot ñi qota'a. 22Qam ỹovita quiyim ipaquichigui só'maq na'qaatec quesaua'maxare: “Ca pioq pilac ỹa'ic ca lesalaxat, chaqai aca cos chita'gue qaiquiỹootac, lotqai pilac liỹa novinñigui ca nishaaxa.”
