2 Reyes 21

₁So Manasés mashic ỹovi' doce ñaxari na' qoỹano nashi, chaqai cincuenta y cinco ñaxari quiyim nashi quiyi Jerusalén. Ca' aso late'e leenaxat Hepsiba. ₂Qam ná'ogue ná'maq ỹo'uet na'le so'maxare se nqo'ta ñi qara'gaxala', ma' so'maxare chaqaidaata ỹo'ueetetac dá'maq ỹo'ueetetac na'le so ỹoreta'oguit qomyipi só'maq ỹo'daauec ñi qara'gaxala' na'le na' novi' so llaalqaipi so Israel. ₃Ma' so'maxare no'xonshiguim na qouagaxainqateripi quiyim qanqouagaxainot na nqolaquipi ná'maq nosogoñi na'le so nashi Ezequías; chaqai na qaripi ncopatoxonaxala' quena' qanqouagaxainot so Baal, chaqai ỹo'uet so nadenqatec lqui'i aso nashiila Asera, ca' chaqaida 'ne'tegue na'le so Acab só'maq nashi quiyi Israel; chaqai nqouagaxainot ná'ogue na hueeto'ot na piguim, ₄chaqai no'xonshiguim ana ncopatoxonaxalate quiñi lauo' ñi qara'gaxala' yí'maq 'naaco' na'le quiyim qanqouagaxainot, ca' qaỹouen da leenaxat quiyi Jerusalén. ₅Chaqai no'xonshiguim so liỹa ncopatoxonaxalateripi, ỹanalgoto saua dos nasoxoco ñi lauo' ñi qara'gaxala', ca' ỹo'uet quiyim qanqouagaxainot ná'ogue na hueeto'ot na piguim.

₆Chaqai qai'neeta ỹavigaxate' saua llaalqa quiyim ỹa'ue lachitaxanataxanqate', chaqai vire'ta napaxaguina quiyim ỹa'den na se re'xogui, ca ỹo'viijñi quiyim qaretaxaỹa'pegue' na nqui'illipi chaqai da ne'naxanaxac. Ca chalego la'aaxa dá'maq ỹo'uet quiñi qara'gaxala', ca' ỹovireta'a quiyim ro'o nqai'en quená'maq lo'ueenataxanaxaquipi. ₇Chaqai qai'neeta ỹanaugui ñi lauo' ñi qara'gaxala' so lqui'i aso nashiila Asera, ñí'maq ñi qara'gaxala' ỹa'uo' na'le da laqataxac queso David chaqai queso llaalec Salomón, 'naaco':

—Najo no'ueenaxanaxaqui na'ñi na Jerusalén ná'maq ica'acsec sachigoxotetougui na llaalqaipi so Israel quiyim se reda, chaqaina hueeta'ñi da ỹeenaxat. ₈Ca' ỹim tot liỹa so'daauec quenajo 'laua na llaalqaipi so Israel quená'maq saanem na'le so 'auaxaic leta'allipi no'm ipacqajanchigui ỹo'uet ná'ogue ná'maq selarelec chaqai ná'ogue ná'maq lapaxaguinataxanaxaquipi so ilaatec Moisés.

₉Qam na'maxare se na'xaỹaxan. Ta'ta'a quiyim so Manasés ỹaueca'guit quiyim ỹo'uet ná'maq se no'uen, ỹapacauec nqai'en ná'maq ỹo'uet na ỹoreta'oguit qomyipi quená'maq nomachichiguiñi na'le ñi qara'gaxala', iuanchigui nqai'en na Israel llaalqaipi. ₁₀Ca' vichiguiño' ñi qara'gaxala' retaqa nqai'en na'le so lelaatqaipi letaxaỹaxanqajanqaipi. Ca 'naaco':

₁₁—Ma' ñi Manasés chalego da la'aaxa ná'maq ỹo'ueetetac, ma' dá'maq ỹo'uet paguec la'aaxa queso amorreoipi só'maq 'auaxaiquipi na'le quiñi'maxare, ma' ỹo'uet da lasauaxaset yi Judá quena lqolaquipi, ₁₂vichiguiño' ỹim, ỹim na'gaxala', ỹim qota'olec queso Israel, nagui sichoxot ỹim selata ma'le ca chalego lichic ma'le na Jerusalén chaqai yi Judá, ca' vire'ta quiyim 'ec iuete' naua lque'la lauaco cá'maq 'xaỹa dajo. ₁₃Ca' ñaloqochin na Jerusalén, shine'tegue da ỹaloqojnaxanaxac quiyi Samaria chaqai quena llaalqaipi so nashi Acab na' sa'ue ca nouaxanaxaset, ca' sco'taxateta 'ec nqaishin ca peguet quena' qaiquiỹogui, ca' qanqa'paxanaxanñi. ₁₄Ca cá'maq no'ueenañi quena ỹalamaxareteripi, ca' shica'e, ca saañiguit na npa'guenaxaua, qaiyi qanouo', qaicona ná'maq hueeto'ot na'maxare. ₁₅Ma' se no'uen ná'maq ỹo'ueetetac quiñi qara'gaxala'. Ca' yo'ooqochitetac shi'gue queca na'xa'a na' ñaqata'a so 'auaxaic leta'allipi quiyi Egipto, chi ỹovireta'a nagui.