2 Corintios 1

₁Aỹim Pablo, ma' ỹimo' loỹaxanaxat ñi qota'a, ỹauaaque quiyim aỹim lelaatec so Jesucristo. Nagui iỹaatac ñi qarqaỹa Timoteo. Ca' nagui, ca' selatalo qamiri ana ỹerecse, qamiri ỹaqaỹaripi, ma' mashic viilec ñi qota'a, ñiita'ñi na na'a' lodegaxat Corinto, chaqai ná'ogue ná'maq lalamaxaret ñi qota'a quená'ogue ná'maq neetalec yi 'laua, leenaxat Acaya. ₂Sahotaque quiyim coñiguit da qouagaxa chaqai da na'maxa chicqo'ot ñi qota'olec chaqai so qara'gaxala' Jesucristo.

₃Semaqachinaq ñi qota'a, ñí'maq leta'a so qara'gaxala' Jesucristo, ma' chaqaiñi ñí'maq qareta'a qare'xoren, chaqai chaqaiñi ñí'maq qota'a ñí'maq se neme quiyim lo'daxatetapiguilo naua qovilli'. ₄Ñi qota'a ñí'maq lo'daxachiguilo qovilli' quenaua'que naua qare'xoyaxaco, qaiyi qomi' seshitaq quiyim llo'daqainaq cá'maq 'ue ca le'xoric, saanqaem dá'maq 'nejem da lo'daqainataxanaxac ñi qota'a coqomi'. ₅Ma' qai'neete' qomi' ỹaatqajam 'xoic lecaic da ñouanqau'a le'xoric so Cristo, qam qai'neeta ỹaatqajam lodegaxat da qana'ñaaqataxac chicqo'ot so'maxare. ₆Vichiguiño' no'm 'ue ca qare'xoric qomi', ca 'eco' chaqaida chicqochigui quiyim qamiri 'ue ca na'ñaaqataxaguii chaqai da rca'laxahi. Chaqai no'm ñi qota'a ñí'maq ỹa'ñaxateta'pe qomi', ca' qaỹahotaque quiyim qamiri 'ue ca na'ñaaqataxaguii chaqai da rca'laxahi, qaiyi shichii neualaxaviñi'e' quiyim na'ñaxachiiguit ca re'xoriguii 'nejem ná'ogue ná'maq qare'xoric sovirqa'guit. ₇Ma' qomi' ỹaatqajam ñaquitqatalgoto qamiri ma' sa'deenaq quiyim nouañiỹau'a da ne'xoric, chaqai qai'neeta nouañiỹau'a da qana'ñaaqataxac chicqo'ot ñi qota'a.

₈Qamiri ỹaqaỹa', qomi' sahoqotaque 'yiiñita quiyim 'xoic da qananaqataxac na' seuqata'ñi yi 'laua, leenaxat Asia. Da'maxare ỹaatqajam 'xoic lecaic da qane'guenaxac, ca mashic 'ec tot qaralo'guit, chaqai shinqatapega quiyim chaqaiyi lqodoc ca qanachaalataxac. ₉Mashic shinqatari' ca paguec ca lasauaxaset quiyim tai'a nqohin ca lelauaxa. Qam dajo chi qanapaxaguinaxac, qaiyi paguec spi'ỹaaqa'a ñi qota'a ñí'maq ishit nca'laxatec ca mashic ileu, ca se ñpi'ỹaaqalta'. ₁₀Qam ñi qota'a quepaqataxanlgoto qomi' chaqai ñaqai queeta quiyim quepaqataxanteguelgoto qomi' queda chalego lichic nelauaxa. Ca' chaqaiñi ñí'maq spa'xanqo'ot da qanaquitaxac quiyim queeta quepaqataxanteguelgoto qomi', ₁₁chaqai no'm qamiri qarotauañii nqouagaxaintalgoto qomi'. Chaqai no'm 'xoic ca qom nqouagaxaintalgoto qomi', ca 'xoic ma'le ca ỹaanshiguim ma'le ca na'aachic quiñi qota'a queda lqouagaxa coqomi'.

₁₂Ca dá'maq ỹo'uet da qanetoonaxac 'neetasa': quiyim queda chi qano'ueenataxac sa'deenqata quiyim ña'maxatqata qolqatalec dá'maq ỹaatqajam leloxoỹaxac da na'qaatec na' ñaq salecqataugui ná'ogue na qomyipi quena 'laua, qam paguec na' salecqatauguilo qamiri. Ca' quedá'maq lqouagaxa ñi qota'a, ca qarotauantac quiyim shinqatari' dajo, qam dajo mesqai chicqaugui da chi qara'deenaxanaxa. ₁₃Chaqai nauá'maq qoderecse qarelaata quiyim selataxalo qamiri, qaica quet cá'maq liỹa hueesalec, qainaata ná'maq qamiri shichii 'yiiñii quiyim taxailec. Ma' 'ue da ñaquitaxac quiyim 'yiiñita ca leloxoỹaxac, ₁₄ma' mashic 'ue ná'maq hua'ñi ná'maq mashic 'yiiñita da leloxoỹaxac, qaiyi ma' 'ue ca na'xa'a novi' ca qara'gaxala' Jesús, ca netooñita'peguelo qomi', chaqai qaican ỹapaguec coqomi' ñitoonqata'peguelo qamiri.

₁₅Ca' 'eda dá'maq taateguelec da ipi'ỹaxac na'le. Ca' vichiguiño' 'ue da ỹa'deenataxanaxac quiyim 'au shicpegueto qamiri, qaiyi 'ue ca netoonaxaguii quiyim dos sovitalo qamiri. ₁₆Sahotaque shiquejlgoto qamiri na' ñanaỹa'gue na Macedonia, chaqai ma' sopil, ca lotqai liỹa sovire'talo qamiri, qaiyi qamiri yotauañii quiyim sovira'gue dá'maq saỹa'gue Judea. ₁₇¿Peeta'a se se'taxajño' dá'maq ỹa'deenataxanaxac na' shinac dajo? ¿Loqo'm 'ñiitapega quiyim soiquentac cá'maq shim so'uet, 'ñiitapega quiyim shinta cá'maq saqa' icoñiguit da na'qaatec quiyim 'naac hua', ncopaata lotqai 'naac 'e'? ₁₈Qam ñi qota'a ỹa'deenta quiyim qomi' sqai shinqac caqamiri hua', ca' ncopaata lotqai shinqac 'e'. ₁₉Ma' só'maq llaalec ñi qota'a, leenaxat Cristo Jesús, só'maq sa'xatqatac caqamiri quesaua iỹa' Silvano chaqai so Timoteo, se ỹauanapega quiyim 'naac hua', ca' ncopaata lotqai 'naac 'e'. Ma' dajo na'qaatec chicqo'ot so Cristo, da'maxare ỹaatqajam lliqueta. ₂₀Ma' chaqaiso só'maq ipaquichiguilo nqai'ne' naua'que nauá'maq ỹachaxanta'pe ñi qota'a. Ca vichiguiño' quena' semaqachinaq ñi qota'a, chaqai chicqochigui so Cristo Jesús quiyim dá'ogue da qarasaataxac quiyim shinqac: “Ajá'a, chaqaida 'neeta dajo.” ₂₁Ca' chaqaiñi ñí'maq qota'a ñí'maq quiyim qomi' chaqai qamiri sqai saxanaxauec so Cristo, chaqai chaqaiñi ñí'maq ỹo'uet quiyim qomi' lo'ueenataxanqajanqa. ₂₂Chaqai chaqaiñi ñí'maq ỹo'uet ca letanec coqomi', ca' ỹanaguilo naua qare'taxanata ñi Espíritu Santo, ñí'maq i'taxajñi cá'maq seconaxaguit ma'le.

₂₃Qam no'm saqa' sovitalo qamiri quena Corinto quedá'maq chi ỹa'deenataxanaxac, ma' se sahotaque ca nouaxanaxashichii. Qam da'maxare ỹa'deenta ñi qota'a, ca no'm sqaida dajo, ca 'eno'chaqai qanaqat da ñachaalataxac. ₂₄Ma' qomi' se sahoqotaque cá'maq sapaxaguinaxaque qamiri quiyim viilec, ma' mashic ỹa'maqachiguiñi da rpi'ỹaxaguii. Qaidaata quiyim sotauanaxai' qamiri, qaiyi noquic ca netoonaxaguii.