1 Timoteo 2

₁Dá'maq 'avichiguiñi ỹaqataxac 'neetasa': quiyim quiitalec da nqouagaxainaxaguii, qam qouagaxaiñilec ná'ogue na qom, chaqai 'ỹaañishiguim da na'aachiguii quiñi qota'a. ₂Sahotaque qai'neeta quiyim qanqouagaxainlec na nashillipi leta'allipi chaqai ná'ogue na lotauaripi, qaiyi qaica canchaqaica coqomi', qaiyi qara'maqachiguiñi, ma' ỹaatqajam ñañaanqot ñi qota'a, qaiyi quená'ogue na qana'ajnaxac qaỹa'maxarenta. ₃Ca' dajo qanqouagaxainaxac ỹaatqajam chaqaida leloxoỹaxac, ca' ỹa'maxarenta ñi qota'a ñí'maq qarca'laxaqui. ₄Ma' ñi'maxare ỹahotaque quiyim ná'ogue nca'leuec na qomyipi, ỹovireta'a nqai'en quiyim ỹaatqajam ỹa'den dá'maq ỹaatqajam llic. ₅Ma' 'oonoqui' ñi qota'a, chaqai 'ue so 'oonoqui' qom ishit quiyim nemanachite'tot nqai'en na qomyipi ñi'maxare. So'maxare leenaxat Jesucristo. ₆Ma' so Jesucristo nañaañiguit da lelauaxa, ca' ishiueten so laseuete da lca'laxa ná'ogue na qomyipi, ca' dajo qaỹa'xat na' chi ỹovita cá'maq laloqo'. ₇Ca' chaqaida dá'maq dajo quiyim ñi qota'a ỹa'ue quiyim aỹim la'qaataxanqajnec chaqai lelaatec, quiyim sapaxaguinegue da 'neeta da npi'ỹaxac chaqai dá'maq ỹaatqajam llic leloxoỹaxac ná'maq mesqai judío laseripi. Ma' ỹim mashic seuelec so Cristo, ca' ỹaatqajam llic dá'maq sa'xatetac. Se ña'majan.

₈Vichiguiño' sahotaque quiyim ná'ogue na qomyipi quiyim nqouagaxain, ca' ỹachaxansashiguim naua laua', qam ỹaatqajam nachinchiguiñi añi le'taxanata, sqai hueeto'ot ca lonogoxonaxac, chaqai se nco'uaate'e' ca liỹa. ₉Chaqai sahotaque quiyim na 'aallipi ỹaatqajam ỹa'deenta da no'ueetaxac. Na'maxateta, chaqai se nemaqajnaxai, chaqai mesqai maqachaqaic da netagaxac, chaqai se no'viichigui ca 'ueetaxat oro, loqo'm aca lo'yaxana 'ueetqate, loqo'm ỹo'uet aca neloxoqui qoỹoqota'a nqai'en. ₁₀Chaqaidaata quiyim ỹo'uet ca ỹa'maqachiguiñi, qaiyi 'ec no'ueetaxat. Ma' chaqaida da 'neetari' aca 'aalo queetalec ñi qota'a. ₁₁Qai'neeta sahotaque quiyim ana 'aalo ỹaatqajam i'maqata quena' na'xaỹaxana da napaxaguinataxac. Se ỹa'maxañi quiyim se na'xaỹaxan. ₁₂Ma' ana 'aalo se sasenem quiyim rapaxaguinataxan queca 'xoic qomyipi, chaqai quiyim napaqueteguelec ca ỹale. Ta'ta'a quiyim i'maqatam. ₁₃Ma' ñi qota'a 'au ỹo'uet so Adán. Ca co'na' ime, ca ỹo'uet aso Eva. ₁₄Ca mesqai so Adán só'maq qaỹayin. Qasoota aso Eva qaỹayin. Ca co'na' qaỹayin, ca' 'uo' da lasauaxaset. ₁₅Qam aca 'aalo nca'leuec no'm netela'a da lco'oxoc quiyim queetalec da lpi'ỹaxac chaqai da le'xorenataxanaxa, chaqai quiyim co'taxateta da nachaalataxac, chaqai netelalta'.