1 Tesalonicenses 5

₁Qam qamiri qarqaỹa', quecá'maq na'xa'a loviraxaqui dajo se ipacaque quiyim seraxañi. ₂Ma' qamiri mashic 'yiiñita ca na'xa'a ma' novi' rapil so qara'gaxala'. Novi' so'maxare, ma' sqaica ca qaỹahotaque, 'nejem ca cuataxai quiyi pe. ₃Ma' na qomyipi 'ne'teguesa' da la'qaatec: “Quená'ogue sqaicanqaida chaqai sqaica ca qaỹouetaque”, ca' novita ma'le ca nouaxanaxaset chalego lecaic chi ne'laqataxanto, 'nejem ca nqui'ic caca 'aalo quiyim ỹovita ca laloqo' quiyim co'o. Ca' qaica ca qohit. ₄Qam qamiri ỹaqaỹa', totqai viitaugui na 'ec napalaxa quiyim i'laxate' qamiri cajo na'xa'a loviraxaqui so qara'gaxala', 'nejem ca cuataxai. ₅Ma' qamiá'ogue viitaugui yi na'xa'a ma' re'qoochiguiñi, ma' sqai seuqataugui yi pe ma' napalaxa. ₆Ca' vichiguiño' nagui se ỹa'maxañi quiyim 'ec selaxasqotegueñi, shinqata ná'maq saqa' icoñiguit da na'qaatec. Ta'ta'a quiyim ñiloqotec chaqai sa'maxatqa'tegue da qoyicyaxac. ₇Quená'maq laq, laq quiyi pe, chaqai ná'maq quiñiuguet, lquiñiuguetaxaqui yi pe. ₈Qam qomi' ma' seuqataugui yi na'xa'a, ca' ỹaatqajam sa'maxatqa'tegue da qoyicyaxac, ca' squepaqataxanaxa da qarpi'ỹaxac chaqai da qare'xorenataxanaxa, shinqatari' ca neetaho quena nouaataxanaq quena' ỹanñi aca lquepaqataxanqate cana lotogue. Chaqai ỹaatqajam 'ue da qanaquitaxac queca nca'laxa, ma' 'nejem aca do'o lauataxaqui quena' ỹanñi ca nouaataxanaq le'ec. ₉Ma' ñi qota'a mesqai qom lca'acse' quiyim ỹa'ue ca qanouaxanaxaset, ta'ta'a quiyim sovirqau'a da nca'laxa, chicqochigui so qara'gaxala' Jesucristo. ₁₀Ma' so'maxare ileualgoto qomi', ma' ỹahotaque qarca'laxaua, 'eno'm ñaq qarca'leetauec loqo'm mashic qareleu. ₁₁Vichiguiño' notauañiỹata' chaqai quiñi 'óna ỹa'ñaxat ca liỹa, quiitalec dá'maq chaqai'en 'ñiitari'.

₁₂Qamiri qarqaỹa', ñi'xoresenqa'toto qamiri quiyim ỹaatqajam se napaguiỹalec na lo'ueenataxanqajanqaipi so qara'gaxala' Jesús quenauá'maq ra'gaxalachiri chaqai qatetapegalo qamiri. ₁₃Ỹaatqajam rauochigue chaqai ỹaatqajam 'xoriñii, 'yiiñitapega da lo'ueenataxanaxac caqamiri. Quiitalco' da ra'maxahi, qaicanqaida caqamiri.

₁₄Qai'neeta saqataxalo qamiri qarqaỹa' quiyim ỹaatqajam 'ñiỹapega ná'maq se nqo'ta ro'ueenataxan, chaqai 'ñaxachii ná'maq se ra'ñiigui na lauel, chaqai tauañii na se ra'ñi da lpi'ỹaxac, chaqai quiyim neualaxaviñi'te' ná'ogue na qomyipi.

₁₅Chaqai richilliỹa'ta' quiyim qaica ca ỹopilaxajlec ca se no'uen ca liỹa. Ta'ta'a quiyim 'viichii ca ỹa'maqachiguiñi quiñi 'óna caqamiri chaqai quená'ogue na liỹa qomyipi.

₁₆Qaidaato' da quiyim ỹaatqajam netooñitac. ₁₇Quiilco' quiyim se neme nqouagaxaiñitac. ₁₈Quená'ogue ná'maq taalgoto qamiri 'ỹaañitacot ca na'aachiguii ñi qota'a, ma' chaqaida dá'maq ỹahotaque ñi'maxare caqamiri, ma' mashic viilec so Cristo Jesús.

₁₉Sqo 'machii da lo'ueenataxanaxac so Espíritu Santo. ₂₀Se ỹa'maxañi quiyim sqai coñiguit ca la'qaataxanaxac ca mashic qaỹa'qaataxanaxan quiñi qota'a. ₂₁Qam 'guiñii ná'ogue, ca cá'maq ỹa'maqachiguiñi, ca' chaqaica cá'maq 'maxachii. ₂₂Sqa 'iỹapegueu'a ná'ogue ná'maq se ỹa'maxañi.

₂₃Ca' ñi qota'a, ñí'maq chicqo'ot da na'maxa, chaqaiñi ñí'maq co'taxate' qamiri, chaqai ỹa'maxajñi dá'ogue da no'ueenataxaguii, qaiyi qaica ca rasauaxashichii nqai'en, chi ỹovireta'a ca loviraxac so qara'gaxala' Jesucristo. ₂₄Ma' ñí'maq qota'a roỹaxanalo qamiri, ỹaatqajam se napacalec ca la'qaatec, ca ipacqajanchigui ma'le dá'ogue dajo.

₂₅Qamiri qarqaỹa', nqouagaxaiñitalgoto qomi'.

₂₆Quiñii ná'ogue na qarqaỹaripi, qam nqo'goxohi'e' chaqai 'xoriñii.

₂₇Saqatalo qamiri nagui ma' ỹim lelaatec so qara'gaxala', quiyim qaretaqalec najo lere, 'qaatac nqohin ná'ogue na qarqaỹaripi.

₂₈Ca' so qara'gaxala' Jesucristo ỹaanema qamiri ma'le ca no'uen qayicyaxaguii. Ajá'a, ca' chaqaida 'neeta dajo.