So David chi i'xoren so Saúl, ca' se ỹalauat
1Ca co'na' ỹoviro so Saúl na' pil na' ime ỹocantac so filisteoipi, ca qara'qaataxanem quiyim so David hueetalec yi 'laua qaica qom, leenaxat En-gadi. 2Co'na'le, ca' so Saúl nca'a so tres mil ỹalliripi quiyá'ogue yi Israel, ca' idaanaque so David chaqai sá'ogue so nalliripi hueetalec aso paguec lishicshi'megue quemaralec qa' ladocaipi. 3Ca co'na' quesó'maq queeta'gue nayic, ca ỹovito' yi hua'ñi ana qagreta lahi'ipi. Ca quiyi'maxare 'uo' na lauaquipi, ca' queso'maxare, ca hueetauquio' so David chaqai so nalliripi nqañoxotetañi. Ca so Saúl 'ue so taugui, ma' ỹa'ue noma'. 4Ca' so nalliripi so David 'naaco' queso'maxare:
—Nagui quenajo na'xa'a, ca' ipaquichigui ná'ogue ná'maq la'qaatec ñi qara'gaxala' quena' 'naac quiyim ỹaanem qami' cá'maq rpa'guiñi'sac quiyim qadoxonqui'. Ca' nagui, ca 'viiquiñi'sac cá'maq 'ñi'sa'gue.
Co'na'le, ca' so David ne'laxashiguim, nichirichiguiñi, ca nichaxauec ca lahi aso lapooto so Saúl. 5Qam co'na' ime nichaxauec, ca lotqai 'ue da netogotaxa. 6Ca 'naaco' queso nalliripi:
—¡Ñi qara'gaxala' yotauan quiyim qaica ca shine'tegue ñi ỹa'gaxala' nashi! Ma' ¡ñi'maxare nashi, ma' ỹaatqajam lca'acsec ñi qara'gaxala'!
7Ca' vichiguiño' so David quepaxat so nalliripi quiyim se nalauate'e' so Saúl. Ca so'maxare nenoxonec queso lauac, ca' lotqai eec. 8Qam chi copaachigui, ca' nenoxonec so David, coỹarete'uegue so'maxare. Ca ỹaualaq, 'naaco':
—¡Qami' ỹashi, qami' ỹashi!
Ca' so Saúl nqovilca, ca' so David ỹa'chi'iñi naua le'cootal, ỹoviraqta'guit na latap na 'laua. 9Ca 'naaco':
—Qami' ỹashi, ¿chi'neco' ma' vi'relco' ná'maq 'naac quiyim ỹim sahotaque 'ue ca shine'tegue qami'? 10Ca' nagui, qami' qarashi, 'yiiñite' quiyim ñi qara'gaxala' nañan qami' quiyim salauachi' quiyi quiñi lauac. Qam ỹim se salauachi'. Ta'ta'a quiyim chi se'xoren da nachaalataxaqui', ma' shinac quiyim qami' nashi, ma' chaqaiñi ñi qara'gaxala' qami' lca'acsec.
11Ca' nagui, qami' qarashi, ñaqai 'ajñite' na llo'qoota'a: Najo lahi ana qapooto'e' ñichaxauec. Ca' shi'gue quet salauachi'. Ca vichiguiño' nagui, ca 'yiiñite' quiyim aỹim se sahotaque sa'ue ca shine'tegue qami', se spa'guiñi'sac chaqai se ñapaquiraxalec. Qam qami' yocañi'sac, vi'saque yalauachi'. 12¡Ca' ñi qara'gaxala' imite' qomi' ma'le, ca ñi'maxare ỹo'uet ca nouaxanaxashichi' sauaxat aỹim! Ca quena' ỹim qaica ma' sahotaque quet quiyim 'ue ca shine'tegue qami', ma' qami' qarashi. 13'Ue da ñaauapec na'qaatec 'naacsa': Ca se no'uen chicqaugui ná'maq hualoxonyipi. Vichiguiño' ỹim qaica ma' sahotaque quet quiyim sa'ue ca shine'tegue qami'. 14Chaqai ¿nega'ỹo' cá'maq cuañi'sac, ma' qami' lashi na Israel, vi'saque quiyim qadoxonqui'? ¡Peeta'a ỹim ma' 'ec aỹim pioq leuaxaic, loqo'm ca pioq lapaxat! 15Vichiguiño' ñi qara'gaxala' chaqai ỹoiquenac da'maxare, chaqai chi imite' qomi' ma'le. ¡Ñi'maxare imit ma'le cá'maq sasauaxat caqami', chaqai iuejlec aỹim ma'le caqami'!
16Ca co'na' ime da letaxaỹaxac so David, ca' so Saúl 'naaco':
—¡Ca' chaqaiqami' ỹaalcolec David taqaisapiguiỹa'!
Ca' ỹaatqajam naualaxañi, noỹen. 17Ca 'naaco':
—Ỹaatqajam llic ná'ogue ná'maq 'xachi'sac, ma' ỹim pilaxachirelec ná'ogue na ỹa'maqachiguiñi, ma' ỹim ná'maq so'ueetetac da se no'uen caqami'. 18Ca' nagui, ca ya'deenaxanaxañitegue quiyim sqo 'viichi' ca se no'uen caỹim, ma' ñi qara'gaxala' mashic yayaanec quiyim yalauachi', qam qami' se yalauachi'. 19Ma' llic quiyim qaica quet cá'maq mashic ỹa'maxañi loxonec ca npa'guenaxaua, ca' queeta quiyim nca'laxatetauec. Ca' vichiguiño', ¡ñi qara'gaxala' ishiueten ma'le dá'maq no'uen 'ñitetegue aỹim quena na'xa'a! 20Ca' nagui, ca' ỹaatqajam sa'deenta quiyim qami' ná'maq qami' nashi ma'le, ca' cajo ro'ueenataxanaxaqui' quiyim qami' nashi quena Israel llaalqaipi ỹaatqajam ỹa'maqachiguiñi. 21Ca' vichiguiño' nagui 'ỹaañirec ca ra'qaachiqui' quiyim 'qaachigui qami' ñi qara'gaxala' quiyim se nomachichiriñi na ỹaalqaipi, chaqai sqai palaxachi' da ỹeenaxat quena ỹaalqaipi.
22Ca' so David ỹaanec da la'qaatec queso Saúl quiyim ipaquichigui nqai'en. Ca co'na' ime, ca' so Saúl pilo queca la'a', qam so David chaqai so nalliripi quepegue' yi le'guenqa'.
