1 Pedro 4

₁Ca' vichiguiño' quedá'maq 'neeto' na'le da le'xoric so Cristo quena loshicmaxa, ca' qamiri qai'neeta na'maxachitañi quiyim 'ue ca re'xoriguii. Ma' cá'maq ỹovirau'a ca le'xoric quena loshicmaxa, ca ỹalat na nasauaxaset, ₂qaiyi naua'que naua na'xata' hueetapigui lauel dá'maq ỹahotaque ñi qota'a, ca' totqai queeta'pegue' da lamaanaxanqachic na loshicmaxa. ₃Ca mashic nalootañi dá'maq shi'gue 'viichitac quesaua 'auaxaqa ñaxari dá'maq nqo'ta ỹo'uet ná'maq se iuanapega ñi qota'a. Ca' quesaua 'auaxaqa na'xata', ca' qamiri quiita'pegue' da namaanaxanqachic, quenanchaqaina quená'maq se no'uen, 'taxac, chaqai na nemaqachic 'xoic na naỹaac, sqa laỹa'gue da ne'taxaguii, chaqai nqouagaxaiñitacot na nqolac ná'maq se qaỹa'maxaren. ₄Ca na'maxare la'loxon, ma' tot naviguiỹa'pegue' quená'maq ỹo'ueetetac se no'uen. Vichiguiño' 'ue na ỹa'xat se no'uen taalgoto nqai'ne' qamiri. ₅Qam na'maxare quená'ogue ná'maq ỹo'ueetetac ỹa'xatem ma'le ñi qota'a ma' na'maxatetañi quiyim imit na lasauaxaset na qomyipi, quená'maq nca'leetauec chaqai quená'maq mashic ileu. ₆Ma' ná'maq mashic ileu qai'neeta qaỹa'xatem da na'qaatec, qaiyi só'maq la'al ishit nca'leuec, 'nejem ñi qota'a nca'leetauec. 'Eno'm quiyim quenajo 'laua qaimit quet, qohinta'gue ná'ogue na liỹa qomyipi.

₇Ca tot qoỹoqaque ca lqodoc ná'ogue nanchaqaina. Ca vichiguiño' sqai qamiri que'guenataxanaxaiqa. Ta'ta'a quiyim ỹaatqajam coñiỹa da nqouagaxainaxaguii. ₈Qam quená'ogue ỹaatqajam ne'xoriñiỹata' qamiri, ma' da ne'xorenataxanaxa 'xoic na nasauaxaset ỹapalaxat. ₉Nquelolliỹata' quenaua ra'aachiri, qaica ca se no'uen ca la'deenataxanaxac. ₁₀Chaqai quiñi 'óna ro'ueenataxana cá'maq qoỹaanem quiñi qota'a, ỹa'maxate'tegue da lo'ueenataxanaxac quecá'maq reloqo'tegue ca lqouagaxa ñi qota'a. ₁₁No'm 'ue ca retaqa, ca' caua la'qaatqa 'neete'm caua la'qaatqa ñi qota'a. Chaqai no'm 'ue ca qoỹaanem ca lo'ueenataxanaxac, ca ỹo'uet, qam ỹahote'e dá'maq lquesaxanaxa qoỹaanem quiñi qota'a. Chaqai quená'ogue ná'maq qaỹo'uet tai'a nqohin quiyim qaimaqachin ñi qota'a chicqochigui so Jesucristo. Ma' sqaica lqodoc da lauaq chaqai da lquesaxanaxa ñi qota'a. Ajá'a, chaqaida 'neeta dajo.

₁₂Qamiri ỹaqaỹarolqa, 'neeto' lotqai la'lliỹa'guit da lquesaxanaxa da ne'guenaxaguii taatalgoto qamiri quiyim 'ec sqai viriỹau'a quet. ₁₃Ta'ta'a quiyim 'ue ca netoonaxaguii quiyim mashic nouañiỹau'a da le'xoric so Cristo, qaiyi qai'neeta 'xoic ma'le ca netoonaxaguii ma' daañiỹa'guit ca lauaq cá'maq loviraxac so'maxare. ₁₄Ca no'm 'ue ca nelaxalo qamiri sovitapigui so Cristo, ca' chalego la'maxa caqamiri, ma' ñí'maq chalego lauaq ne'Espíritu ñi qota'a hueetalgoto qamiri. Saua'maxare se no'uen da ỹa'xatesac queso Cristo, qam qamiri maqachiñitac so'maxare. ₁₅No'm 'ue ca 'óna caqamiri 'ue ca le'xoric quiyim queeta'pegue' so Cristo, qam 'maxaraic quiyim sqai lauataxanaxai, loqo'm sqai cuataxai, loqo'm quiyim ỹo'ueetetac ca se no'uen, loqo'm quiyim taatapegueu'a ca ỹoqa'a. ₁₆Qam no'm 'ue ca 'ue ca le'xoric quiyim queeta'pegue' so Cristo, ca' sqa taiguit quiyim nayiloxontac. Ta'ta'a quiyim quedajo, ca' paguec imaqachin ñi qota'a.

₁₇Ma' mashic ỹovita yi laloqo' quiyim qaimit na lalamaxareteripi llaalqaipi ñi qota'a. Chaqai no'm dá'maq nimiitaxanaxac ỹovirouguilo qomi', ¿negue' cá'maq 'neeto' ma'le ca lqodoc ná'maq se na'xaỹaxana da la'qaatec ñi qota'a? ₁₈Chaqai no'm ná'maq huagaxaraiquipi 'ue da lqalaic quiyim qanca'laxatec, ca ¿negue' cá'maq qohine'teco' ma'le ná'maq hualoxonyipi chaqai na sauaqhuaiquipi? ₁₉Ca quená'maq 'ue da le'xoric quiyim ỹo'ueetetac dá'maq ỹahotaque ñi qota'a, ca' no'uen quiyim queetalec ỹo'ueetetac dá'maq ỹa'maqachiguiñi. Ca' ỹaañiguilo naua napoquena ñi qota'a da nachaalataxac, ma' chaqaiñi ñí'maq lo'ueenatec. Ca' ñi'maxare ipacqajanchigui ma'le da la'qaatec.