1 Reyes 8

₁Ca co'na'le, ca' so Salomón lapoonta' quiyi Jerusalén ná'maq qo'xoiquipi quena llaalqaipi so Israel, chaqai na neuo' laseripi, chaqai na lashi na na'aateripi quena llaalqaipi so Israel, ma' ỹahotaque nqo'naxato aso lahite' saua laqataxaco ñi qara'gaxala', chicqochi'ñi yi Sión yí'maq qohinac liỹa leenaxat la'a' lodegaxat so David. ₂Ca só'maq na'xa'a viichigui so nemaqachic lodegaxat queso shiraigo leenaxat Etanim, so'maxare ỹovire'oga quena' ime' yaua seis shiriguiri quiyi ñaaxa, ca' qalapoỹau'a so nashi Salomón quesá'ogue so llaalqaipi so Israel. ₃Ca' ỹoviro ná'ogue na qo'xoiquipi quena llaalqaipi so Israel. Ca' so letaxaỹaxanqajanqaipi na qomyipi quena' qaretaxaỹa'pegue' ñi qota'a ỹaconot aso lahite' saua naqataxaco, ₄ca qanqo'naxato aso'maxare chaqai qai'neeta so 'imcoqui' na'daañi huaugui quena' qanauane'e' ñi qota'olec chaqai sá'ogue so louenqaipi yí'maq noma' 'xoic lichic hueetaugui so'maxare. Ca i'xat nqohin so netaxaỹaxanqajanqaipi chaqai so lotauaripi llaalqaipi so Leví. ₅Lapoota'guit so nashi Salomón sá'ogue so llaalqaipi so Israel, ca sá'ogue reloqotau'a aso lahite' saua naqataxaco, ca' qoỹaano quiyim qaỹavigaxat ana nachitaxanataxanqate qagretaipi chaqai na toorollipi ỹaatqajam 'xoic, ca' tot qaishit qanaloqochin. ₆Ca co'na' ime, ca' so netaxaỹaxanqajanqaipi ỹaconot aso lahite' saua naqataxaco, ca' qaỹodougui na lauel aso no'ueenaxanaxaqui, ca qoỹana'ñi yi noma' 'xoic lichic qoỹano'oto naua laua' saua nadenqatqa 'vii naua laua'. ₇Ca saua'maxare ỹauatetaguilo naua laua', nalooterelec yí'maq qoỹana'ñi aso lahite' saua naqataxaco chaqai saua neconqa. ₈Qam sauá'maq neconqa ma' paguec na ladocqa', ca' re'qootau'alo naua lo'lo' quiyí'maq noma' paguec lecaguiñi pa'aauec quiyi noma' 'xoic lichic, ca' chaqaida 'neetari' vire'ta nagui ñaq re'qootau'a. ₉Ca' aso lahite' saua naqataxaco qaica ca liỹa hueragui, qaisauate' saua dos qari illa'ñiguilo na'le so Moisés quiyi Horeb, saua qari hueesalec da na'maqataxac na' na'maxate'e' ñi qota'olec so llaalqaipi so Israel na' ca'e yi Egipto.

₁₀Ca na' nenoxonec so netaxaỹaxanqajanqaipi quiyi noma' paguec lecaguiñi, ca' so naueguelec no'xagui nqai'en so no'ueenaxanaxaqui queso qara'gaxala'. ₁₁Ca' sauaxat so naueguelec, ca' so netaxaỹaxanqajanqaipi se ishit hueetaugui ñi no'ueenaxanaxaqui quiyim ỹo'uet ca nqouagaxainaxac, ma' da lauaq ñi qara'gaxala' ỹaatqajam no'xataxachichigui aso no'ueenaxanaxaqui.

₁₄Ime, ca' so nashi naqalgoxoñi, ca' reloqougui sá'ogue so llaalqaipi so Israel nachaatetaho. Ca' ỹaanem da no'uen llicyaxac. ₁₅'Naaco':

—Ỹaatqajam qaimaqachin ñi qara'gaxala' ñí'maq qota'olec quena Israel, ma' ipacqajanchigui dá'maq ỹachaxantaco' na'le queso ita'a David, co'na' 'naac: ₁₆Queso na'xa'a na' ñaqata'a na llaalqaipi so Israel quiyi Egipto, saqa'leca ca ñca'au'a quená'ogue na na'aateripi quená'maq neeta'ñi na llaalqaipi so Israel quiyim 'ue quet ca qoỹana'ñi qano'xonshiguim ca qouagaxainaxaqui quiyim hueetaugui quet da ỹeenaxat. Qam ñca'au'a so David, qaiyi reloxoỹa'a na ỹalamaxareteripi llaalqaipi so Israel. ₁₇Só'maq ita'a David 'uo' da 'neeta quiyim ỹahotaque no'xonshiguim ca qouagaxainaxaqui quiyim qaimaqachin ñi qara'gaxala' ñí'maq qota'olec quena Israel. ₁₈Qam ñi qara'gaxala' 'naaco' queso'maxare: Ỹa'maqachiguiñi dá'maq 'ñitetegue quiyim vi'saque no'xoñirishiguim aca no'ueenaxanaxaqui; ₁₉qam mesqaiqami' ná'maq no'xoñirishiguim ma'le aca'maxare, ta'ta'a cá'maq qachaalqui'. Ca' chaqaica cá'maq no'xonshiguim ma'le aca no'ueenaxanaxaqui.

₂₀Ca' ñi qara'gaxala' ỹaatqajam ipacqajanchigui nagui dá'maq la'qaatec. Ca' ỹim nagui ñqa'xanlec da lo'ueenataxanaxac so ita'a David, ca' ñqa'xanñi quiyim ỹim lashi na llaalqaipi so Israel. Chaqai ño'xonshiguim ana no'ueenaxanaxaqui, qaiyi qanqouagaxainot ñi qara'gaxala' ñí'maq qota'olec quena Israel. ₂₁Chaqai qai'neeta so'uet cañi'maxare yi loma' añi lahite' naua naqataxaco ỹaanema na'le so 'auaxaic qareta'allipi na' naqata'a quiyi Egipto.

₂₂Ime, ca' so Salomón nachajñi reloqoto'ot aso ncopatoxonaxalate quiñi qara'gaxala', qaiuanchigui quesá'ogue so llaalqaipi so Israel, ỹachaxansashiguim naua lqai'laqate' quena piguim. ₂₃Ca' netenegue da la'qaatec, 'naaco':

—Ỹa'gaxala', qami' qota'olec quena Israel: vire'ta quena piguim chaqai quena 'laua qaica ca liỹa qota'olec 'nejem qami', quiyim ipacqajanchigui na na'maqataxac chaqai ỹachaxan da lqouagaxa quená'maq ỹomato'ot qami' añi le'taxanata quiyim ro'ueenataxanot qami'. ₂₄Ma' pacqajñichiriguilo dauá'maq 'ñirapegalo na'le so relaachiqui' David, só'maq ita'a. Ca' quena na'xa'a, ca' ỹovirelec quiyim ipaquichiguilo naua ra'qaataxahi'. ₂₅Ca' vichiguiño' qami' qara'gaxala', qami' qota'olec quena Israel, pacqajñichirigui qai'neeta dá'maq chaxañi'sac na'le queso relaachiqui' David só'maq ita'a, na' 'ñirac: qaica ma' qaica quet ca 'oonoqui' se se'xoren quena qachaalaxai'ipi quiyim sano quiyim lashi na llaalqaipi so Israel, pagueco' no'm na qachaalaxai'ipi no'ueenaxat ca llicyaxac, chaqai na'maxateta, 'nejem nqai'en dá'maq na'maqataxaqui' na'le caỹim. ₂₆Ca' vichiguiño' nagui, qami' qota'olec quena Israel, ỹaatqajam ipaquichiguilo nqai'ñi' naua chaxañisa'pe queso ita'a David, só'maq relaachiqui'.

₂₇Qam ¿peeta'a ỹaatqajam llic dá'maq quiyim qami' qota'olec, ca' shichi' ñi'salec ana 'laua? Ma' na piguim quiyim chalego da lecaguiñi, qam se nalo'guit qami' quiyim rolli'rañi, ca ¡huose'quet ná'maq najo 'imec ño'xonshiguim sauaaque qauochi'! ₂₈Qam qaiyiita, qami' ỹa'gaxala' qota'olec, quelollita ma'le da ñi'xoresenaxac chaqai da ỹashiilaxanaxac, na'xaỹaxañita da loỹaxanaxac chaqai da nqouagaxainaxac najo relaachiqui' ná'maq rashiila'isac nagui. ₂₉Sqai 'xañiriñi quiyim na'i'sa'ña quiyi pe chaqai quiyi na'xa'a najo no'ueenaxanaxaqui, ma' chaqaina ná'maq 'ñirac ñi'sa'ñi. Na'xaỹaxañita da nqouagaxainaxac ỹaantacot qami' quenajo najo relaachiqui'. ₃₀Na'xaỹaxañita da ỹashiilaxanaxac chaqai ná'maq ralamaxarichi' llaalqaipi so Israel quena' ñqouagaxainaq quenajo. Ca 'qa'ita quena piguim ná'maq ñi'sa'ñi, ca' sqo quirapeguema qomi' quenajo.

₅₂Na'xaỹaxañita da nqouagaxainaxac najo relaachiqui' chaqai da lashiilaxanaxac na ralamaxarichi' llaalqaipi so Israel. Qami' qota'olec, ¡na'xaỹaxañitalo qomi' quena' qaraualqot qami'! ₅₃Ma' qami' qara'gaxala', ỹoochire'oga ma' vi'saque quiyim ralamaxarichi' quená'ogue na ỹoreta'oguit qomyipi quena 'laua, ma' chaqaida 'ñiraco' na'le queso relaachiqui' Moisés na' naqachira'a quiyi Egipto so 'auaxaic qareta'allipi.

₅₄Ca co'na' so Salomón ỹomat da nqouagaxainaxac ỹaualqatacot ñi qara'gaxala', ỹa'deeso'oto naua le'cootal aso ncopatoxonaxalate, ỹiquesashiguim naua lqai'laqate'. ₅₅Ca' so'maxare nachajñi, ca' ỹaanem da nqouagaxa sá'ogue so llaalqaipi so Israel, ỹaatqajam nelamaxaren, 'naaco':

₅₆—¡Ỹaatqajam qaimaqachin ñi qara'gaxala' ma' ỹaanem da leuagaxa na lalamqateripi llaalqaipi so Israel, ipaquichigui nqai'en dá'ogue dá'maq ỹachaxantac na'le! Ma' sqaica ma' se ipaguigui quet ná'maq no'uen ỹachaxantac na'le queso lelaatec Moisés.

₅₇Ca' nagui ma' ñi qara'gaxala' qota'olec ỹalequetauguilo qomi', 'neetari' dá'maq 'neetari'o' na'le queso 'auaxaic qareta'allipi, ca' totqai ca'ahi qomi' chaqai se qaralat. ₅₈Ta'ta'a quiyim ỹa'maxajñi añi qare'taxanata, qaiyi so'ueetaq cá'maq ỹahotaque chaqai sepacqachiguilo quiyim so'ueetaxe' naua lelaataxanaxaco, laqataxaco, nauá'maq relaataxanlgoto quiyim qaỹo'ueete' queso 'auaxaic qareta'allipi. ₅₉Ca' naua sashiilaxanapigui quiñi qara'gaxala' qota'olec se ỹa'laxachii quenaua'que naua na'xata' quiyi pe chaqai yi na'xa'a, chaqai quiyim ỹo'uet ca ỹa'maqachiguiñi quenajo lelaatec chaqai quena lalamaxareteripi llaalqaipi so Israel, ma' ỹovita ca na'xa'a quiyim qaỹouen, ₆₀qaiyi ná'ogue na ỹoreta'oguit qomyipi quena 'laua ỹa'deenta quiyim ñi qara'gaxala' qaiñiita qota'olec, qaica ca liỹa 'nejem malam. ₆₁Ca' vichiguiño' raqamaxaita quiñi qara'gaxala' qota'olec, pacqajñichiguilo quiitalgoto naua laqataxaco, na'xaỹaxañii'talo naua lelaataxanaxaco, 'nejem quenajo na'xa'a.

₆₂Ca na' ime dajo, ca' so nashi chaqai sá'ogue so llaalqaipi so Israel ỹaano quiyim ỹavigaxat ana lachitaxanataxanqate, ca ỹaanot ñi qara'gaxala'. ₆₃Ca' so Salomón ỹaanot ñi qara'gaxala' so veintidos mil toorollipi chaqai ciento veinte mil aso qagreta quiyim qaropilot ñi qota'olec.

Ca' chaqaida 'neeta quiyim so nashi chaqai sá'ogue so llaalqaipi so Israel ỹaanot ñi qara'gaxala' aso no'ueenaxanaxaqui. ₆₄Ca' chaqaiso so na'xa'a, ca' so nashi co'taxat asó'maq huañigui na lavinñi so nasoxoc quiyi reloxoỹa'uegue aso no'ueenaxanaxaqui quiyim qanqouagaxainot ñi qara'gaxala', ma' cá'maq hua'ñi quena' qaỹavigaxat na nachitaxanataxanaxat, chaqai quena' qoỹaano na trigo, chaqai quena' qaỹavigaxat ana lo'ỹo na nachitaxanataxanqateripi quiyim qaropilot ñi qota'olec. Ma' aso ncopatoxonaxalate imaañi bronce na'ñi yí'maq sqoỹoqaque quiñi qara'gaxala', ỹaatqajam cocho'qui', ca' se nalolec so nachitaxanataxanqateripi.

₆₅Ca' quesojo na'xa'a, ca' so Salomón chaqai sá'ogue so llaalqaipi so Israel só'maq ỹaatqajam 'xoic qomyipi chicqochi'ñi yi ñigo quiyi Hamat queda rapiguim chaqai ỹovira'a aso ñaachi queda 'guiñi quiyi Egipto, ca' qaỹo'uet so nemaqachic quiyim qoyinauguilo naua 'imqolqai' na'derañi quena' qaimaqachin ñi qara'gaxala' qota'olec, chaqai saua liỹa' siete na'xata', ca' ỹovi' catorce na'xata' so nemaqachic. ₆₆Ca' queso liỹa na'xa'a, ca' so nashi niquine'e' so qomyipi mashic pil, ca' so qomyipi nqouagaxainteguelec quiyim no'uen ca llicyaxac so nashi. Ime, ca' so qomyipi pil quenaua la'aate', 'ue da netoonaxac, chaqai ỹa'maqachigui lauel quená'ogue ná'maq no'uen lo'ueenataxanaxac ñi qota'olec na'le queso lelaatec David chaqai ná'maq lalamaxareteripi llaalqaipi so Israel.