1 Reyes 12

₁Co'na'le, ca' so Roboam taigue da Siquem, ma' sá'ogue so llaalqaipi so Israel quepegue' yi'maxare, ma' ỹahotaque ỹano so'maxare quiyim nashi. ₂Qam 'uo' da la'xaỹaxac quedajo so Jeroboam só'maq llaalec so Nabat na' ñaqai neeta'ñi yi Egipto yí'maq quepegue'o' na' 'eetapeguem so nashi Salomón, ca' chaqaiyi chaqa'ma' na'ño' na'le. ₃Ca co'na' qaroỹaxane so Jeroboam, ca so'maxare chaqai sá'ogue so llaalqaipi so Israel eec quiyim retaxaỹa'pegue' so Roboam. Ca 'naaco' queso'maxare:

₄—Yi qataa'i' Salomón ỹaatqajam se ỹala'que qomi' na'le. Ca' qami' nagui, qami' ñaqai la'ira'que qomi' quiyim qarelachi' chaqai añí'maq qarishiuetenaxanqate, qaiyi so'ueenataxanqot qami' ma'le.

₅Ca' so Roboam 'naaco':

—Mohi, pilliuec, ca' quenaua tres na'xata', ca lotqai liỹa ñiuanaxata'.

Ca' so qomyipi pil. ₆Ca co'na'le, ca' so nashi Roboam eec renataxana so qo'xoiquipi só'maq lotauaripio' na'le so Salomón co'na' ñaqa 'ue so'maxare. Ca renataxano' so'maxare, 'naaco':

—¿Negue' ca 'neeto' ca ra'qaachiguii 'maxaraic caỹim, qaiyi sasaachiguit na qomyipi yinatetac?

₇Ca só'maq qo'xoiquipi 'naaco':

—Nagui no'm quelollita najo qomyipi, chaqai no'm no'ueenaxachi' naua ra'qaataxahi', ca' najo qomyipi ñaqai queetalec quiyim ro'ueenataxanot qami'.

₈Qam so Roboam se na'xaỹaxana da 'naac so qo'xoiquipi. Ca' inat so ne'naqaipi só'maq chi naloxouaripi chaqai chi nalliripi. ₉Ca' inato' so ne'naqaipi, ca 'naaco':

—¿Negue' cá'maq ra'qaachiguii 'maxaraic caỹim, qaiyi sasaachiguit na qomyipi quiyim ỹahotaque ñoquiigaxajñi añí'maq ishiuetentac na'le quiyi ita'a?

₁₀Ca so ne'naqaipi só'maq naloxouaripi so'maxare 'naaco':

—Ca' quena qomyipi ná'maq rashiila'isac quiyim noquiigaxachiriñi añí'maq lishiuetenaxanqate na'le queso qataa'i', ca qami' 'ñiraco' ma'le quena'maxare: No'm 'xoic lquesaxanaxa dá'maq 'ne'tegue na'le so ita'a caqamiri, qam caỹim paguec lquesaxanaxa ma'le nqaishin. ₁₁Ca so'maxare no'm resalli dá'maq inaxalgoto qamiri, qam ỹim paguec lesallaxa nqaishin cá'maq senaxalgoto qamiri. Chaqai no'm so'maxare ỹoda'alo qamiri ca loshicmaxa quiyim rouaxañii, qam ỹim soda'alo qamiri ma'le ca nouaxanaxanaxat, qam lecat lahi ca lo'losec.

₁₂Ca na' ỹovirerec caua tres na'xata', ca lotqai ỹoviro so Jeroboam, liỹaatac sá'ogue so qomyipi, ỹovira'a so nashi Roboam, ma' chaqai 'naaco' so'maxare. ₁₃Qam so nashi ỹaatqajam se ỹala'gue da ỹa'xat, ma' se na'xaỹaxana dá'maq 'naaco' na'le so qo'xoiquipi. ₁₄Ca' ỹopilaxachichigui quiyim 'naac dá'maq qohinapego' na'le queso ne'naqaipi, 'naaco':

—So ita'a Salomón ỹaatqajam resalli dá'maq inaxalgoto qamiri na'le, qam ỹim paguec lesallaxa nqaishin dá'maq senaxalgoto qamiri. Chaqai no'm ỹouaxane' qamiri, ỹodoota'alo ca ñic, qam ỹim soda'alo qamiri ma'le ca nouaxanaxanaxat 'ue ca lo'losec lecat lahi.

₁₅Ca' so nashi Roboam ỹaatqajam se na'xaỹaxana da 'neeta'pegue so qomyipi, ma' ñi qara'gaxala' chaqai 'negue quiyim chaqaida 'neeta, qaiyi imigui dá'maq ỹachaxantaco' na'le ñi qara'gaxala' queso Jeroboam só'maq llaalec so Nabat, chicqochigui so Ahías só'maq na'ñi yi Silo. ₁₆Ca co'na' sá'ogue so ỹalliripi quesó'maq llaalqaipi so Israel, co'na' ỹa'den quiyim so nashi se na'xaỹaxan quedá'maq qohinta'pegue, ca' so qomyipi 'naaco':

Ca co'na'le, ca' so Israel llaalqaipi quepegueto nauá'maq chi la'aate'. ₁₇Ca quená'maq llaalqaipi so Israel quená'maq neetaugui na na'aateripi quiyi 'laua Judá, ca' so Roboam ñaq reloqota'a so'maxare. ₁₈Ca co'na' so Roboam ila' so Adoram quiyim neloxoỹaq quena 'ueenataxanaxairipi, ca sá'ogue so llaalqaipi so Israel ỹalauat, ỹodoota'a na qa'. Ca co'na'le, ca' so nashi Roboam chaqa'ma' renojñigui aso lahoglena, ca 'eet, taigue da Jerusalén. ₁₉Ca' chaqaida 'neeto' na llaalqaipi so Israel na' npa'guene'e' na nashillipi quena llaalqaipi so David, chi ỹovireta'a nagui.

₂₀Ca co'na' so llaalqaipi so Israel 'ue da la'xaỹaxac quiyim mashic rapil queda Egipto so Jeroboam, ca qarelaataxane'oga queso qomyipi. Ime, ca' qoỹano quiyim nashi quiyá'ogue yi Israel. Ca co'na'le, ca' qaica ỹaatqajam quejlec na nashillipi quena llaalqaipi so David, ca ỹoqota'oga ná'maq chaqai llaalqaipi so Judá.

₂₁Ca co'na' so Roboam ỹoviro quiyi Jerusalén, ca lapoonta' so ciento ochenta mil nalliripi lca'acseripi queso llaalqaipi so Judá chaqai queso llaalqaipi so Benjamín, ma' ỹahotaque nalauate'e' yi Israel, ca rapilaxat quiyim qaỹa'guelec nashi. ₂₂Qam ñi qota'olec retaqaugui na'le so letaxaỹaxaqui Semaías, 'naaco':

₂₃—'Ñirapega ñi Roboam ñí'maq llaalec so Salomón ñí'maq nashi quiyi 'laua Judá, chaqai ná'ogue na llaalqaipi so Judá chaqai so Benjamín, chaqai ná'ogue na liỹa qomyipi, ₂₄'qaataxañitem quiyim ỹim shinac quiyi qomyipi quiyim se nalauajta', ma' chi nqaỹaripi Israel llaalqaipi. Qaidaata quiyim ná'ogue pila'a na la'a', ma' ỹim ná'maq shi'ntegue dajo.

Ca' so qomyipi na' 'xaỹa dá'maq 'naaco' na'le ñi qara'gaxala', ca sá'ogue pilo, 'ne'tegue dá'maq 'naaco' na'le ñi'maxare.

₂₅So Jeroboam liỹa no'xonshiguim yi na'a' Siquem hua'ñi yi 'xoic ana quemaralec qa' quiyi Efraín, ca chaqa'ma' na'anyi. Ime, ca' lotqai no'xonshiguim qai'neeta yi na'a' Penuel. ₂₆Qam na' ime, ca ra'deenataxanaco', ca 'naaco':

—Na nashillipi quena llaalqaipi so David sqoue quiyim rapil, ca lotqai liỹa qaỹa'guelec. ₂₇Ma' najo ỹalliripi quiyim pilta'gue da Jerusalén quiyim ỹaano ana lachitaxanataxanqate quiyim qaỹavigaxat hua'ñi añi no'ueenaxanaxaqui quiyim qanqouagaxainot ñi qara'gaxala'. Ca' liỹa qanqo'ta so Roboam só'maq lashi na llaalqaipi so Judá. Ca' qayalauat, ca' na qomyipi pilot ñi Roboam ñí'maq lashi na llaalqaipi so Judá.

₂₈Ca co'na' ime quiyim renataxantac so'maxare, ca' so nashi relaataxanlgoto quiyim qaỹo'ueete' saua dos huaqui llaalqa ỹachigoxotaugui na 'oro. Ca co'na' ime, ca 'naaco' queso qomyipi:

—Qamiri llaalqaipi so Israel mashic shi'gom quiyim pillita'gue da Jerusalén. Ca' nauajo nauá'maq rashiilaxahi nauá'maq naqata'alo qamiri na'le quiyi Egipto.

₂₉Ca co'na'le, ca 'óna so ỹana'ñi yi Betel chaqai so liỹa ỹana'ñi yi Dan. ₃₀Ca' chaqaida dá'maq chicqotougui quiyim so llaalqaipi so Israel 'ue da lasauaxaset. Ma' so qomyipi taata'pegue da Betel chaqai da Dan quiyim nqouagaxainqa'. ₃₁Ca so'maxare no'xoñishiguim naua qouagaxainaxaqui' quiyim qaỹashiila na nqolac chaqai ỹano quiyim letaxaỹaxanqajanqaipi na qomyipi sqai llaalqaipi so Leví. ₃₂Chaqai qai'neeta ỹa'ue so laloqojnec quiyim ỹo'uet so lemaqachic, ca' viichigui nqai'en so na'xa'a quince quena' ime'ueque saua siete shiriguiri queso ñaaxa. Ca' so nemaqachic qaỹo'ueeto' quen quiyi Judá. Ca chaqaiso so'maxare ỹavigaxat so lachitaxanataxanaxat huaalec aso ncopatoxonaxalate. Ca na' ỹo'uet dajo hua'ñi nqai'en yi Betel quiyim ỹaanot so lachitaxanataxanaxat só'maq huaqui llaalec chi lo'ueenatec. Ca' na netaxaỹaxanqajanqaipi idaanlec nqai'en da nemaqajnataxanaxac quiyim qanqouagaxainot na nqolaquipi no'xonshiguim. ₃₃Ca' chaqaida 'neeta co'quena' ỹovirerec saua quince na'xata' quena' ime'ueque saua siete shiriguiri. Ca' so Jeroboam ỹo'uet aso lachitaxanataxanqate illaalec aso ncopatoxonaxalate chi lo'ueenata na'ñi yi Betel. Ca' queso na'xa'a viichigui so nemaqachic, ca so'maxare talaxan, chi ỹo'uet quiyim lemaqajnataxanaxaqui na llaalqaipi so Israel. Ca' ỹo'uet so lichiinaxanaxat lo'daxaraic lahita quiyim ỹavigaxat.