Na llaalqaipi ñi qota'a
1Ñaqai 'ajñii dá'maq chalego le'xorenataxanaxa ñi qota'olec coqomi' quiyim qohinac qomi' llaalqa ñi'maxare, qam llic qomi' llaalqa. Vichiguiño' ná'maq ñaq ỹo'ueetetac na nanatec hueetalec ana 'laua se ỹa'deene' qomi', ma' se ỹa'den ñi qota'a. 2Qamiri ỹaqaỹarolqa, mashic qomi' llaalqa ñi qota'a. Qam saqa' qaỹachaxanoxorom cá'maq shinqata ma' novi' cá'naq nqodoc. Qam sa'deenaq quiyim ma' liỹa re'oq so Jesucristo, ca' shinqatam so'maxare, ma' seuanaxa ma'le dá'maq ỹaatqajam 'neetari' so'maxare. 3Ca' ná'ogue ná'maq hueeto'ot dajo quitaxac queso'maxare, ca' se ỹalliguiguit na se no'uen nqai'en da nachaalataxac, 'nejem nqai'en dá'maq 'neetari' so Jesucristo, ma' ỹaatqajam co'teeta da nachaalataxac.
4Qam ná'ogue ná'maq ỹo'uet ca lasauaxaset, na'maxare se na'xaỹaxana na laqataxaquipi ñi qota'a, ma' ca nasauaxaset 'ue, ma' se qana'xaỹaxana na naqataxaquipi. 5Ma' qamiri shi'gue 'yiiñii quiyim so Jesucristo nacpegue' ana 'laua, ỹahotaque naqat na qarasauaxaset, qam so'maxare qaica ca lasauaxaset. 6Ca' vichiguiño' ná'ogue ná'maq ñaq na'deetau'a so'maxare, tot ỹo'uet ca lasauaxaset; qam ná'ogue ná'maq ñaq ỹahotaque na lasauaxaset, se iuana chaqai se ỹa'den so'maxare. 7Qamiri ỹaalqolqa, sqai 'xañiigue quiyim 'ue ca ỹayine' qamiri. Cá'maq ỹo'ueetetac ca ỹa'maqachiguiñi, ca huagaxaraic, ca 'nejem so Cristo huagaxaraic. 8Qam cá'maq ñaqai queetalec na lasauaxaset, cá ca'maxare lalamaxaret so na'ỹaapec. Ma' só'maq na'ỹaapec sauaqhuaic shi'gue na' ñaqai chita'gue qaỹo'uet na 'laua. Ca' chaqaido' dá'maq 'neeta quiyim novi' so llaalec ñi qota'a, ma' ỹahotaque ỹosogui dá'maq ỹo'ueeto' na'le so na'ỹaapec.
9Qaica quet cá'maq quiyim mashic llaalec ñi qota'a, ca' queetalec quet da nasauaxaset, ma' hueeto'ot da chaalataxac chicqo'ot ñi qota'a. Ca' se ishit quiyim queetalec da nasauaxaset, ma' mashic llaalec ñi qota'a. 10Chaqai qaỹa'den negue' cá'maq ỹaatqajam llaalec ñi qota'a chaqai negue' cá'maq llaalec so na'ỹaapec, ma' canchaqaica quiyim se ỹo'uet ca ỹa'maqachiguiñi, loqo'm quiyim se i'xoren ca lqaỹa, se lalamaxaret ñi qota'a.
Quiñi 'óna ỹaatqajam i'xoren ca liỹa
11Ma' dá'maq na'qaatec 'au 'xahichigui na' ñaqai chita'gue coñiguit da na'qaatec 'neetasa': Quiñi 'óna i'xoren ca liỹa. 12Ca' qomi' sqai shinqata so Caín, ma' queeta'pegue' so na'ỹaapec, ca' ỹalauat so lqaỹa Abel. Qam ¿chi'neco' ma' ỹalauat? Ma' so Caín ỹo'ueetetac da se no'uen, qam so lqaỹa ỹo'ueetetac dá'maq no'uen.
13Qamiri ỹaqaỹa', 'neeto' re'laxahi quiyim noquii'alo qamiri ná'maq qomyipi ỹo'ueetetac na se no'uen hueetalec ana 'laua. 14Ma' qomi' mashic ñapagaxalec da nelauaxa, ca' ñqo'naxa da nca'laxa. Ca' dajo sa'deenaq, ma' se'xorenaq na qarqaỹaripi. Ma' cá'maq se i'xoren ca lqaỹa, ca' ca'maxare ñaqai hueetaugui da nelauaxa. 15Ná'ogue ná'maq ñaq noquiaatapega ca lqaỹa, lauataxanaxai. Chaqai qamiri 'yiiñita queca lauataxanaxai sqai hueetagui añi le'taxanata ca nca'laxa sqaica lqodoc. 16Sa'deenaq dá'maq 'neeta da ne'xorenataxanaxa quiyim so Jesucristo ỹaanec da nachaalataxac na' ileualgoto qomi'. Ca' qomi' quet qai'neeta saanaxauec quet da qanachaalataxac queca qarqaỹa. 17No'm 'ue ca 'óna coqomi' quiyim naloochiguiñi na louenqaipi queda nachaalataxac, ca iuane'ta ca lqaỹa ỹaatqajam 'ue da louenaxanaxa, qam se nqouaguegue ca'maxare, ¿negue' quet cá'maq 'neeta quet quiyim 'ue quet ca le'xorenataxanaxa quiñi qota'a hueetagui quet añi le'taxanata? 18Qamiri ỹaalqolqa, quedajo qare'xorenataxanaxa 'neeto' chi nodaachiriñi naua qara'qaatqa. Ta'ta'a quiyim ỹaatqajam 'chichiguiñi ne'xorenataxanaxa quiyim re'qoota nqaishinaq cá'maq so'ueetaq.
Qaica ca huapigui lauel ma' neeto'ot ñi qota'a
19Ca' chaqaida 'neeta quiyim qomi' sa'deenaq ỹaatqajam seuqataugui da lliqueta, ca' qaica ca huapigui qouel quiyim seuqato'ot ñi qota'a. 20Ma' no'm añi qare'taxanata re'oq nqai'en quiyim 'ue ca qarasauaxaset, ca' ñi qota'a paguec lecaic cañi qare'taxanata, chaqai ñi'maxare ỹa'den ná'ogue. 21Ca' vichiguiño' qamiri ñauochaxaua' ỹaqaỹa', no'm añi qare'taxanata qaica ca re'oq nqai'en qarasauaxaset, ca' ỹaatqajam qaica ca huapigui qouel quiñi qota'a. 22Ca ñi'maxare ỹaanema qomi' cá'ogue cá'maq sashiilaxanqaque, ma' ña'xaỹaxanqa'talo naua laqataxaco, chaqai so'ueetqatac ná'maq ỹa'maxarenta. 23Ca' dá'maq lelaataxanaxac chaqaida dá'maq quiyim seuaqlec só'maq llaalec Jesucristo, chaqai quiyim ñi'xoresenaqta', ma' chaqaida dá'maq ilarelgoto qomi'. 24Ná'maq na'xaỹaxane'talo naua naqataxaco, ca' na'deetau'a ñi'maxare, chaqai ñi'maxare na'deeta'guita caua'maxare. Sa'deenaq quiyim ñi'maxare hueetauguilo qomi', ma' ñí'maq ne'Espíritu ỹaanema qomi' qara'deenaxanaxan.
