1 Juan 1

₁Seraxañi dajo, ca selataxalo qamiri, dá'maq shi'co' 'ue na' saqa'leca na 'laua, dá'maq qomi' sa'xaiqachigui chaqai seuanqachigui quenaua qanqote', ma' ỹaatqajam sa'ajanqatac chaqai sepotqau'a quenaua qanapoquena. Ca' so'maxare chaqaiso só'maq qohinaco' quen na'qaatec chicqaugui da nca'laxa. ₂Ca' sojo chicqaugui da nca'laxa nachaxan, ca' qomi', seuanaxa, ca' qomi' sa'xatqatac so'maxare. Ca' sechoxotqaima qamiri dajo nca'laxa sqaica lqodoc, dá'maq hueeto'oto' na'le ñi qota'olec, ca' nachaxanalo qomi' na'le. ₃Sa'xatqatac só'maq seuanaxa qomi' chaqai sa'xaỹaxa, qaiyi qamiri na'yiiu'alo qomi', 'nejme' qomi' quiyim ỹaatqajam ña'daqatau'a ñi qota'olec chaqai so llaalec Jesucristo. ₄Ca' chaqaida dá'maq 'em seraxañi dajo, qaiyi ỹaatqajam naloochiguiñi ca netoonaxaguii.

₅Ca' dajo dá'maq na'qaatec ỹapaxaguinguelo na'le qomi' so Jesucristo, ca' qomi' sa'xatqaima qamiri: quiyim ñi qota'a re'qojlec nqai'en ná'ogue, chaqai qaica ca napalaxa hueeto'ot ñi'maxare. ₆Ca no'm shinqac ña'daqatau'a ñi'maxare, qam no'm ñaqai seuqataugui na napalaxa, ca' ña'majanqatac quecá'maq sa'xatqatac chaqai quecá'maq so'ueetqatac. ₇Qam no'm seuqataugui cá'maq re'qojlec, shinqatari' ñi qota'a ma' re'qojlec ca hueeta'ñi, ca hueeta'ñi, ca quiñi 'óna coqomi' ỹaatqajam na'deeta'guit ca liỹa, ca' saua leuo' so llaalec Jesucristo co'taxate' qomi' quená'ogue na qarasauaxaset.

₈No'm shinqac qaica ca qarasauaxaset, ca' chi ñayinqateguelta', chaqai cá'maq lliqueta sqaica coqomi'. ₉Qam no'm sa'xataxe' naua qarasauaxasete', ca' spi'ỹaaqa'a ñi qota'a quiyim ishit ỹo'uet ca ỹa'maqachiguiñi, ca ñi'maxare ishit ỹapalaxat na qarasauaxaseteripi chaqai qarco'taxat quená'ogue na se no'uen. ₁₀Qam no'm shinqac quiyim sqaica ca qarasauaxaset, ca 'ec 'maatqaic nqaishinaq ñi qota'a, chaqai sqai ỹaatqajam llic seuaqlec da la'qaatec.